Acts 6

Oro lau ma ndro taloh ta seben

Na len doh badeh, kane iri lau nane a-en hamon ta Jises ma atehei budon tiri handru i ta Kindrei i sola le ai. Eme ma iri Juwis nane asehek boho iri Grik badu bolo iri lau ta Kindrei badeh, tebelese hawe iri Juwis rayah nane asehek boho Aramek.
(6:1) Aramek badeh, boho kon tiri lau badu bolo kon munyak tinan Judiya hawe Galili. Boho kon doh, anya ki buku boho kon tiri Hiburu.
Iri Grik anya iri badih nyau tiri badeh, bakohok nyamon sola bwe.
Eme oro aposel ma ronoh la-uh ame luhi iri lau ta Kindrei ame, ma tiye i toro i buku doh, “Aha kanuhun, gok ta apou nyamon ma luk ili tiri mwan ma badih badeh, sokei gok taso, ma idoh badeh, bamwenen bwe. Gok taso handru badeh, ta atiye sahou ta Kindrei le kabwe. Ado nadu tine, ado badeh, kalebelei oro lau ma ndro taloh badu bolo ado. Oro lau doh badeh, kadah na Malawin Ndrabun hawe tanan ta aleben budon. Ya to kameh atehei lahou doh kameh i kani oro. Ya aso badeh, budon taso ki le ta salom ma katiye sahou ta Kindrei.”

Eme iri mari badeh, sekesek ta budon doh. Eme iri lebelei Stiben, ndramak idih na Malawin Ndrabun hawe ndramak ta budon handru; ale hawe Pilip, Prokorus, Nikanor, Timon, Parmenas, hawe Nikolas badu Antiyok. Iy mene badu Juwis bwe, arile udu ja, iy in hamon ta kandriyen tiri Juwis. Eme iri tiyani oro lau doh ala hawe oro aposel. Eme oro adeu nyosowan i la-u oro ma asolom oro.

Eme ya sahou ta nyala Kindrei badeh, aseker. Eme kane iri lau badu Jerusalem atehei budon tiri handru i ta Kindrei i sola suwi suwi. Ma iri pris solo-an badeh, anuhun sahou ma atehei budon handru.

Iri ateu Stiben

Stiben badeh, Kindrei nyosowani iy tinan labai, ma atehei boto-on i tan ta amekes kalem tinan hawe amekes lahou tinan, udu bolo iri lau. Arile, iri lau rayah suri iri badeh, andresei iy. Oro lau doh badeh, badu asiu ta atukum tiri Juwis, ya oro lau nane doh badu boho kamen iri aloh, “Kamen tiri salibah.”
(6:9) I boho Grik badeh, salibah doh moson i buku doh: Bwena mene oro ado bahandra iri lau ta atondrok oro buku bonyo-ou. Udu hamon ja badeh, iri ruwani oro ame len ta kandriyen ta bonyo-ou. Eme ma, na dah oro lau doh ado laleyah.
Ya, iri lau doh badeh, iri Juwis badu kon tinan Aleksandriya ya kon tinan Sairini. Oro rayah ja badeh, oro Juwis badu kon munyak tinan Silisiya hawe badu bada kon munyak tinan Esiya atukum hawe oro ta tebelese hawe Stiben.
10 Arile, Malawin Ndrabun badeh, edeu budon mwasin i ta Stiben asehek sahou, ya oro winiyan basehek sahou bala tan bwe.

11 Ano, oro tamarei lau rayah tiye boho oro anya, “Aso badeh, anuhun Stiben asehek sahou ndra-in i bada Moses hawe Kindrei.”

12 Eme oro mesekei ndrine iri lau hawe ndrine iri lau-en ma hawe iri Juwis ta leheya kandriyen malen towodau. Eme iri tawi Stiben ma tiyani iy ili hawe iri kansol. 13 Eme iri amekes budon laleyah ma iri wasai anya, “Iy lau doh badeh, asehek sahou ndra-in i bada kandriyen malen hawe kon ndrabun. 14 Aso badeh, anuhun iy tiye anya, ‘Idah kameh, Jises badu Nasaret kameh tokosei kon dah ma hawe tobolowe kandriyen tataha mene Moses edeu eme ta taha.’ ”

15 Eme oro manyah ado bolo oro kansol anyolom Stiben boto-on ma anyolom bwili Stiben anya i buku ari angelo.

Copyright information for `LID