Colossians 3

Krais badeh, kati koha taha handru

Ya, Kindrei badeh, ndratehei kohan ha-un ndrawek taha, ma iy ndramete-ei aha amak ndrame awas hawe Krais. Eme ma, aha badeh, kabadok ta akohok iri lakou badu kandrah doh. Ere kon doh, Krais badeh, udu buku kabin, ma Kindrei suruni nyaran iu ili loken mara-ei. Len marakon badeh, aha kabudon le lakou badu kandrah, ma kaso-ok iri lakou doh. Kora-on aha kabudon le ta iri kandriyen ndra-in mene iri mwan ma badih badu kon munyak a-en hamon ta aliy. Tasah, aha badeh, ba-en hamon ta kandriyen badu munyak buku bwena, bwe. Aha a buku lau ndramak bwena labai. Ma kohan ha-un doh aha ndrandrei hawe Krais, idoh iri mwan ma badih badu kon munyak winiyan batou bwe. Udu mirihik hawe Kindrei, ma aton ta mada iri. Krais le badeh, kati koha taha handru. Buku len hamon, iy asahan eme lewan, lau marakon winiyan anyolom iy amwenen, ma iri kameh anyolom aha ale are le lewan hawen, ma aha kameh, akohok lomada Kindrei doh.

Krais badeh, udu hawe taha ma taha asahan ha-un

(Kalan 3:5-–4:18)

Taha mara-ei asahan ha-un ja

Aha badeh, ndramak hawe Krais. Eme ma, aha winiyan ba-en hamon ta kandriyen ndra-in ja bwe. Aha badeh, kadai iri kandriyen mari badu kon munyak udu ndrine aha ki-iu. Jo asehek ta kandriyen buku: Kandriyen ta karei, ma kandriyen ta amadin hawe badih o mwan tasou, ma kandriyen ta kereyani ndrine ndramak ta amekes karei, ma kandriyen ta ndrakok. Idoh i buku aha atehei bwili ndru-u aha i andri ili ta kindrei, iri amekes na sukumada kei. Tasah, lakou badu kon munyak badeh, akohok kon ta Kindrei udu bolo koha aha ja. Aha samekes buku doh. Tasah, Kindrei kameh edeu ndramas ndra-in ili tiri mwan ma badih nane amekes iri kandriyen ndra-in buku doh, ma iri ba-en hamon ta sahou tan bwe. Bwena mene, aha ale ba-en hamon ta sahou ta Kindrei bwe, ma aha amekes iri kandriyen doh.

Arile, na dah badeh, aha karuwani iri kandriyen marakon doh: Aha sandra-i sala hawe iri lau rayah ja, ma samekes losen sasahan, o, ndrinem andra-i ili tiri mwan ma badih rayah ja. Ma aha sasondrokonya iri na sahou ndra-in.

Aha badeh, sawendreya iri mwan ma badih ta Kindrei. Tasah, ta koha aha, aha ndraruwani iri kandriyen marakon ta ndrine aha malen ndra-au. 10 Ma aha ndrasahan ha-un ja. Ya, Kindrei le amwenen mene bwidi ndrine aha asahan ha-un ja. Ma len mari, iy edeu tanan ewek taha, ma iy bwidi aha asahan ha-un, ma kone ndramak doh i buku le Kindrei amwenen. 11 Eme ma, taha lau marakon ndrasahan ha-un, taha marakon badeh, ari le. Taha sabudon ja buku taha badu Grik, o, badu Juwis, ma taha mene asan ku-i taha, o, taha basan ku-i taha bwe. Ma taha badu boho kon randrah, randrah, o, badu bada kon tinan rakon, rakon, o, taha ado buku bonyo-ou le, o, taha are laleyah. Tasah, Krais le ari udu aliy, ma Krais le amwenen badeh, udu bolo taha marakon.

Taha badeh, kakohok kandriyen ta aso-ok lau rayah ja

12 Aha badeh, lau ta Kindrei; iy aso-ok aha labai, ma iy ndrandrei aha ndrasahan iri lau tan amwenen. Eme ma, aha badeh, ka-en hamon ta kandriyen buku: Aha katikisi iri lau mwan ma badih marakon, ma kamekes mwasin kili tiri. Aha badeh, katehei so-ok ta bada aha ki-iu kili andri, ma amekes kandriyen kamunum le kili tiri mwan ma badih, ma kalelei iri kamekes ndra-in kewek taha. 13 Buku ari ndramak udu bolo ndrokowa aha, ndrinen andra-i udu ta nadu tinen ari ja, iy nane amekes ndra-in ili tan, mwasin ta iy kabwese maha-an doh le ai. Iy kati-iy ma kamani kandriyen ta ndramak nane doh. Tasah, Laban ndramani kandriyen ndra-in taha marakon, ya aha ale kamani kandriyen ndra-in ta nadu tine aha iri rayah ja. 14 Kandriyen ta aso-ok iri mwan ma badih badeh, ere bwele-en labai mara-ei ja tiri kandriyen rayah ja mene ndrasehek ndrawek taha. Ma iy badeh, atehei iri kandriyen mwasin marakon ili le winiyan, ma iy tawi ndrine aha mari i le se.

15 Krais badeh, ta amekes ndrine taha marakon amunum. Eme ma, aha badeh, katehei ndrine aha mwasin doh, kudu bwena taha ta lakou mari aha amekes. Tasah, Kindrei ndralebelei aha marakon ndra le tan. Eme ma aha kameh winiyan asahan bada aha ari le, ma aha kameh winiyan manyah are le se. Ma aha ale badeh, kadeu wurah kili ta Kindrei ta lakou marakon. 16 Sahou ta Krais badeh, kihis handru kudu bolo ndrine aha. Aha badeh, kaleheya, ma kabatanau aha kamwenen na tanan handru doh. Aha kayah wari ta Debit, ma iri wari rayah ja ta salom, ma iri wari Malawin Ndrabun atehei udu ndrine aha ta atudun Kindrei. 17 Lakou marakon aha amekes ma asehek badeh, aha kamekes ki-in bwele-e nyara Laban Jises, ma aha kadeu wurah kili tan, ma ta tama taha Kindrei.

Pol asehek nyala manyah tiri lau ta Kindrei

18 Ya, aha badih tasou, aha badeh, kanuhun boho udu aha iri, ma ka-en hamon tiri. Tasah, aha ta Laban ma kandriyen dah badeh, amwenen labai ta madan. 19 Ya, aha mwan tasou, aha badeh, kaso-ok udu aha iri, ma aha samekes ndrine iri sandra-i.

20 Ya, aha nah mwan ma badih, aha badeh, kanuhun boho tama aha ma tine aha iri ta lakou marakon. Laban badeh, aso-ok aha ka-en hamon tiri kandriyen buku doh. 21 Ya, aha tama iri nah, aha sasehek sahou boto-on ma ndra-in sala ta nadu aha iri, ta amekes ndrine iri kandra-i kewek taha. Bwe kameh iri atona buku, iri winiyan bamekes ari gok mwasin bwe.

Pol asehek ta iri lau ta gok ma iri lau ta atondrok iri

22 Ya, aha bonyo-ou, aha kanuhun boho ndramak taha ta atondrok aha. Kora-on aha abudon ta andrek iri, ma aha amekes gok mwasin labai na len iri are mirihik anyolom aha le. Aha badeh, katudun nyara Laban, ma na len mari aha kabudon le ta iri san ta amekes gok mwasin. 23 Lakou marakon aha amekes, aha badeh, kabadok ta amekes. Bala buku aha amekes gok tiri lau le bwe, aha badeh, amekes gok ta Laban ale. 24 Aha ndratanan, hamon kameh Laban edeu ndramas ewek taha. Ndramas doh badeh, iri lakou nane iy ndraleheyaniy ndrala tiri mwan ma badih tan amwenen. Aha kabudon, aha kado buku iri bonyo-ou ta Krais, ma iy le badeh, tinan handru taha. 25 Iri mwan o badih, amekes kandriyen ndra-in, iri kameh akohok ndramas in hamon ta kandriyen nane iri amekes. Kindrei badeh, aleben kandriyen tiri mwan ma badih marakon kasahan ari le.

Copyright information for `LID