Acts 22

Eme ma Pol tiye tiri i buku doh, “Aha mari, aha nadu tine, ma aha tama, jo anya kasehek taha kamwenen i buku doh, jo badeh tanan ari lakou jo amekes andra-i bwe. Aha kanuhun kamwenen.” Eme ma iri anuhun iy asehek sahou i tiri i boho kon Aramek, ma iri mara-ei andru-uk, ma bamekes se sahou bwe, tasah iri anuhun iy amwenen labai.

Ma iy asehek ili le anya, “Jo badu Juwis, tine tuwi jo badeh, udu kon rakon iri aloh Silisiya udu bolo kon tinan Tasus. Arile, jo ma bwisik, jo ili akohok tanan ta leheya ma jo asahan ili awas badeh, udu kon tinan Jerusalem dah. Bolo len doh, ndramak tinan taha ari nyaran Gamaliyel badeh, leheya jo. Ma jo badeh, akohok tanan handru ta iri kandriyen malen mari ta tubu taha Moses. Jo abadok ma asahan boto-on ta in hamon le ta Kindrei, ta iri sahou tan, i buku le aha lau marakon nane are kada-ah amekes. Bwena mene jo bokoro-ei iri lau a-en hamon ta San ta Jises, andra-i labai. Ma jo anya kidi iri kamak ka-au. Jo badeh, bawei iri mwan ma badih na sen, ano akahei iri ala are bolo asiu lulik. Iri tinan tiri pris tataha hawe iri kansol mari badu Juwis are kede-eh, iri winiyan asehek sahou mari doh ewek taha, ta jo basehek sahou wendreya, ta iri lakou nane doh bwe. Iri lau mene torowenei la-ukei ramen ili tiri Juwis are Damaskus, iri atehei eme minek, ta jo kili kateu iri lau doh, kabawei iri na sen, ma kandrei iri kame Jerusalem ta iri lau tinan tataha kadeu maha-an ki tiri.”

Pol asehek iy asahan lau ta Jises

(Aposel 9:3-19 ma Aposel 26:12-18)

Pol asehek i tiri i buku doh, “An udu halas badeh, jo edek ndrame mirihik labai ta kon tinan Damaskus. Se nawin bwe, sun ari lomadan tinan labai anya udu kandrah eme andri awudi jo mara-ei. Ma jo atarah i andri bada munyak, ma ndranyek anuhun ndramak ari aloh jo i buku doh, ‘Sol, Sol, tasah handru ou anya adai jo kimek?’

“Eme ma jo asumon bohon i buku doh, ‘Laban, ou are lau badeh?’ Eme iy anya, ‘Jo Jises badu Nasaret, ou nane abo gok ta adai jo kede-eh!’ Ya oro lau rayah nane adek hawek badeh, anyolom lomada sun doh, arile oro banuhun boho ndramak nane asehek sahou eme tek bwe.

10 “Eme ma jo ndremenya iy ja, ‘Laban, ou aso-ok jo kamekes saba lakou tam handru?’

“Ma Laban tiye sahou eme tek i buku doh, ‘Ya, ou suri ou ma ou ala bolo kon tinan Damaskus, ya ndramak ari kameh tiye tam ta lakou marakon Kindrei aso-ok ou amekes.’
11 Madak ma la-uh badeh, ilik mara-ei, tasah lomada sun nane doh, lomadan tinan labai, eme ma oro lau nane adek hawek tawi minek, ma sirini jo iu ili bolo kon tinan Damaskus.

12 “Ndramak ari nyaran Ananayas, iy udu bolo kon nane doh. Iy lau ta Jises ari ai, len mari badeh, iy in hamon le tiri kandriyen ta batanau, eme ma iri Juwis nane are Damaskus badeh, aso-ok iy tinan labai. 13 Ya iy eme ales ere mirihik tek, ma iy asehek sahou eme tek i buku doh, ‘Sol, ou nadu tine ahi, na dah kameh ou winiyan anyolom kon ja.’ Sahou ano le bohon badeh, madak asak, ma jo anyolom iy amwenen.

14 “Iy asehek sahou eme tek i buku doh, ‘Kindrei ale mene, tubu taha iri atudun iy badeh, lebelei ou, ma aseken ou akohok tanan tiri lakou marakon iy aso-ok, ma iy aseken ou anyolom iy. Iy badeh, mwasin labai ta madan, ma ou winiyan anuhun iy asehek sahou na bohon amwenen. 15 Ma ou kameh a buku bohon ta tiye tiri lau mari ta saba lakou nane ou ndranyolom, ma ou ndranuhun. 16 Ma, na idah kameh ou sabe-en ja ai! Ou suri ou are loken, alomwa ou, ma ou aloh nyaran kasikine kandriyen tam ndra-in marakon ki-iu.’

Kindrei aloh Pol ili ta atiye sahou tan ili tiri lau badu leheleh

17 “Jo eme hamon eme Jerusalem ja, ma iu ili bolo asiu tinan ta Kindrei, jo asolom udu le badeh, jo amekes lele. 18 Eme ma jo anyolom Laban asehek sahou eme tek i buku doh, ‘Ou anuhun, na le dah, ou suri ou a-au ta Jerusalem. Ou suri ou suwi, tasah iri lau kameh winiyan banuhun ou bwe, buku ou asehek nyarak ili tiri.’

19 “Jo anya, ‘Laban, iri marakon ndratanan jo mwasin labai ta jo mene edek ili bolo asiu ta ndrahu tukum tiri Juwis, ra-em ili ra-em, ta apeu iri, ma adai iri lau ale atehei budon tiri in tam. 20 Udu bolo len mene iri adi lau tam ari nyaran Stiben, badeh, jo udu aliy ale, anyolom iri adai iy. Jo badeh, ere aliy ta atondrok awin tiri lau nane adai iy imek na bek. Ya, ta madak badeh, iri amekes kandriyen mwasin i tan.’

21 “Laban tiye jo anya, ‘Ou adek ai, tasah jo aso-ok ou kameh ala bolo iri kon leheleh, ta aseben iri lau leheleh, iri tanan kandriyen tiri Juwis bwe.’ ”

Pol amwenen badeh, badu Rom

22 Iri Juwis anuhun sahou ta Pol, arile iri anuhun iy asehek ja ta aseben iri lau badu leheleh, eme ma bwidi ndrine iri ibolosen, ma iri arah boto-on labai anya, “Iy sare kon munyak hawe taha! Kadi iy kimek ki-iu! Iy ndra-in labai, ma iy sado kon munyak dah!”

23 Iri arah, ma asehek sahou laleyah. Iri asini awin tiri udu bwele-e iri iu, iri akeh ili eme laleyah, ma iri akeh kasu-er ta ndren ili loken, atalan laleyah. Idoh leheya buku iri basekesek ta sahou Pol asehek nane bwe.

24 Tinan ta atondrok iri lau ta bahun nane tiye oro lau tan i buku doh, “Ado kandrei Pol keme bolo kowah hawe to. Ma ado ka-um iy na malou sakabuk i bek, winiya le iy baratiye ta saba lakou handru iy amekes, ma to kameh winiyan atanan kati kandriyen nane doh, tasah handru iri Juwis abadok ta adi iy anya kimek ki-iu?” 25 Eme ma iri lau ta bahun ame bawei Pol, ano iri anya ka-um iy ai. Arile, Pol badeh, ales ere mirihik ta ndramak tinan ta bahun ari, iy ta atondrok iri rayah ai. Eme Pol tiye i ta ndramak nane i buku doh, “Ou anuhun se, buku nyara ndramak udu bolo buk badu kon Rom, ya kandriyen ta batanau asehek i buku doh, iy kili ta mada sahou mwena op, ta seleya iy ndramak nane doh, bwidi kandriyen handru o bwe. Ya, i buku sah handru, na idah ja ado kameh anya ka-um jo laleyah?”

26 Ndramak tinan nane dah anuhun sahou ta Pol, ma iy ales amwenen ili hawe tinan ta atondrok iri lau ta bahun mara-ei. Iy asehek i ta tinan tiri i buku doh, “Ou abudon ma ou anuhun kamwenen op, ano ou baramekes saba lakou ndra-in barala tan, tasah nyaran badeh, ere bolo buk badu kon tato dah.”

27 Eme ma tinan ta atondrok iri lau ta bahun mara-ei doh, ili atou Pol, ma iy ndremenya Pol i buku doh, “Ou tiye tek, nyaram in bolo buk badu kon tahi dah handru?”

Eme Pol anya, “Ehe, jo asehek handru.”

28 Eme ma ndramak tinan nane dah anya, “Jo badeh, mene akeh luk solo-an labai ta adeu nyarak ili bolo buk badu Rom.”

Ma Pol anya, “Badeh, handru, arile tama uru tine badeh, nyara uru udu bolo buk badu Rom bwena labai, eme ma nyarak udu aliy ale.”

29 Eme ma oro lau ta bahun nane bawei Pol ma anya ka-um iy badeh, anuhun sahou doh ja, oro anoh ma oro tolowei iy. Tinan ta atondrok iri lau ta bahun mara-ei nane doh inoh ale, tasah iy badeh, tiye iri lau ta bahun ta bawei Pol na malou ma sen. Ya, iy tanan idoh ndrabun, ndrabun labai ta apeu ari ndramak laleyah, buku nyaran udu bolo buk badu Rom.

30 Na len ari ja badeh, tinan ta atondrok iri lau ta bahun mara-ei nane dah tolowei Pol, ma iy udu bolo kowah laleyah. Ma tinan tiri lau ta bahun mara-ei dah anya kasilah kati sahou doh ale, iri Juwis nane amekes ta adeu Pol i ta mada sahou. Eme ma iy atehei sahou ili tiri tinan tiri pris, ma hawe iri kansol mara-ei tiri Juwis, ta kame ta tukum doh. Ma iy andrei Pol ili atehei iy ales ere mada iri mara-ei.

Copyright information for `LID