Genesis 15

Kindrei Amwekes Sahou Randra Le Hawe Abram

Ano hamon ja badeh lele asahan ta Abram, eme iy anuhun Laban tiye i tan, “Abram, ou sanoh! Jo kameh i turuk tam ma jo kameh edeu nyosowan tinan labai i tam.” Arile Abram anya eh, “O Laban Kindrei, jo kada-ah nah bwe, ya saba lakou mwasin kameh ou kameh atehei eme la-uk? Lau ta atondrok lakou tek badeh Eliyesar badu Damaskus. Ou badeh badeu tek rayah nah bwe, eme i dah kameh lau ari badu bolo oro lohowan tek kameh atondrok lakou mari tek ai.” Ano iy anuhun Laban tiye tan ja, “Eliyesar lohowan tam badeh kameh batondrok lakou tam bwe, i dah kameh nadum amwenen kameh atondrok.” Eme Laban kuhi iy eme manan ma tiye, “Ou anyolom ki loke bada kandrah ya none ou ondrek ndrau se, ou kameh lundriyem oro kameh i solo-a ndrau don.”

Eme badeh Abram atehei budon tan handru in ta Laban, tasah ta katin doh badeh Laban sekesek ma aseken iy ma aloh iy mwasin labai tan.

Ano Laban anya eh, “Jo badeh Laban, jo le badeh kuhi ou ado Ur udu Babilon ame len, ya jo badeh edeu munyak dah i tam.”

Eme Abram ndremenya, “Laban Kindrei, i buku sah jo ki tanan i dah munyak tek amwenen.”

Eme Kindrei anya eh, “Ou andrei ari bulumakau, ari rem ma hawe ari me jaha taloh ma hawe ari ban hawe ari ku.” 10 Eme Abram andrei oro katin haka ma taloh, ma taloh sirih dah i mada Kindrei. Eme sapwai katin haka dah i lusi, eme tulusi atehei in bilisiu ya tulusi atehei in bilisiu, arile sirih le badeh iy bapwai bala lusi bwe. 11 Eme iri manyuwe atah ame andri badeh anya kaimon, arile Abram tikahei iri au.

12 Eme an anya ki-iu ki andri badeh, Abram amadin tuk, ya lulik ma nohowan eme la-un. 13 Eme Laban tiye i tan, “Lundriyem oro kameh a buku lau badu leheleh ado munyak len labai; oro kameh a bonyo-ou udu gwek ma i dah kameh maha ndra-in handru i la-u oro winiya jaha hanek (400). 14 Ya jo badeh kameh edeu maha ma isi i ta kon heh iri are bonyo-ou tiri. Ano buku none iri ame len ta kon doh kameh, iri kameh kuhi lakou mari eme hawe iri. 15 Ou kameh ado alon winiyan isi basahan tam bwe winiya ou le barala lek hawe tamam oro. 16 I dah kameh lau rebesem au, ano rebesem au, ano rebesem au, ano rebesem au. Ano lundriyem oro barame dah ja ai. Tasah jo kameh winiyan batikahei iri Amora ba-au bwe, winiya kandriyen ndra-in tiri i tinan labai, ano jo baramwekes maha ma isi barala tiri ai.”

17 Ano len an amai ano kon ilik badeh kasu-er ma jih anya ma seselek, ma hawe sun anya asahan, ma edek ndrokowa katin haka dah. 18 Ano ma kabatana doh badeh, Laban amwekes sahou randra le hawe Abram, ano Kindrei tiye, “Jo badeh tandrakan ta edeu munyak i ta lundriyem oro badeh, kobek tan badeh udu Ijip ili taku gwa Yupretis, 19 hawe munyak tiri Keni, ma munyak tiri Kenis ma munyak tiri Kadmon, 20 ma munyak Hita ma munyak tiri Perisa ma munyak tiri Repa-im, 21 ma munyak Amora, ma munyak tiri Kenan, ma munyak tiri Gigasa ma hawe munyak tiri Jebus badeh ta lundriyem oro.”

Copyright information for `LID