aJenesis 21:12

Hebrews 11

Katehei budon tataha kili le ta Kindrei

Kandriyen ta atehei budon ili le ta Kindrei i buku doh: Iri lakou nane taha atondrok Kindrei anya kedeu keme tataha, taha katawiy kihis kudu ndrine taha. Ndrine taha ndratanan, iri lakou marakon nane doh udu aliy handru, arile mada taha amwenen banyolom bwe. Budon ta tubu taha iri handru in le ta Kindrei, eme ma bwidi iy sekesek tinan labai.

Taha atehei budon tataha in ta Kindrei, eme ma taha ndratanan, Kindrei badeh, bwidi kandrah hawe munyak, na sahou batanau tan le amwenen. Lakou mari taha ndranyolom, Kindrei amekes na lakou taha winiyan banyolom na mada taha bwe. Ebol atehei iri budon tan mara-ei ili le ta Kindrei, eme iy edeu salom ili tan. Kindrei aso-ok salom ta Ebol labai, iy baso-ok salom ta Ken bwe. Ebol ndramak ai, arile budon tan tinan labai udu ta Kindrei, eme ma Kindrei aloh iy ndramak mwasin labai ta madan, ma iy aso-ok ndramas tan ale. Kandriyen ta budon ta Ebol le doh, leheya taha ta atehei budon tataha ili le ta Kindrei.

Inok atehei iri budon tan mara-ei ili le ta Kindrei le ari, eme bwidi iy bamak bwe. Iy udu ndra loken badeh, iy bwidi Kindrei sekesek, eme ma Kindrei andrei iy ma buruwen iu ili hawen ili kandrah. Ta idoh le, iri lau badu kon munyak banyolom sese badan bwe. Ari ndramak winiyan babwidi Kindrei basekesek bwe, i buku iy batehei iri budon tan mara-ei handru bala tan bwe. Buku are lau anya kili hawe Kindrei badeh, iy katehei budon mara-ei kili tan, tasah iy Kindrei handru udu aliy, ma iy edeu ndramas ili tiri lau asilah iy handru.

Nowa atehei iri budon tan mara-ei ili le ta Kindrei, eme iy i tanan iri saba lakou iy banyolom bwena bwe kameh asahan hamon. Iy anuhun boho Kindrei, iy eme bwidi ndron ra-ei ta aseben iy, udun hawe nadun oro mara-ei ala bolon. Ta budon tan i ta Kindrei le badeh, iy atehei iri lau marakon badu kon munyak ala ta mada sahou, ma Kindrei aloh iy lau mwasin labai ta madan, tasah ta kandriyen tiri budon tan mara-ei ili le Kindrei.

Abraham atehei budon tan handru in ta Kindrei, eme ma bwidi iy anuhun boho Kindrei aloh iy ta ili kon ari nane doh, Kindrei ndratandrakan ta edeu ili tan. Iy ruwani kon tan amwenen, iy bala tanan saba kon handru kameh iy ili aliy bwe. Abraham atehei iri budon tan mara-ei handru, eme ma iy manyah i buku ndramak badu kon leheleh udu bolo kon ta tandrakan nane doh. Ndrahunen badeh, udu bolo balei, i buku le Aisik uru Jekop. Uru akohok tandrakan ta Kindrei i buku le Abraham le mene akohok. 10 Abraham amekes i buku doh, tasah iy atondrok kon tinan labai nane doh, Kindrei le abudon, ma iy ndratahiy na iri lakou boto-on labai, ma winiyan bandra-i bwe.

11 Abraham ndrasahan alon kabwe, ma Sara ale winiyan bato-ou nah bwe, arile Abraham atehei budon tan mara-ei handru udu ta Kindrei le ari, iy ta amekes iri lakou marakon badeh, in hamon le tiri tandrakan tan mwena. Eme ma Sara tuwi nadun mwan. 12 Handru, Abraham ndrasahan alon ai, ma iy ari nadun bwe. Ma iy ale mirihik ta imek, arile lundriyen iri badeh, ndrasahan solo-an labai, i buku le iri ndrau anya udu kandrah, ma i buku le on udu bada babi, ari ndramak winiyan bandromwei bwe.

13 Iri lau marakon nane atehei budon tiri in ta Kindrei winiya le len iri amak. Iri mene are ndra kon munyak, arile iri bandrei saba lakou nane Kindrei tandrakan ta edeu i tiri bwe. Iri sekesek labai ili tiri lakou nane udu ndra len, eme iri asehek sahou randra le i buku doh, “Ahi badu dah bwe, ahi badu kon leheleh labai, ahi ame kon munyak dah ta manyah le.” 14 Buku taha anuhun iri lau asehek sahou i buku doh, taha ndratanan ai, iri lau kede-eh asilah munyak tiri handru. 15 Buku iri abudon ta munyak tiri are aliy bwena, iri badeh, winiyan ala hamon a munyak tiri ja. 16 Arile, koha iri ndrapwe ta ala kon mwasin labai ja udu kandrah. Ta idoh le, Kindrei bwilin bama ta iri aloh iy Kindrei tiri bwe. Tasah, iy ndranyuri kon tinan labai ta iri ala ado aliy.

17 Abraham atehei budon tan mara-ei handru in le ta Kindrei, kabatana Kindrei mene none iy. Kindrei mene tiye Abraham, ta iy katehei nadun Aisik ki nyara salom, eme ma Abraham anya kedeu nadun ari le nane doh ki nyara salom kili ta Kindrei. Handru, Kindrei mene ndratandrakan iy i buku doh,

“Lundriyem oro hamon kameh asahan solo-an labai, in hamon ta san ta nadum Aisik amwenen.” a 
I buku iy kidi Aisik, ano iy katehei iy ki buku salom kili ta Kindrei, badeh, iy ndrasani san ta lundriyen oro ta asola ndra-au. Arile, bwe, Abraham badeh atehei budon tan abadok labai in ta Kindrei, eme ma iy anya kedeu Aisik ki nyara salom kili ta Kindrei.
19 Abraham tanan, idah kameh Kindrei winiyan mete-ei Aisik imek, winiyan amak ja. Taha kasehek kundruh kili buku doh: Abraham ndrandrei nadun Aisik imek udu bolo lek ndrame loken ja.

20 Aisik atehei budon tan mara-ei handru in ta Kindrei. Iy ndrala alon labai, iy eme tiye Kindrei ta nyosowani Jekop uru Iso. Ta nyosowan doh, iy asehek ta lakou kameh asahan turu hamon.

21 Jekop atehei budon tan handru in ta Kindrei. Mirihik Jekop anya kimek, iy atehei nyosowan i ta nadu Josep uru ma la-uh, ano iy baramak hamon. Iy tawi iy ales na kandro tan, ma iy atudun nyara Kindrei.

22 Josep atehei budon tan mara-ei handru in ta Kindrei. Mirihik ta iy anya kimek badeh, iy asehek ta hamon kameh iri lau badu Isra-el kameh ruwani Ijip, ma iri au. Ma iy tiye iri ta bwese ndruwin ale ki hawe iri kahiy kili kon Kenan.

23 Tama Moses uru tinen atehei budon turu udu ta Kindrei, eme tine Moses atehei iy, uru ame anyolom iy nadu mwasin ndra-au ai. Eme ma uru ame tone iy amai winiya bun taloh, tasah uru banoh ta uru ba-en hamon ta batanau ta kabin badu Ijip bwe.
(11:23) Batanau ta kabin mene badu Ijip i buku doh: Nadu iri lau badu Isra-el mwan mari, tine iri atehei iri, badeh kadi iri kamak.


24 Moses asahan i lau-en, iy atehei budon tan in ta Kindrei, iy baso-ok ta iri lau aloh iy kadok
(11:24) Kabin badu Ijip badeh, nadun ari le badih. Ma nadun badih nane doh eme nyowo-ei Moses asahan buku kadok tan. Ta san doh, Moses winiyan akohok nyaran tinan udu Ijip. Arile Moses bwalen akohok nyaran i buku doh. Tasah, iy anyolom iri lau badu Isra-el badeh, amekes gok buku iri bonyo-ou. Eme ma iy sani san ta boho kamen ta kabin doh, ma iy iu ili hawe iri Isra-el ma bwese maha-an hawe iri.
ta boho kamen ta kabin badu Ijip, bwe.
25 Iy atehei budon tan boto-on labai ta bwese maha-an hawe iri lau ta Kindrei. Iy bwalen ta in hamon tiri kandriyen ndra-in ta sekesek, ta winiyan bado luwen bwe. 26 Moses atehei budon tan i buku doh: Buku iy andrei bwilima ta nyara Mesaya,
(11:26) Boho iri Grik iri aloh Krais. Boho iri Hiburu iri aloh Mesaya. Moso boho kon ma la-uh i le randra: Ndramak Kindrei atehei iy eme ta asahan kabin ma ta aseben iri lau tan marakon ame hamon.
idoh le kameh udu bwele-en labai ja ta sowa iri lakou marakon badu Ijip. Tasah, iy abudon boto-on labai ta sihinen mwasin kameh Kindrei edeu, eme iy anya kales boto-on kudu le buku doh.

27 Moses atehei budon tan handru in ta Kindrei, iy eme ruwani Ijip, ma iu ili kon rakon ja. Kabin badu Ijip ibolosen i tan, arile iy banoh iy kabin doh bwe. Iy atehei budon tan in ta Kindrei nane doh, i buku iy anyolom iy amwenen, arile taha lau winiyan banyolom iy na mada taha bwe. Eme ma iy ales boto-on labai ta iri none marakon nane Kindrei edeu iy tan.

28 Moses ale atehei budon tan boto-on labai in ta Kindrei, ta iy kameh aseben iri lau tan badu Isra-el. Eme ma iy tiye iri Isra-el ta adi sipsip ta nyamon ta Pasoba, ma katah ndraye sipsip kili mada kou ta asiu tiri. Eme ma angelo ta idi lau amak kameh winiyan badi nadu iri kadok bwe, ma iy kameh winiyan bame mirihik ta asiu tiri Isra-el nane ndra udu aliy bwe.

29 Budon tiri Isra-el handru in ta Kindrei, eme ma bwidi iri adek are gwa ndras aloh Retsi are bilisiu ala bilisiu i buku iri adek are kon soboren. Arile iri lau badu Ijip an hamon tiri Isra-el ame anya kamekes bahun kili tiri, arile iri marakon atuh ma iri amak.

30 Iri Isra-el atehei budon tiri boto-on handru in ta Kindrei, eme iri asar ala ame awudi kowah tinan badu Jeriko, iri amekes na bek. Iri adek ala ame awudi kowah tinan nane doh winiya len ma ndro taloh. Eme ma kowah doh atohou ili andri.

31 Rahap, iy badih ari ta bada belei, arile iy atehei budon tan boto-on handru in ta Kindrei, iy eme aseben uru lau la-uh badu Isra-el mene ala anya kanyolom saba lakou handru udu bolo kon Jeriko. Eme ma iy bamak bwe, bala buku iri lau nane banuhun boho Kindrei bwe.

32 Ya, saba lakou ja kameh jo kasehek? Len winiyan bwai, jo kameh winiyan basehek nyala Gidiyon, Barak, Samson, Jepta, Debit, Samuwel ma hawe iri propet bwai. 33 Oro lau doh atehei budon toro handru in ta Kindrei. Eme ma, oro banoh ta ari bahun bwe, oro adi iri lau solo-an tiri kabin rayah ja amak, oro ale andrei lakou nane Kindrei tandrakan ta edeu i toro. Oro ale ndremenya Kindrei ta atondrok oro, eme ma oro tawi boho iri layon ta winiyan baimon oro bwe. 34 Jih anya laba tinan ma nyarahan labai, eme iri akahei oro ala bolo jih, arile jih basulumwi oro bwe. Iri lau anya kadi oro na bainat, arile oro atobwak au laleyah. Oro nyamu oro bwe, arile udu hamon ja, nyamu oro asahan, ya oro ame asahan boto-on labai ta bahun. Eme ma oro tikahei iri lau ta bahun badu kon rakon ja au.

35 Oro badih rayah badeh, atehei budon toro handru in ta Kindrei, eme ma lowa oro badih nane ndramak, amak ame awas ja. Oro lau rayah mene ala bolo asiu lulik, ma iri lau ta amekes bahun badeh, bwidi bada oro mara-ei andra-i labai, amekes ili ili winiya le oro amak. Tasah, iri lau ta amekes bahun ndratiye toro, buku oro katubuni kona oro kili ta Kindrei, iri kameh winiyan tolowei oro au laleyah. Arile, oro bwale oro ta adeu kona oro i ta Kindrei, eme ma oro aso-ok ta are ndra bolo asiu lulik, winiya le oro amak. Oro abudon anya, oro kameh amak are bolo lek toro ame awas ja, ma oro kameh akohok koha oro mwasin labai ja. 36 Oro rayah ja, iri bobose oro, ma a-um oro na malou sakabuk i bek. Ma oro rayah ja, iri bawei oro na sen, ano atehei oro ala bolo asiu lulik. 37 Oro rayah ja, iri orowei oro na bek ma oro amak. Iri mwetehei oro rayah, iri aso-ei oro rayah na no-o samen madan. Oro rayah badeh, oro adek ala ame, ari asumwe oro bwe, toro lakou bwe. Oro taliye ku-i sipsip ma ku-i me ndra-in i kalawi oro. Iri lau batondrok oro bala mwasin bwe, iri atehei maha-an ma sisi-in ili le toro. 38 Eme ma, oro adek laleyah ala aton ado kon ari lau bado aliy bwe. Asumwe oro udu bolo mandrei solo-an labai, ma oro ado lek udu bolo mandrei ndra bek le, ma oro ado bolo lek laba tinan udu bolo munyak. Ya, oro lau doh mwasin labai ja ta mada Kindrei, ma iri lau badu kon munyak, iri winiyan bala buku oro lau nane atehei budon toro mara-ei in tan bwe.

39 Iri lau mwan ma iri badih marakon doh atehei budon tiri handru in ta Kindrei! Eme ma, iy anya, nyara iri badeh, mwasin handru ta madan. Iri bwena mene ado kon munyak, arile iri bakohok iri lakou mwasin i buku Kindrei tandrakan ta edeu ili tiri, bwe. 40 Tasah, mwena mene Kindrei lowosani lakou ari doh mwasin labai tataha marakon. Eme iy bwalen ta iri lau mwan ma iri badih mwena doh kasahan mwasin kare mwena tataha. Iy aso-ok taha badeh, kasahan mwasin labai hawe iri, ma taha marakon ka le se kakohok lakou nane iy ndralowosaniy tataha.

Copyright information for `LID