Genesis 27

Aisik Edeu Nyosowan I Ta Jekop

Ano len Aisik i alon handru ma boto-on tan ano badeh, madan agwah ma iy winiyan banyolom kon bwe, eme iy aloh i ta nadun kadok Iso, eme iy tiye tan, “Naduk.” Eme iy anya, “Jo kada-ah.”

Eme Aisik tiye, “Jo kada-ah badeh ndra alon ai, jo bala tanan len ta imek tek bwe. Ou andrei bonara ma nyah tam ma ou a lokei adai ari katin haka ndriliu keme. Ou juhi nyamon simidin badeh ma ou tiyani keme, eme ya jo udu ndra loken kahis le, jo katehei nyosowan ki tam.”

Ya Rebeka badeh ndranuhun sahou nane Aisik asehek i ta nadun Iso. Eme Iso iu ili lokei orou katin haka badeh, Rebeka tiye i ta nadun Jekop, “Jo badeh anuhun tamam tiye i ta nadu tinem Iso anya, iy badeh kidi ari katin haka ano iy kajuhiy nyamon simidin badeh kili nan iy kaimon, eme ya udu mada Laban badeh iy katehei nyosowan ki tan, koro-an iy kimek. Eme ya, naduk Jekop ou anuhun kamwe-es, ma ou an hamon ta sahou tek jo asehek tam dah: Ou ala kuhi me kasen la-uh keme ya jo kajuhiy ma kamwesekei ki simidin kamwenen ta seken ta tamam. 10 Ano badeh ou andrei ki na tamam kaimon, ndrakan iy in ndra loken le, eme iy katehei nyosowan kewek tam.”

11 Eme Jekop tiye i ta tinen Rebeka, “Arile nadu tine Iso badeh lamin solo-an ya jo badeh badak lamin bwe. 12 Ya i buku none tama kanyokar badak kameh, i dah kameh iy anya jo wasai, ma iy kameh madan andra-i tek ma jo kameh winiyan bakohok nyosowan bwe.”

13 Eme badeh tinen tiye i tan, “Naduk, ou anuhun le jo, ou ala andrei me keme, losen tam badeh kameh jo ato-ou.”

14 Eme iy ili andrei eme badeh atehei i mine tinen, eme iy juhiy nyamon i simidin, amwenen le ta seken ta taman Aisik. 15 Ano badeh Rebeka andrei awin ta kadok tan udu bolo asiu eme, atehei i la-u bwaneh tan Jekop. 16 Ano iy andrei ku-i me asiniy i bohan ma balen. 17 Ano iy atehei nyamon simidin nane dah i mine Jekop ma jabi ramen nane lowosani dah.

18 Eme iy ili hawe taman badeh iy anya, “Tama.”

Eme taman anya, “Abo naduk, Ou are badeh?”

19 Eme Jekop anya, “Jo tama jo kadok tam, lakou ou nane tiye jo ndramwesekei ai, ou suri ou ma ou aimon katin haka tek, eme ya ou adeu nyosowan keme la-uk.”

20 Eme Aisik anya, “Naduk ou takalahei suwi i buku sah?”

Eme iy tiye, “Laban Kindrei badeh atehei len mwasin tek.”

21 Ano Aisik tiye i tan, “Naduk, ou ame mirihik ya jo kanyokar badam, ou badeh naduk Iso handru de bwe.”

22 Eme Jekop i hawe taman Aisik, ano Aisik anyokar iy eme Aisik anya, “Ei, nyaro balen i buku none Jekop arile bohan badeh boha Iso.” 23 Iy bala tanan iy bala mwasin bwe, tasah lami bohan badeh i buku none nadu tinen Iso; eme badeh iy atehei nyosowan i tan. 24 Eme Aisik ndremenya, “Ou dah naduk Iso handru?” Eme iy anya, “Ehe, jo handru.”

25 Ano Aisik anya, “Naduk ou tiyani katin haka ndrajuhiy keme jo kaimon, eme ya jo kedeu nyosowan ki tam.” Eme Jekop bwese-ei ili iy aimon; ano iy andrei wa-in ili ma iy a-un le. 26 Ano Taman Aisik anya, “Ou ame dah ma ou atamas jo.”

27 Eme iy ili badeh atamas iy. Eme Aisik ihon mahu awin tan badeh, ma iy atehei nyosowan i tan ma tiye, “Mahu naduk badeh i buku none kanyeu badu bilin. Laban atehei nyosowan i ta aliy. 28 Ya Kindrei atehei tam rahu badu kandrah, ma munyak ki mwasin. Iy badeh kedeu tam kalom ma wa-in solo-an. 29 Ya iri kon munyak tinan badeh katudun ou, ma iri lau kaluh ki tam, ma ou atondrok nadu tinem oro, ma nah badu ndrine tinem oro kaluh ki tam. Ya oro are amwekes maha i tam badeh kakohok isi ma oro are adeu nyosowan i tam kameh akohok nyosowan ale.”

Iso Andres Ta Nyosowan Udu Ta Aisik

30 Aisik atehei nyosowan i la-u Jekop ano badeh Jekop iu i len ta taman le badeh, nadu tinen Iso udu lokei eme. 31 Eme iy juhiy nyamon simidin ma bwese-ei i na taman. Ano badeh iy tiye i ta taman, “Tama, ou suri ou ma ou aimon katin haka, eme ya ou atehei nyosowan tam keme la-uk.”

32 Eme badeh taman ndremenya Iso, “Ou are dah?”

Eme iy anya, “Jo kadok tam Iso.”

33 Eme Aisik totoreh ma iy anya, “Are lau nane andrei katin haka nane tiyani eme dah? Jo baraimon barano ai, ou bame bwe le, eme jo ndratehei nyosowan ndra la-un ma i dah kameh erah ai.”

34 Eme Iso anuhun boho taman badeh, iy tabaniy bohon i ta ndrelen. Eme iy anya, “Tama jo ale, jo ale ou atehei nyosowan ki la-uk!”

35 Arile taman tiye, “Nadu tinem eme wendreyani jo ma iy ndrandrei nyosowan ndra la-un.”

36 Ano Iso anya, “Iy Jekop doh? Iy ndra bukuhiy no-ok san la-uh ai: iy asahan kadok ano na dah ja badeh, iy andrei nyosowan tek?” Ano iy ndremenya, “Nyosowan rayah ou tawiy udu kede-eh tek de bwe?”

37 Eme Aisik tiye i ta Iso, “Jo badeh atehei Jekop atondrok ou ma mwesekei lowan oro badeh asahan lau ta lahou tan. Ma jo badeh ndratehei kalom hawe wa-in ndra tan. Saba lakou udu kede-eh ja kameh jo kedeu tam, naduk?”

38 Eme Iso tiye i ta taman, “Tama ou ari udu kede-eh, ou nyosowani keme tek. Ou nyosowani jo ale!” Ano ma iy eden bohon i loken.

39 Eme badeh taman Aisik tiye i tan,

“Manyah tam kameh udu len labai ta lakou mari badu munyak,
Rahu badu kandrah kameh bawek tam bwe
Ma munyak tam kameh mada lihin bwe.
40 Ou kameh manyah na boto-on ta beteleu,
Ma ou kameh asahan bonyo-ou ta nadu tinem.
Arile i buku none ou a bolosen badeh kameh
Ou kameh atobwak ta are baha tondrok tan.”
41 Iso badeh bwalen atou Jekop handru en, tasah taman badeh ndratehei nyosowan ndra la-un. Eme iy lomondra le udu tan, “Len ta tama badeh ndrame bakep; ano badeh jo kameh idi Jekop imek.”

42 Eme len Rebeka, anuhun lau tiye boho nadun kadok Iso badeh, iy suni lau tiye Jekop eme ma iy tiye, “Nadu tinem Iso badeh ndrasehek ta anya kidi ou amak. 43 Eme badeh naduk ou anuhun bohok: ou badeh atobwak ala hawe nadu tine Leban udu kon Haran. 44 Ou ala ado gwek winiya ndrine nadu tinem kamwunum, 45 ma ndra iy kamani sasah ou mine amwekes i badan. Ano jo barasuni lau barawek barakohok ou barame hamon. Bwe kameh ah ma la-uh kamak ai!”

Aisik Tiye Jekop Iu I Hawe Leban

46 Ano badeh Rebeka tiye ta Aisik, “Jo ndrawoyah ta udu Iso badu Hita kede-eh. I buku none Jekop kasudi ari badih ki buku doh jo kameh imek.”

Copyright information for `LID