aEksodus 20:12
bDutoronomi 5:16

Ephesians 6

Sahou tiri nah, ta tama, hawe tine iri

Ya, aha nadu ahi iri, aha kanuhun ma ka-en hamon ta boho tamam hawe tinem. Tasah, aha badeh, ahis hawe Laban ma idoh amwenen ta budon tan. Buk ndrabun asehek i buku doh,

“Ou a-en bahandra tamam uru tinem, ma ou anuhun sahou turu.” a 
Sahou doh badeh, batanau ta Kindrei, ma hawe tandrakan tan.
Ma tandrakan nane tiye i buku doh:

“Buku aha amekes i buku doh, aha kameh ado mwasin, ma aha kameh ado luluwen are kon munyak.” b 
Aha tama ma tine iri nah, aha sabolosen sala ta nadu aha iri, ma amekes ndrine iri ato-ou ta losen ewek taha. Aha katondrok iri kamwenen, ma kaleheya iri ta sahou ta Laban.

Sahou tiri lau bonyo-ou ma tinan tiri

Aha bonyo-ou badeh, kabudon iri tinan taha, ma ka-en hamon ta sahou tiri. Aha winiyan bawasai bwe. Aha ka-en hamon ta sahou tiri i le buku aha anuhun, ma a-en hamon ta sahou ta Krais. Kora-on aha amekes gok mwasin udu bolo len, iri ales ta anyolom aha ta andrek iri. Ma hamon iri banyolom aha bwe, aha kameh ajos ta gok. Aha badeh, kasahan buku bonyo-ou ta Krais, ma kamekes gok boto-on na len marakon. Ta kandriyen doh, aha kameh a-en hamon ta so-ok ta Kindrei ta ndrine aha. Ya, aha badeh, kasekesek le ta amekes gok doh, bala buku aha amekes gok tiri lau le bwe. Aha amekes gok doh ta Laban ale. Tasah, aha tanan, are mwan o badih amekes gok mwasin, ya Laban kameh edeu sihine iri. Iy kameh amekes ili tiri mwan ma badih bonyo-ou, ma ili tiri mwan ma badih rayah ale.

Aha lau tinan tiri lau bonyo-ou, aha ale kamekes kandriyen mwasin i buku doh kili tiri. Aha karuwani kandriyen ta sahou ndra-in, ma nohowa iri bonyo-ou mwan o badih. Tasah, aha ale tanan, Laban badeh, udu kandrah, ma iy Laban taha, ma tiri lau bonyo-ou ale, ma iy badeh, aleben kandriyen tiri mwan ma badih marakon ta kandriyen randra le.

Iri lau ta Kindrei kasahan buku iri lau ta bahun

10 Ya, sendrehendreh ta sohowa la-ukei dah i buku doh: Nyamu Laban badeh, kabadok boto-on kudu hawe aha. 11 Sahou sokek tek rayah i buku doh: Aha kasini iri nyasou marakon ta bahun, Kindrei nane edeu ewek taha, ma aha kameh winiyan ales boto-on ta mada iri sahou ta balik anya kamekes kewek taha. 12 Tasah? Taha badeh, bamekes bahun hawe iri lau le bwe. Taha badeh, amekes bahun hawe iri malawin ndra-in ere bolo kandrah. Ya, taha amekes bahun hawe iri kabin ma iri lau ta bwena, ma iri malawin ndra-in boto-on en, iri ale atondrok kandriyen ta lulik badu kon munyak dah. 13 Eme ma, aha kakohok iri nyasou marakon ta bahun nane Kindrei edeu ewek taha. Ma aha kameh winiyan banoh, ma batobwak ta bahun anya kasahan bwe. Aha kameh ales boto-on ere le buku doh.

14 Ya, aha badeh, kasin iri awin ta bahun doh kudu le ai: Sahou ta Kindrei handru badeh, i buku balaban aha apeu ndrukulu aha na aliy. Ma kandriyen mwasin aha a-en hamon ta aliy, idoh i buku awin kapa iri amekes na hayen, aha asin ta aturuk ade aha ta bahun. 15 Kandriyen ta atiye sahou mwasin ta Kindrei, ta iy anya kamekes mondrei hawe iri mwan ma badih, i buku aha asini ku-i kati aha ta adek ma amekes bahun. 16 Ya, na bolo iri len marakon, aha badeh, kabwese iri lakou doh hawe budon taha handru. Budon doh, i buku rasi sabar aha ndruniy udu kase aha. Na sabar le doh kameh, aha winiyan semete-ei jih ta nyah ta balik. 17 Kindrei andrei aha ndrame hamon. Eme ma, budon doh aha katehei buku barak iri amekes na hayen ta tubuloh bwisi batu aha. Ma aha kakohok iri sahou ta Malawin Mwasin ta Kindrei nane edeu ewek taha. Sahou doh kameh asahan i buku samen kasoh madan madan labai, aha kandrei kudu mine aha ta asan iri sahou ta bahun. 18 Iri lakou doh, aha kamekes hawe salom, ma kandremenya Kindrei ta aseben aha. Aha badeh, kasolom ta iri lakou marakon aha amekes, na boto-on ta Malawin Ndrabun. Ma aha ale katehei ndrokei kamwenen labai, ma aha winiyan bajos bwe. Len marakon aha kasolom ta aseben iri mwan ma badih ta Kindrei. 19 Ma aha kasolom ta aseben jo ale. Jo aso-ok aha kasolom ki buku doh: Kindrei katehei sahou keme bohok, ma jo sanoh ta atiye sahou dah, ta sahou mwasin mene Kindrei tone tiri mwan ma badih. 20 Jo ndramak ta atiye sahou mwasin dah, ma ta idah le jo ili udu bolo asiu lulik. Kindrei atehei jo, ma jo amekes gok ta atiye sahou tan. Eme ma, aha kasolom kili ta Kindrei, ta jo kameh winiyan banoh ta atiye sahou mwasin dah bwe.

Pol ndremenya Kindrei kanyosowani iri

21 Tikikus kameh barasehek nyala aha ta iri gok marakon jo amekes. Tikikus badeh, iy nadu tine taha ari handru, ma iy ndramak ari mwasin ta amekes lahou ta Laban. Jo badeh, aso-ok iy labai. 22 Na dah, jo suni iy ta ewek hawe aha, ma aha kameh winiyan atanan ta manyah tahi, ma iy kameh winiyan atadau ndrine aha.

23 Jo aso-ok tama taha Kindrei hawe Laban Jises Krais, uru kamekes ndrine aha nadu tine marakon kamunum. Ma kaseben aha ta aso-ok iri mwan ma badih rayah ja, ma katadau budon taha kabadok kudu turu amwenen. 24 Jo aso-ok Kindrei kamekes kandriyen mwasin kili tiri mwan ma badih nane baruwani kandriyen ta aso-ok handru, Laban tataha Jises Krais.

Copyright information for `LID