Genesis 33

Jekop Asahan Hawe Iso

Jekop anyolom ili badeh iy atou Iso hawe lau tan ma hanek (400) badeh adek ame; eme iy eme andromwoi oro nah i le winiya Liya uru Rejel hawe uru badih turu ta lahou turu. Eme iy atehei nadun oro rayah ado hawe uru badih ta lahou tan ma la-uh ado bwena. Ano badeh Liya hawe oro nah rayah are hamon toro ano badeh udu hamon toro badeh iy atehei Rejel uru Josep ado hamon. Jekop le udu bwena, eme iy aluh i andri bada munyak san ndro taloh udu mada Iso.

Arile Iso sakaliye ili badeh tawi Jekop ma atamas iy, eme ma uru aden. Ano mada Iso i loke badeh anyolom badih hawe iri nah. Eme iy ndremenya, “Are oro are hamon ame dah?” Eme Jekop anya, “Oro doh badeh Kindrei tikisiy jo eme iy atehei eme tek.”

Ano badeh uru badih ta lahou ma hawe nadu oro ame mirihik ma oro aluh a andri. Ano ja Liya hawe nadun oro ame ja aluh a andri ale. Ano udu hamon handru badeh Rejel uru nadun Josep am ma uru ale aluh a andri.

Eme badeh Iso ndremenya, “Oro lau jo ndrondron oro mene, moson i buku sah?” Eme badeh Jekop anya, “Badeh ta anya kanuhun ou sekesek tek de bwe.” Arile Iso tiye, “Nadu tine, jo badeh lakou tek solo-an labai udu aliy. Kudu gwek tam ai.”

10 Arile Jekop tiye, “Bwe ai, i buku none ou ndraseken jo badeh, ou andrei. Jo badeh sekesek ta atou madam badeh i buku none jo sekesek ta atou Kindrei, ou badeh amwekes kandriyen mwasin ma ou ndraseken. 11 Abo, ou andrei lakou tek jo andrei eme hawem dah; Kindrei badeh tikisiy jo labai, eme iy badeh atehei lakou mari dah eme tek.” Jekop eme andresei iy, andresei iy ma iy andrei.

12 Ano Iso tiye, “Jo ki hawem ma talu ma la-uh ka-au.”

13 Eme Jekop tiye, “Ou tanam oro nah badeh babadok bwe le, eme ya jo badeh katondrok iri sipsip hawe iri bulumakau ma nadu iri bwisik. Ya ki buku none iri adek na len ari buruwen kameh ma iri kamak. 14 Abo, ou adek a bwena tek, ya jo badeh kedek kamunum ki-in hamon. Jo kameh edek amunum hawe oro bulumakau ma hawe oro nah, winiya le jo le barateu ado barado Se-ir.”

15 Eme Iso anya, “Abo, lau tek rayah kado hawem kado.”

Eme Jekop anya, “Ou anya amwekes badeh ta sasah? I doh nane jo anya kanuhun le seken tam.”

16 Eme na len doh le badeh Iso, iu ili Se-ir. 17 Arile Jekop badeh ili Sukot ma iy tahi asiu tan hawe tahi mandron rayah tiri katin haka tan. Eme nyara kon Sukot badeh, moson, “Mandron,” badeh asahan kabatana doh.

18 Jekop udu Padan Aram, eme asahan mwasin le eme kon tinan Sekem udu Kenan, eme atehei ndrahu manyah tan udu rai mirihik ta kon tinan. 19 Iy sihinei munyak doh badeh ta lundriye Hamor, tama Sekem na su-ubek kanen i winiya rinek silba boroh. 20 Ano iy tukumwi bek ta salom ma aloh “El Elohe Isra-el,” moson, “Kindrei tahi Isra-el.”

Copyright information for `LID