Genesis 29

Jekop Isos Padan Aram

Ano Jekop edek ili badeh, asahan munyak tiri lau badu an eme loken. Eme iy eme badeh atou gwa li ari badeh udu manan ma oro sipsip tulumuk manyah ado andri awudiy. Iri katin haka badeh a-un le gwa doh, gwa doh badeh bek malahan badeh turuki madan. I buku none len iri katin haka ame, badeh kameh iri lau ta tondrok katin haka kameh suri madan iu, ano iri a-us wa-i iri gwa. Ano ja kameh iri tundruwi bek ta madan i hamon i bwele-en.

Eme Jekop badeh lelen oro lau ta tondrok katin haka, “Ado nadu tine ado badu heh?” Eme oro anya, “Aso badu Haran.”

Eme iy tiye, “Ado tanan Leban, iy ala nadu tubu Nahor en?”

Eme oro anya, “Ehe, aso tanan iy.”

Ano Jekop ndremenya, “Iy mwasin de bwe?”

Eme oro anya, “Ehe iy udu mwasin, ya nadun Rejel asa ma sipsip tan eme ah.”

Eme Jekop anya, “Ado kanyolom an udu ndra loken kahis; iri katin haka winiyan bame se bwe le kahis. Ado ka-us gwa ki toro sipsip ma ado kasariye oro ka hamon ta bwidiu ja.”

Eme oro tiye, “Aso winiyan bwe, winiya oro sipsip kase ya katukumwi bek ta madan ki-iu ta mada gwa. Ano badeh aso bara-us gwa barala tiri sipsip.”

Eme iy asehek sahou i toro kahis le badeh, Rejel ma sipsip ta taman oro ame. Iy badih ta atondrok sipsip le. 10 Eme Jekop anyolom ili badeh atou Rejel ma sipsip ta kalin Leban eme. Eme iy ili badeh atuwi bek ta mada gwa iu ma a-us gwa i wa-i sipsip ta kalin oro. 11 Ano badeh Jekop tawi Rejel badeh ma iy tabani bohon i ta ndrelen. 12 Eme iy asehek nyala Rejel ta iy badeh nadu Rebeka lowa taman ari ai. Ano Rejel sakaliye ili kon badeh tiye ta taman.

13 Eme iy anuhun le badeh, i doh kalin, nadu nadu tinen, eme iy ibotatahan ili atou iy. Eme iy tawi iy ma iy sekesek iy ano badeh iy kuhi iy ma uru au ala asiu. Eme Jekop asehek nyalan ta lakou mari.

14 Ano badeh Leban tiye tan, “Ou badeh to rabuk amwenen.”

Jekop Sudi Liya Hawe Rejel

Jekop badeh udu hawen badeh bun ari,
15 eme badeh Leban tiye i ta Jekop, “Ou kede-ek lowak, eme ou badeh sabudon anya i dah kameh ou amwekes lahou tek leleyah bwe? Ou tiye tek, sihinem badeh na sasah handru.”

16 Leban badeh nadun badih, badeh la-uh, iy aluh badeh nyaran Liya ya iy sah badeh nyaran Rejel. 17 Liya badeh madan mwasin, arile Rejel badeh konen labai, i buku tariye ka-ukon. 18 Ya Jekop badeh aseken Rejel labai, eme iy anya, “Jo kameh ibo gok tam jaha ndro taloh ta sah tam Rejel.”

19 Eme Leban anya, “Mwasin handru ta Rejel badeh ki tam, jo bwalek iy i ta ari lau buku liliy. Ou ado hawek ado.” 20 Eme Jekop badeh amwekes lahou ta Leban jaha ma ndro taloh ta akohok Rejel. Iy amwekes lahou boto-on ya eme jaha ndro taloh doh badeh i buku none len la-uh le, tasah iy aseken Rejel labai.

21 Ano Jekop tiye i ta Leban, “Kabwe ai, len ndrano ai, ya uduk keme ya jo kamadin iy.”

22 Eme Leban nyuruwini iri lau mari badu kon ame ma iri amwekes tine nyamon. 23 Arile kon eben badeh iy atehei nadun Liya badeh ili hawe Jekop ma uru amadin uru. 24 Ma Leban atehei badih ari nyaran Silpah badeh i badih ta lahou ta Liya.

25 Kon anya kaleu badeh Rejel bwe, Liya. Eme Jekop tiye ta Leban, “Ou amwekes sasah eme tek dah? Jo amwekes lahou tam badeh ta Rejel labai? Ou wasai jo ta sasah?”

26 Eme Leban anya, “Kandriyen tahi badu dah badeh i bahan winiyan bala tasou bwena ta iy bwele-en bwe. 27 Ou abe-en len ta molak sandre ari kano op, ano Rejel barawek. Arile, ou amwekes lahou tek jaha ndro taloh ja.” 28 Eme Jekop mwesekei i buku le aliy. Eme iy udu hawe Liya badeh sandre ari ano badeh iy atehei Rejel i udun ja. 29 Ano Leban badeh atehei badih ta lahou ari i nyara badih ta lahou ta Rejel, nyaran badeh Bilhah. 30 Eme Jekop badeh amadin Rejel ale, ma iy aseken iy labai ja ta Liya. Eme iy amwekes lahou ta Leban jaha ma ndro taloh ta Rejel.

Nadu Jekop Oro

31 Na len Laban anyolom Jekop badeh baseken Liya handru bwe, iy mwesekei iy badeh ato-ou nah ja. Arile Rejel badeh iy kis. 32 Eme Liya ndrinen i tinan eme badeh iy atehei kadok tondrohani nyaran Ruben. Eme iy anya, “Laban badeh ndratou maha-an tek ma i dah kameh uduk aseken jo ai.”

33 Ano ja badeh ndrinen i tinan ja ma iy tuwi nah mwan, tondrohani nyaran badeh Simiyon. Eme iy anya, “Laban badeh anyolom Jekop baseken jo bwe, eme iy atehei tek nah ja dah.”

34 Ano ja badeh ndrinen i tinan ja, iy tuwi nah mwan ja ma tondrohani nyaran Lebi. Eme iy anya, “I dah kameh uduk kameh budon tan abadok tek, tasah jo badeh atehei nah mwan taloh i tan.”

35 Ano ja badeh ndrinen i tinan ja badeh iy tuwi nah mwan ari ja, eme iy tondrohani nyaran badeh, Juda. Eme iy anya, “Na len dah kameh jo kameh atudun Laban.” Ano badeh iy ano ta ato-ou nah.

Copyright information for `LID