Genesis 40

Josep Asehek Moso Ameh Tiri Lau Badu Bolo Kou

Ano udu, len rayah ja hamon badeh uru ndramak ta lohowan, ndramak ta lohowan ta kabin badu Ijip. Iy ari ndramak ta atiye wa-in, ya iy ari ndramak ta mwena ta amwekes jabi ramen. Uru badeh mwesekei kabin i bolosen. Eme kabin atehei uru a bolo kou bolo asiu ta ndramak ta ndrokei. Ado bolon hawe Josep. Eme ndramak ta mwena ta ndrokei atehei ben solo-an i turu, eme iy atehei Josep badeh i ta lahou turu. Ano uru ado bolo kou luluwen sese badeh, iy ndramak ta atiye wa-in hawe ndramak ta amwekes jabi ramen ta kabin badu Ijip badeh ameh. Ameh turu badeh i buku doh, ta iy ari moson i randrah labai, ta iy ari moson i randrah labai.

Ano Josep mandraben eme hawe uru badeh iy anyolom uru badeh tikisiy. Eme Josep ndremenya uru, “Ah tikisiy ta sasah na len dah?”

Eme uru anya, “Aru mala-uh badeh ameh, arile ari ndramak ta tobolowe moso ameh taru bwe.” Ano Josep badeh tiye i turu, “Kindrei badeh ta edeu moso ameh, eme ah kasehek ameh ta ah.”

Eme iy ndramak ta atiye wa-in asehek ameh tan i ta Josep i buku doh, “Jo badeh ameh malou wa-in badeh ateh udu bwena tek, 10 ma wa-in doh badeh andran ma taloh. Eme la-un ateh le badeh buwan asahan ma buwan uni. 11 Eme jo badeh tawi bwiniu ta kabin udu minek ano jo andrei buwa wa-in eme ma jo apis gwa tan i bolon. Ano badeh jo atehei i mine kabin.”

12 Eme Josep tiye, “Moson badeh i buku doh: Andra wa-in ma taloh badeh moson len taloh. 13 Len taloh ano kameh kabin kameh tiye ou ano ta bolo kou, ma iy kameh atehei ou a hamon ta lahou tam ja. Ma i dah kameh ou kameh atiye wa-in bwiniu i minen i buku bwena le mene. 14 Arile ou samani jo, i buku none ou ado mwasin, ma ou tikisiy jo eme ou asehek nyala kabin, ma kameh iy sebenei jo eme len ta bolo kou. 15 Bwena ndra-au badeh iri bene-ei jo udu munyak ta Hiburu eme dah; eme udu badeh jo bamwekes ari lakou bandra-i bwe, arile iri atehei jo i bolo kou leleyah.”

16 Ano iy ndramak ta amwekes jabi ramen anuhun Josep badeh tiye moso ameh badeh mwasin, eme iy tiye ta Josep, “Jo ale ameh; Jo ameh badeh, udu bwele-e batuk badeh bwak jabi ramen ma taloh. 17 Udu bwak bwele-e batuk loken badeh saba jabi ramen ta kabin udu bolon, eme iri sirih ame badeh aimon.”

18 Eme Josep anya, “Moson ta aliy badeh i buku doh: Len taloh ano badeh kameh, kabin kameh andrei batum kameh iu. 19 Ma i dah kameh tatahiy badam udu ta kei ya iri sirih kameh ame aimon odam.”

20 Eme na len taloh badeh amwenen ta len ta kabin, tinen atehei iy eme len, eme iy mwesekei tine nyamon niri lau ta lahou tan badu bolo asiu tan. Eme iy kuhi ndramak ta atiye wa-in ma ndramak ta amwekes jabi ramen uru ado bolo kou ame len, eme uru ame badeh ales are mada iri lau ta lahou tan badu bolo asiu dah. 21 Ano iy ruwani iy ndramak ta atiye wa-in; eme ma iy iu i ta lahou tan bwena mene, eme ma iy atehei bwiniu wa-in dah i mine kabin. 22 Arile iy ndramak ta amwekes jabi ramen le badeh, iy tatahiy badan. Ma tatahiy i buku none Josep mene ndrasehek ndra-au.

23 Arile ndramak ta atiye wa-in badeh balen ndramaniy sahou mene Josep asehek tan.

Copyright information for `LID