Genesis 35

Jekop Eme Hamon Eme Betel

Ano badeh Kindrei tiye ta Jekop, “Ou au ala atah asiu ma atukum bek ki loke ta salom ki ta Kindrei kudu Betel. Iy mene asahan hawem len ou mene atobwak ta nadu tinem Iso ma ou manyah ado aliy.” Ano Jekop eme badeh tiye nadun hawe udun ma hawe iri lau are hawen dah anya, “Ado kakahei iri kindrei badu leheleh tado ki-iu; Ya ado katubuni lomondra tado ma ado kasin iri kolau ha-un: Ano ado kame to ka-au kala Betel ma jo katukum bek ta salom ki ta Kindrei. Ta iy mene aseben jo len jo mene udu ndra-in ma jo edek i heh badeh madan udu le tek.” Eme badeh iri mari andrei kindrei tiri mene badu leheleh i mine Jekop ma hawe buwadin ta ndranye iri ili, ma Jekop kuhiy ma ihiy udu baha kei aloh o-uk mirihik ta kon Sekem.

Ano len Jekop oro nadun suri oro au badeh nohonoh i la-u iri lau mari badu kon mirihik ta kon tinan nane, eme iri badai oro bwe. Eme Jekop ma hawe iri lau tan mari badeh ame asos Lus, na dah aloh badeh Betel udu munyak Kenan. Eme iy tutuni bek ta salom eme tondrohani kon doh in hamon ta nyara Kindrei badu El Betel, tasah Kindrei mene asahan madan len iy mene atobwak ta nadu tinen Iso. Ma badih ta tondrok ta Rebeka nyaran Debora badeh imek, eme ahi iy badeh udu loboho kum ta Betel baha kei o-uk. Ma tondrohani loboho doh badeh, Alon Bakut, “Kei o-uk ndrahu ndrelen.”

Ano len Jekop udu Padan Aram eme hamon badeh, Kindrei asahan hawen ja ma atehei nyosowan i la-un. 10 Eme badeh Kindrei tiye i tan, “Ou badeh nyaram Jekop, arile i dah kameh baloh ou Jekop bwe ai, na dah kameh aloh nyaram Isra-el.” 11 Eme badeh Kindrei tiye i tan, “Jo dah jo Kindrei, jo tek boto-on labai. Ou badeh amwekes nah ma sola. Iri nah badu kon munyak tinan kasahan ta lau tam, ma ou badeh tama iri kabin na len hamon kameh asahan. 12 Jo kameh edeu munyak mene jo edeu i ta Abraham uru Aisik kameh ewek tam, ma jo kameh edeu ale i ta lundriyem ame.” 13 Ano Kindrei ruwani iy ma iy iu ai. 14 Ano udu kon nane Kindrei asehek sahou hawen nane, Jekop tutuni bek toka udu loken ta budon tan samaniy. Ano iy solowei gwa i la-un; ma solowei ndrelekei ta olip i la-un ta salom. 15 Eme iy tondrohani nyara kon doh Betel.

Rejel Imek

16 Ano Jekop oro ruwani Betel ma oro au. Eme oro bala mirihik ta Eprat bwe le badeh, Rejel atona iy anya kedeu nadun ma iy akohok andra-i handru ta isi. 17 Eme isi ta adeu nah amaha badeh iri badih ta lahou ta nah tiye i tan, “I dah nah mwan ja, Rejel; ou sanoh.” 18 Arile bwe ai, iy anya kimek, eme kohan anya kano le badeh iy tondrohani nyaran Benoni, moson “Naduk ta tikisiy.” Arile udu ja, taman tondrohani nyaran ja Benjamin, moson “Naduk ta anyo-ou jo.”

19 Eme badeh ahi iy udu ka-u san ta kon Eprat na len dah aloh Betelehem. 20 Eme Jekop tutuni bek i loken ta abudon udun udu aliy, eme na dah udu aliy le. 21 Ano Jekop edek ili le badeh ma manyah udu loboho bilisiu ta bokok Eder.

22 Isra-el oro manyah ado doh le, eme badeh nadun Ruben ili amadin hawe Bilhah, badih ta taman Isra-el ta nyeu. Eme Isra-el eme anuhun nyala aliy.

Nadu Jekop Oro

Jekop badeh nadun ma ronoh la-uh.
23 Nadu Liya oro mwan kadok badeh Ruben, ano Simiyon, ano Lebi, ano Juda, ano Isakar hawe Sebulun. 24 Ya Nadu Rejel oro badeh Josep uru le Benjamin. 25 Ya nadu bonyo-ou ta Rejel Bilhah badeh Dan hawe Naptali. 26 Ano nadu bonyo-ou ta Liya Silpah badeh Gat hawe Aser. Oro mari doh badeh nadu Isra-el adeu oro are Padan Aram.

Aisik Imek

27 Ano Jekop ili hawe Taman Aisik ili Mamre mirihik ta Kiriyat Arba, loboho mene Abraham uru Aisik manyah are aliy. 28 Aisik badeh udu winiya jaha rinek ndru lunoh (180) ma iy imek mwasin le ari isi bwe ili hawe tubun oro. Eme badeh nadun uru Iso hawe Jekop ahi iy.

Copyright information for `LID