aWari 40:6-8
bWari 40:6
cWari 40:7
dJeremaya 31:33
eJeremaya 31:34
gDutoronomi 32:35
hDutoronomi 32:36; Wari 135:14
iHabakuk 2:3-4

Hebrews 10

Krais i nyara salom san rasan le ta lau marakon

Kandriyen malen ta Moses doh malawi le iri lakou mwasin hamon kameh eme. Arile, kandriyen malen nane doh malawin bala mwasin bwe. Tasah, kandriyen malen batanau i buku doh: Iri pris badeh, kamekes salom ki buku le ta jaha mari. Arile, are lau iri anya kame mirihik ta Kindrei ta san ta salom, salom nane doh winiyan babwidi iri lau ame asahan mwasin ta budon tan ta jaha mari, bwe. Buku kandriyen malen winiyan bwidi iri lau asahan mwasin handru, badeh iri pris samekes salom ja ai. Buku Kindrei ndratolowei kandriyen ndra-in tiri lau nane ame bolo asiu tan, ma na salom rasan le iy bwidi iri ndra bele, iri kameh winiyan batona maha-an tiri kandriyen ndra-in udu ndrine iri ja bwe. Arile, salom asahan doh ta iri lau marakon kanyolom ma kabudon kandriyen ndra-in iri amekes udu bolo jaha ari ari. Tasah, ndraye bulumakau hawe ndraye me winiyan basikine iri kandriyen ndra-in ba-au bwe.

Eme ma Krais eme bolo kon munyak, iy asehek i buku doh i ta Kindrei:

“Ou baso-ok kandriyen ta asun lakou ta salom, hawe adeu ndramas ta salom bwe, arile ou ndrabwidi badak ndrame awas.
Ou badeh, basekesek ta asun iri bulumakau hawe me ma buruwen ili bwele-e mada koto-ok i nyara salom ta sikine iri kandriyen ndra-in iu bwe.
Ya, jo asehek i buku doh, ‘Kindrei tek, jo asah kada-ah ta amekes iri gok ou aso-ok jo kamekes, i buku le iri ndratorowenei amwenen ndra-en bolo buk ndrabun.’ ” a 
Ma bwena iy asehek i buku doh,

“Ou baso-ok kandriyen ta asun lakou ta salom, hawe adeu ndramas ta salom bwe. Ma ou ale basekesek ta asun iri bulumakau ma buruwen ili bwele-e mada koto-ok i nyara salom ta sikine iri kandriyen ndra-in iu bwe.” b 
Handru, kandriyen malen asehek ta iri kamekes iri salom ki buku doh, arile Kindrei basekesek ta iri lakou doh bwe.
Eme Krais asehek ja,

“Jo asah kada-ah ta amekes iri gok ou aso-ok jo kamekes.” c 
Eme ma Kindrei andrei iri kandriyen ta asun lakou i buku iri salom malen iu, eme iy atehei Krais akohok kon tiri i nyara salom.
10 Taha ndrasahan ndra buku iri lau ndrabun, tasah Krais anuhun Kindrei, ma iy atehei badan amwenen i nyara salom san rasan le ma kabwe.

11 Iri pris amekes gok tiri len marakon, iri tawi kandriyen ta asun lakou i buku salom badeh, kahis. Arile iri salom doh winiyan basikine iri kandriyen ndra-in tataha ba-au bwe. 12 Arile Krais badeh, atehei iy i nyara salom ili ta iri kandriyen ndra-in, eme ma gok tan i buku pris asahan mwasin labai ta udu le buku doh. Ano iy iu ili manyah udu loboho mine Kindrei salin. 13 Eme iy kameh udu doh udu gwek winiya le Kindrei baratehei iri lau ta ato-ou kaliu hawen ala ado bahandra katin. 14 Ta salom tan ari le, iri lau Kindrei aloh iri ndra tan, iy eme ndrasikinei kandriyen ndra-in tiri marakon ndra-au, ma iy ndrabwidi iri ndrasahan mwasin labai ta are le buku doh.

15 Malawin Ndrabun ale asehek tataha ta nyala iri lakou dah. Iy asehek ma mwena i buku doh:

16 “Jo Laban, jo kameh asehek sahou randra le dah hawe iri na len eme:
Jo kameh atehei kandriyen tek ili bolo budon tiri, ano kameh jo torowenei iri sahou tek udu bwele-e ade iri.” d 
17 Malawin Ndrabun tiye ja:

“Jo kameh mani ndra-in tiri, ma jo winiyan babudon kandriyen ndra-in tiri ja bwe.” e 
18 Kindrei ndramani iri kandriyen ndra-in tataha mari, eme ma taha winiyan bamekes gok ta salom ta talou kandriyen ndra-in ja bwe.

Taha kala mirihik ta Kindrei

19 Ado nadu tine, ndraye Jises le badeh, ndrasikinei iri kandriyen ndra-in tataha ndrano ndra-au, eme ma taha sanoh ta ala bolo asiu ndrok ndrabun, ndrabun labai ta Kindrei. 20 Iy ndrasihi madasan ha-un ndrame tataha, san doh Jises amwenen, iy mene asahan eme awas. Eme san ha-un doh kameh winiyan andrei taha ala asos kona kolau laba tinan nane udu madasan. Kolau nane doh leheya i buku oda Jises
(10:20) Madasan nane doh, Jises amwenen ndrasihiy. Iy amekes i buku doh: Iy atehei badan amwenen i nyara salom, eme ma ta idoh le, iy tolowei lakou ale nane turuki taha ta ala kon ta Kindrei, iy manyah ere aliy. I buku le iri talahani kolau doh mwena mene udu bolo asiu ndrok ndrabun, ndrabun labai ta turuk tiri lau anya kame bolon. Jises mene imek badeh, kolau laba tinan doh atarah ili ma lusi, ere ndra loken eme isos andri (ou anyolom udu ta Mak 15:38). Kolau doh i buku malawi bada Jises, iy mene bwese maha-an ma sisi-in. Badan ale atarah. Eme ma, ta idoh le, sihi madasan tataha winiyan ta ala bolon hawe Kindrei.


amwenen.
21 Tinan labai tiri pris tataha udu aliy ta atondrok asiu ta Kindrei. 22 Ta iri lakou doh le, taha ale kame mirihik ta Kindrei hawe ndrine taha kirek tiri budon mwasin. Taha katawi ndrine taha kudu mwasin, tasah ndraye Jises badeh, ndrasikinei lomondra ma iri kandriyen ndra-in tataha ndrano ndra-au, ma Kindrei ndrasikine bada taha na gwa tan lewen. 23 Taha ndrasehek iri budon tataha ndrame len, eme ma taha atondrok iri lakou mwasin nane Kindrei anya kedeu keme tataha. Taha katawi kihis iri lakou doh, ma taha sanoh ta aliy. Tasah, taha ndratanan, lakou marakon Kindrei ndratandrakan ta amekes o edeu, idah kameh, iy bwidiy handru. 24 Taha ale kabudon iri lau mwan ma badih rayah ta Kindrei, ma taha kasilah san mwasin ta aseben iri ta aso-ok iri rayah ja, ma ta amekes kandriyen mwasin ili tiri lau. 25 Taha samani kandriyen tataha ta atukum taha marakon a le se, ta atudun Kindrei. Taha sala buku iri lau rayah ndramekes, arile taha kabadok ta amekes ndrine iri lau ta Kindrei kudu mwasin. Tasah, taha ndratanan ta len ta Laban anya keme hamon ja badeh, ndrame mirihik.

26 Buku taha ndratanan sahou handru ta Krais, arile udu ja, budon tataha boto-on labai anya kili hamon tiri kandriyen ndra-in, taha winiyan bamekes ari salom ta sikine iri kandriyen ndra-in iu ja bwe. 27 Are lau iri ala hamon ja ta kandriyen ndra-in, iri ari madasan ta atobwak ja bwe, iri le kameh anoh ndra-in labai ta atondrok len ta sahou ta Kindrei. Tasah, iy ibolosen, ma losen tan doh kameh i buku jih anya nyarahan labai udu le buku doh ta asun iri lau anya kamekes bahun hawen. 28 Buku uru lau la-uh, o, taloh ndranyolom ari ndramak, iy amekes lakou handru, ma iy ba-en hamon ta kandriyen malen ta Moses mene batanau bwe, iy ndramak nane doh, iri winiyan batikisi iy bwe, iri adi iy imek iu. 29 Ya, taha winiyan atanan handru, are mwan o badih atehei konan i ta Nadu Kindrei, iy kameh akohok maha-an tinan labai. Tasah, ndraye sahou randra le ta Krais mene bwidi ndramak doh asahan ndrabun. Arile, iy ndramak nane doh ja amekes ndraye sahou randra le i buku ari lakou ndra-in laleyah. Ma iy ale amekes kandriyen ndra-in handru, ili ta Malawin Mwasin ta Kindrei, iy nane tikisi taha. 30 Taha ndratanan Kindrei tataha, iy ndrasehek i buku doh:

“Jo kameh atehei maha-an ili tiri, ma jo konohei saba kandriyen nane iri amekes.” g 
Buk ndrabun ndrasehek ale:

“Laban kameh atehei iri lau tan amwenen ala ta mada sahou.” h 
31 Taha kanoh Kindrei, iy boto-on labai ma kohan ta ere le buku doh. Kora-on iy kandruni kati ndra-in tataha, ta adeu taha ala ta mada sahou.

32 Aha kabudon kili hamon ta len bwena mene ja, len mwena mene aha ndrakohok sun ta Kindrei, ma aha ndratanan, idoh sahou mwasin ta Krais. Na bolo len doh, iri lau ta ato-ou kaliu i ta Kindrei badeh, adeu maha-an solo-an i ta budon taha, ma aha bwese sisi-in solo-an. Arile aha ales boto-on. 33 Len rayah mene iri atehei aha ales are alih tiri lau, ma iri lohani aha, ma iri adeu maha-an ewek taha. Ma len rayah ja, aha ales are kona iri lau, ta aseben iri ta bwese maha-an hawe iri, buku le mwena mene aha bwese. 34 Aha amekes mwasin ili tiri lau ado bolo asiu lulik. Ma iri lau rayah akohok lokowa aha laleyah iu, arile aha babolosen ta aliy bwe, aha sekesek. Aha amekes i buku doh, tasah aha ndratanan lakou taha mwasin udu aliy. Iri lakou doh udu bwele-en labai ja tiri lakou badu munyak, ma iri kameh winiyan bandra-i bwe ta udu le buku doh.

35 Aha sanoh! Buku aha ales boto-on are le ta budon taha, idah kameh aha winiyan akohok sihine aha tinan labai.

36 Aha sawoyah ta atondrok. Buku aha amekes i buku doh, aha kameh winiyan bwidi iri gok Kindrei aso-ok. Ano ma aha kameh akohok iri saba lakou iy ndratandrakan ta edeu ewek taha. 37 Buku le buk ndrabun ndrasehek:

“Mirihik ai, are lau kameh eme, iy kameh eme hamon handru! Winiya bala luwen bwe.
38 Arile, iri lau mwan ma badih tek mwasin, iri atehei budon tiri in tek, eme ma koha iri kameh ta ere le buku doh. Ma buku iri tubuni kona iri eme tek, o, iri batehei budon tiri bame tek ja bwe, ndrinek kameh winiyan basekesek tiri bwe.” i 
Ya, taha bala buku iri lau rayah ale ndratobwak ndra-au, ma ndra-au kede-eh, bwe. Arile, taha a buku le iri lau atehei budon tiri in ta Kindrei, idah kameh taha winiyan bamak bwe, ma taha kameh ta are le buku doh.

39 

Taha badeh, katehei budon tataha handru kili ta Kindrei ma taha kales boto-on

(Kalan 11–13)

Copyright information for `LID