Genesis 11

Bokok Asiu Badu Babilon

Ma mwena handru badeh lau badu munyak badeh asehek boho kon randra le. Eme iri badeh adek ala ame loboho an eme loken, eme iri ame Babilon ma ado aliy ado ai. Ano badeh iri lelen iri ari ari, “Ado kame! Ya to kapon ndren ma kamwekes kabadok.” Eme iri asun ndren i bek ano iri amwekes alis i ta bek ta kasabata-an ki se. eme iri anya, “Taha kamwekes asiu bokok kudu bolo kon dah ki loken bolo asi kandrah, eme ma to kasore nyara to ma to badeh saseker sala bolo munyak mari.”

Eme badeh Laban eme andri bolo kon nane doh ma anyolom asiu nane iri atah ma atudun dah. Ano ma iy anya, “Iri lau dah badeh iri rabuk le, ma iri asehek sahou randra le; I dah ma mwena ai, ta iri amwekes lakou dah. Mirihik kameh iri amwekes lakou leleyah na seken tiri ai. To ka-au ka andri, katubuni boho kon tiri, eme ya iri sanuhun sahou tiri ari ari.” Eme badeh Laban sekerei iri badeh winiya munyak mari, ma iri ruwani asiu bokok ma iri batah bwe ai. Kon tinan nane doh nyaran Babilon, tasah Kindrei badeh tubuni boho kon tiri lau mari ma kabatana doh badeh iri lau aseker ma weleyani kon munyak mari.

Lundriye Sem Oro

10 Ya i dah badeh lundriye Sem oro. Hamon ta kon atuh ya jaha la-uh ano badeh Sem badeh jaha tan asahan rawa (100), eme badeh nadun ari asahan nyaran Apaset. 11 Hamon ta aliy badeh iy udu winiya jaha lemenek (500) ma hawe nadun rayah ale udu aliy.

12 Ya na len Apaset jaha tan asahan tonoh limeh (35) eme nadun ari asahan nyaran Silah. 13 Hamon ta aliy badeh iy udu winiya jaha hanek taloh (403) ma iy atehei nadun rayah udu aliy.

14 Eme Silah jaha tan asahan tonoh (30) badeh eme iy atehei nadun ari nyaran Eba. 15 Hamon ta aliy iy udu winiya jaha hanek taloh (403) ma atehei nadun rayah ale.

16 Ano len Eba jaha tan asahan tonoh hahuw (34) badeh iy atehei nadun ari nyaran Pelek. 17 Ano hamon ta aliy badeh iy udu winiya jaha hanek tonoh (430) ma atehei nadun rayah ale udu aliy.

18 Ano len Pelek jaha tan asahan tonoh (30) badeh iy atehei nadun ari nyaran Reu. 19 Ano hamon ta aliy badeh iy udu winiya jaha lunek ndro ari (209) ma iy atehei nadun rayah ale udu aliy. 20 Ano len Reu jaha tan asahan tonoh la-uh (32) badeh iy atehei nadun ari nyaran Serak. 21 Eme hamon ta aliy badeh iy udu winiya jaha lunek ndro taloh (207) ma iy atehei nadun rayah ale udu aliy.

22 Ano na len Serak jaha tan asahan tonoh (30) badeh iy atehei nadun ari nyaran Nahor. 23 Ano hamon ta aliy badeh iy udu winiya jaha lunek (200) ma iy tuwi nadun rayah udu aliy ale.

24 Ano na len Nahor jaha tan asahan lunoh ndro ari (29) badeh iy atehei nadun ari nyaran Tera. 25 Ano hamon ta aliy badeh iy udu winiya jaha rinek ronoh ndro ari (119) ma tuwi nadun rayah ale udu aliy.

26 Ano hamon ta Tera jaha tan asahan ndro tonoh (70) badeh iy atehei Abram atehei Nahor ma hawe Haran.

Lundriye Tera Oro

27 I dah lundriye Tera oro, iy ala tama Abram tama Nahor hawe Haran. Haran badeh tama Lot. 28 Eme Haran badeh imek udu kon tan amwenen udu Ur udu Babilon. Ya taman badeh bamak bwe iy udu le. 29 Ano Abram sudi Sarai i tan ma Nahor sudi nadu Haran badih nyaran Milkah. Ya Haran badeh tama Iska. 30 Sarai badeh bato-ou nah bwe, iy badeh kis.

31 Tera kuhi nadun Abram hawe udun Sarai ma hawe nadu tubun Lot, iu ndrine Haran. Eme ma oro au ame len ta kon tinan Ur udu bolo Babilon ma au ala munyak Kenan. Eme oro ala asos Haran ma ado aliy ai. 32 Eme Tera imek udu aliy ya jaha tan badeh lunek limeh (205).

Copyright information for `LID