Galatians 6

Ado badeh kabwese maha-an tado ari ari

Aha nadu tine mwan ma badih, ki buku none aha ari kamekes kandriyen ndra-in, aha are an hamon ta Malawin Ndrabun badeh, kaleheya iy kasahan ta budon mwasin i san ta manamun; arile, bale aha ale ki-in taha, kora-on aha kataku ja. Aha badeh, kabwese maha-an ta nadu tine aha ari ja. Ya i buku none aha kamekes kandriyen doh, aha an hamon ta kandriyen ta Krais. I buku none ari ndramak anya kasakau anya, iy le ai, iy le amwenen kameh wendreyani iy. Ndramak ari ari kanyolom kandriyen tan kamwenen labai. Ya, i buku none kandriyen tan mwasin, iy le kasekesek ta lakou mwasin nane, iy amekes. Ya, iy sanyolom iy sala ta lakou, ndramak ari ja amekes. Tasah, ndramak ari ari kameh, bwese maha-an ta kandriyen tan amwenen.

Are lau akohok tanan ta ndramak ta leheya iy na sahou ta Krais, mwasin ta iy kaseben ndramak ta leheya tan na lakou mwasin tan.

Aha sawasai aha le; ma aha sabudon anya, aha winiyan wahei Kindrei, ndri-iy labai. Tasah, ndramak ari ari kameh, bwese maha-an tan amwenen in hamon ta lakou iy amekes. Idoh handru, tasah taha tanan, saba nyamon taha atah kameh, taha akohok sali nyamon doh amwenen. Are lau anya ki-in hamon ta kandriyen ndra-in badu badan, iy kameh akohok kunoh ma imek ta aliy; arile, are lau anya ki-in hamon ta Malawin Mwasin ta Kindrei, ma amekes iri kandriyen mwasin le, eme ma Malawin Mwasin le kameh winiyan edeu kohan handru ta udu le buku doh. Eme ya, taha sawoyah ta amekes kandriyen mwasin; ya, i buku none taha baruwaniy bwe, badeh kameh, taha akohok ndramas ta aliy na len hamon. Idoh i buku ndramak ta bilin akohok sali nyamon ta lahou boto-on mene iy amekes. 10 Eme ma, na madasan mari Kindrei sihiy, taha kamekes kandriyen mwasin ki ta lau mari. Arile, ma hutuwen badeh, i toro lau ta Kindrei le, ala budon toro ihis handru.

Sendrehendreh ta sahou batanau hawe sahou sekesek

11 La-ukei dah mirihik ano ai. Aha ndranyolom tarou laba tinan jo atorou na minek amwenen aleu ewek taha. Jo aseken aha kanyolom ma kanuhun kamwenen sendrehendreh ta sahou batanau jo amwenen atorou ewek taha dah! 12 Iri lau doh badeh, abadok labai ta asan ku-i aha, iri kameh amekes i buku doh, tasah iri aso-ok nyara iri kasahan ki tinan ta ndranye iri, ma mada iri lau rayah ja. Iri ale badeh, anoh ma abudon i buku doh, “Kora-on iri lau rayah ja katanan, buku to badeh, atehei budon tato mara-ei in ta kei tondreh ta Krais, ma kora-on iri anya kamekes ndra-in keme tato.” 13 Handru, iri asan ku-i iri; arile iri ba-en hamon handru ta batanau malen bwe. Ya iri anya, aha kasan ku-i aha, ta amekes anya iri le ai, tasah aha badeh, ndra-en hamon ta budon tiri. 14 Arile, jo le, jo winiyan batudun nyarak o nyara ndramak ari ja bwe. Jo kamasiye kei tondreh ta Laban tataha Jises Krais le. Tasah iy le imek udu bada kei tondreh tan. Ya, na lahou iy amekes doh, boto-on tiri kandriyen mari badu munyak badeh, ndramak ale udu budon tek. Ya, idoh ale, i buku jo imek udu bada kei tondreh hawen, eme ma jo winiyan ba-en hamon ta kandriyen badu munyak ja bwe. 15 Eme nadah, ari katin bwe, ki buku none asan ku-i taha, o, i buku none basan bwe; arile katin handru i buku doh: Ta ndramak badeh, kasahan ha-un. 16 Ya, are lau oro an hamon ta kandriyen doh, mondrei ma tikisiy kudu hawe oro mara-ei. Oro le badeh, Isra-el handru ta Kindrei.

17 Ya ta sendrehendreh ta aliy i buku doh: Ari ndramak badeh, sadeu jo sala bolo maha-an ma sisi-in ja, tasah jo bwese ndrana udu badak dah ta leheya jo badeh, lohowan ta Jises.

18 Ya eme aha nadu tine mwan ma badih, tikisiy ta Laban Jises Krais kudu hawe malawi aha mari. Handru!

Copyright information for `LID