Acts 21

Pol iu ili Jerusalem

Aso adeu wurah ili tiri lau badu Epesus, ma anya, “Aha ndrado ai.” Aso alakak amwenen ala busu ari, iri aloh Kos. Ano, na len ari ja badeh, aso are Kos alakak ala busu Rodes. Aso alakak are busu Rodes au ala asahan kon tinan Patara. Aso ruwani ndron nane aso au aliy ereu ai, aso anuhun ndron ra-ei kameh anya ki-iu kili Ponisiya. Eme ma aso sandroh ala bolo ndron nane doh ja, ere Patara ma alakak au ai. Ahi alakak au ala bolo ndras laleyah, eme ma ahi anyolom busu Saipres udu loboho mine ahi kamweu. Eme ahi alakak ala, ala winiya le ahi asahan kon munyak tinan Siriya. Ma ndron doh ili Tair ta akeh sanuw ale.

Aso ala kon doh, ma ndruni oro lau ta Jises rayah, ma aso are hawe oro are gwek, winiya len ma ndro taloh. Udu bolo len doh badeh, boto-on ta Malawin Ndrabun tiye sahou randra ili tiri. Eme ma iri tiye sahou nane doh ili ta Pol i buku doh, “Ou sala kon tinan Jerusalem labai, bwe kameh iri kadai ou amak.” Arile, len ma ndro taloh taso are hawe oro badeh, ndrano ai, eme ma aso ka-au kala hamon kala ndron ja. Eme ma oro lau marakon ta Jises nane, ma udu oro hawe nadu oro, tiyani aso ala babi. Eme ma ahi mari atehei bwili ndru-u ahi i bada on, ma asolom ili ta Kindrei. Aso ateu lim hawe oro, ano aso sandroh ala bolo ndron. Eme ma oro adek au ala hamon ala ndrahune oro ja.

Eme ma ndron nane aso an bolon alakak are Tair ales ili kon tinan Tolomes. Eme aso ndruni oro lau ta Jises rayah ja are loboho doh, ma ateu lim hawe oro. Ma aso are hawe oro len ari le. Na len ari ja badeh, ahi alakak are Tolomes ala kon tinan Sesariya. Udu loboho doh, badeh aso ala asahan asiu ta lau ta Jises ari nyaran Pilip, ma aso amadin hawen. Iy ta atiye sahou ta Jises na len mari, ma iy badu hawe oro lau ma ndro taloh mene iri lau ta Kindrei hawe oro aposel badu Jerusalem atehei oro ta aseben iri lau ta Kindrei. Ma Pilip badeh, nadun oro ma hahuw ndra badih le. Oro ndra tinan ndra bihin, arile oro batasou bwe le, ma Malawin Mwasin ta Kindrei badeh, udu hawe oro badih nane doh, eme ma len rayah oro winiyan atiye sahou nane Kindrei edeu ili toro i buku propet.

10 Len sabe aso are hawe Pilip, eme ma propet ari nyaran Agabus

udu Judiya eme andri hawe aso.
11 Iy eme asahan hawe aso, ano iy andrei molowa awin ta Pol. Ma iy bawei iy le, katin hawe minen ma la-uh na aliy, ma iy tiye eme taso i buku doh, “Malawin Ndrabun nane tiye eme tek i buku doh, tama molowa awin dah kameh iu ili bolo asiu lulik ili Jerusalem. Iri Juwis badu Jerusalem kameh bawei katin ma minen i buku doh. Ma iri kameh atehei iy ili mine iri lau badu leheleh, ta iri winiyan amekes kandriyen ndra-in i tan.”

12 Aso anuhun sahou doh badeh, eme aso ma hawe oro lau nane are doh, asehek sahou boto-on ili ta Pol i buku doh, “Pol, ou are dah areu, ou winiya bala andri bala Jerusalem bwe.” 13 Arile, Pol tiye i taso ja i buku doh, “Buku sah? Ado satikisi jo, ma ado satehei tikisiy badeh, same tek. Ado kanuhun, jo banoh ta ili bolo asiu lulik ili bolo kon tinan Jerusalem bwe, ma jo banoh bwe ale, buku iri anya kadi jo, tasah jo asehek nyara Jises, iy tinan labai. Eme ma ado winiyan batawi jo ta udu ja bwai.” 14 Aso badeh, winiyan batubuni budon tan bwe, ma aso basehek sahou bala tan ja bwai. Eme ma aso anya, “Ya, Laban, ou bwidi iri lakou kameh asahan na so-ok tam le amwenen.”

Pol udu bolo asiu lulik udu Judiya, ma iri anuhun sahou tan

(Kalan 21:15-–26:32)

15 Len sabe ndrano ndra-au, ano aso lokowani lokowa aso, ta au ala Jerusalem. Aso ame adek au ala kon tinan Jerusalem, 16 ma oro lau rayah ta Jises badu Sesariya adek hawe aso ale. Oro tiyani aso ala asos asiu ta ndramak ari badu busu Saipres nyaran Nason. Iy ndreh doh mene in hamon ta Jises ndra bwena labai. Eme ma aso ado asiu tan.

17 Ya, aso asahan kon tinan Jerusalem badeh, iri lau ta Jises sekesek labai ta anyolom aso. 18 Na len ari ja badeh, Pol hawe aso mari ala anyolom Jemis; ma oro lau ta Jises rayah tinan are aliy ale. 19 Aso ateu lim hawe oro, ma aso mari ja sekesek a le se. Ano Pol asehek nyala iri lakou marakon nane Kindrei amekes ere bolo iri mwan ma badih badu leheleh udu bolo iri len bwena mene iy amekes lahou tan.

20 Iri anuhun nyala lahou ta Pol mari, ano iri atudun nyara Kindrei. Ma iri tiye ta Pol i buku doh, “Nadu tine aso, ou anuhun, ou ndratanam kane lau mwan ma badih nyaran bwe badeh, iri badu Juwis ma iri ndratehei budon tiri ndrala ta Jises. Ma iri mwan ma

badih doh badeh, budon tiri irih labai ta a-en hamon ta batanau ta Moses.
21 Iri lau rayah asehek ou ili tiri i buku doh, ‘Pol badeh, leheya iri lau badu Juwis nane are kon munyak tiri lau badu leheleh, ta iri katehei kona iri kili ta batanau ta Moses, ma tiye iri, sasan ku-i iri nah mwan, ma sa-en hamon ta kandriyen tiri Juwis.’ 22 Iri kameh kanuhun, ta ou ndrasahan dah. Ya idah kameh, to kamekes kili buku sah handru? 23 Ya, aso aso-ok ou an hamon taso ta saba lakou aso asehek. Udu bolo aso dah, oro lau ma hahuw badu Juwis badeh, ndramekes tandrakan boto-on labai i ta Kindrei, ta abeles lakou rayah ta manyah toro amwenen. 24 Ya, ou ala hawe oro ala bolo asiu tinan ta Kindrei, ma ado kamekes kandriyen ta Kindrei ta amekes ado kasahan ha-un ta mada Kindrei. Ma ou asih lakou toro ta asun i ta salom, ta oro winiyan asik batu oro.
(21:24) Ou anyolom in ta Aposel kalan 18:18 ma hawe Namba kalan 6:1-21.
I buku ou amekes i buku doh, iri kameh anyolom ou amekes amwenen handru i buku le kandriyen tiri Juwis. Ma iri kameh winiyan batehei budon tiri ba-en ta sahou, iri anuhun lau rayah mene amekes ewek tam.
25 Ahi ndratorowenei la-ukei ramen, ma ndratiyaniy ndrala tiri lau ta Kindrei badu leheleh, ma ahi tiye tiri i buku doh, ‘Aha saimon nyamon ala ndrala ta salom tiri kindrei nane iri asehek na sukumada kei. Ma aha saimon oda iri katin haka ndra udu ta aliy, ma hawe sa-un ndraye iri. Ma aha samekes kandriyen ndra-in ta karei.’ ”

26 Na len ari ja, Pol andrei oro lau ma hahuw nane doh, ma oro au ala asiu tinan ta Kindrei. Ma oro ala amekes kandriyen tiri Juwis ta iri kasahan ha-un ta mada Kindrei. Ano, oro adek ala bolo asiu tinan ta Kindrei, ma Pol eme tiye iri tinan ta bwena ta asiu ta Kindrei, ta len sabe handru kameh ta kandriyen toro lau ma hahuw kameh amekes ano iu, ma na saba len ja kameh oro kame katiye lakou ta adeu i nyara salom ili ta Kindrei.

Iri tawi Pol

27 Eme ma len ma ndro taloh doh, mirihik tiri ta anya kano ai, iri Juwis rayah nane badu loboho kon Esiya anyolom Pol udu bolo asiu tinan ta Kindrei, oro tukumwi lau solo-an badu Juwis, ma iri ala tawi Pol. 28 Iri arah ma aloh i buku doh, “Aha lau badu Isra-el, aha kame kaseben aso. Iy lau dah le adeh, leheya lau badu kon mara-ei, iy bobose iri lau tataha, ta kandriyen malen ta Moses, ma asiu tinan ta Kindrei ale. Ya, iy bamekes kandriyen dah le bwe. Iy akohok iri lau badu Grik ale ame bolo asiu tinan ta Kindrei, ma iri bwidi ndrahune Kindrei nane leheya iy amwenen udu aliy, ma bwidi ajah ta madan.” 29 Iri tiye iy i buku doh, tasah iri mene anyolom ndramak ari nyaran Tropimus, iy badu kon tinan Epesus, edek bolo kon tinan hawe Pol, ma iri abudon anya, Pol kede-eh ndrandrei iy ndrame bolo asiu tinan ta Kindrei dah.

30 Iri lau marakon anuhun sahou doh, ma iri Jerusalem mara-ei badeh, mani iri atur labai, eme iri mari sakaliye ame atukum ala le doh. Iri tawi Pol ma aruwi iy udu bolo asiu tinan ta Kindrei iu ili manan. Ma iri sulu-i kou marakon badu asiu tinan ta Kindrei ili. 31 Iri anya kadi Pol kimek ki-iu, arile tinan ta atondrok lau ta bahun badu Rom, badeh, ndranuhun lau solo-an labai ado Jerusalem ndratukum, ma anya kamekes bahun laba tinan. 32 Eme ma iy andrei iri tinan hawe iri lau ta bahun, iri sakaliye ala loboho nane iri lau mara-ei atukum are aliy. Iri Juwis anyolom tinan ta mwena tiri lau ta bahun hawe iri lau ta bahun le badeh, iri ruwani Pol ma iri ba-um iy ja bwai.

33 Ndramak tinan ta atondrok iri lau ta bahun eme tawi Pol, ma tiye oro lau tan i buku doh, “Ado kasawei iy ndramak dah na la-uh sen.” Eme ma iy ndremenya iri lau nane i buku doh, “Ya, iy ndramak dah, iy are lau handru? Ma iy amekes saba kandriyen ndra-in handru?” 34 Lau solo-an arah boto-on labai, ma iri asehek sahou laleyah. Eme ma ndramak tinan tiri lau ta bahun nane dah winiyan bala tanan ta kati sahou doh bwe. Ma iy aloh oro lau tan kala katiyani Pol kili bolo asiu boto-on tiri ta bahun. 35 Iri lau ta bahun ame tiyani iy ili isos kati kandren ta adek ala loken le badeh, oro anyolom ma anuhun lau sakaliye ame hawe oro, ma arah i buku doh, “Aha kadi iy ndramak badeh, kimek ki-iu!” Eme ma oro lau ta bahun bwese-ei iy i kase oro iu ili loken, ma iri badai iy bwe.

37 Oro lau ta bahun anya katiye Pol kili bolo asiu tiri boto-on, Pol eme asehek sahou i boho kon Grik ili ta ndramak tinan ta atondrok iri lau ta bahun i buku doh, “Buku sah, jo winiyan asehek sahou ewek tam deh bwe?” Mani iy ndramak tinan nane dah atur sese, ma iy asumon boho Pol i buku doh, “Buku sah, ou tanam boho kon tiri Grik? 38 Jo anya ou kede-eh badu Ijip, iy mene ale tukumwi iri lau ta bahun tan ala tebelese hawe iri lau tahi. Ma iy mene atobwak hawe iri lau, kane iri ma hawa (4,000) iri mene adi iri lau anya ka-en hamon ta gabman badu Rom, ma tiyani iri ala are kon lomale an.”

39 Pol eme asehek sahou i tan ja i buku doh, “Jo iy ndramak badeh, bwe. Jo ndramak ari labai badu Juwis, kon tek handru badeh, Tasus, udu bolo kon tinan Silisiya. Ma nyarak badeh, ere bolo buk badu kon tinan doh, arile na idah jo anya kandremenya ou. Jo anya kasehek sahou kili tiri lau mara-ei are kede-eh.”

40 Iy tiye i buku doh, ma tinan tiri lau ta bahun anya, “Mwasin, ou winiyan asehek sahou.” Eme ma Pol atehei minen i loken ta iri kandru-uk. Eme ma iri andru-uk i le rasan, ma iy asehek sahou ili tiri i boho kon Aramek.

Copyright information for `LID