aTanan 3:11-12
bTanan 4:26
cEksodus 19:12-13
dDutoronomi 9:19
eHagai 2:6
fDutoronomi 4:24

Hebrews 12

Tama taha Kindrei

Iri lau mwan hawe iri badih bwena mene awudi taha are le alih i buku asi kandrah, eme iri leheya taha ta kandriyen ta budon tataha kili ta Kindrei. Eme ma taha kamani iri lakou ale tawi taha winiyan basakaliye boto-on bwe, ma taha karuwani iri kandriyen ndra-in marakon ale tawi taha ihis. Eme ma, taha kamekes ndrine taha kabadok ta sakaliye ta akohok lakou mwasin doh, Kindrei ndraleheyani taha sakaliye ta aliy. Taha katehei mada taha kili le ta Jises, i buku le ndramak sakaliye ta nyorei, madan badeh, anyolom ili le bwena tan. Iy le ari kati budon tataha ma bwena, ma hamon kameh iy bwidi kundruh ta iri budon tataha marakon ano, ma udu mwasin labai ja. Iy ndrabwese-ei bwilima ta iri tatahi iy ili bada kei tondreh, arile iy babudon ta aliy bwe, tasah iy tanan hamon kameh iy udu ta sekesek ta iri lakou marakon iy ndrabwidiy. Na idah iy ndramanyah udu bada koyeu loboho mine Kindrei salin. Taha katehei iri budon tataha marakon kili le ta Jises. Iy ales boto-on labai ta iri lau atehei kona iri i tan ta kandriyen ndra-in tiri. Eme ma, taha sawoyah ta asehek sahou ma taha satobwak.

Handru, aha amekes bahun ta kandriyen ndra-in iu, arile bahun aha amekes badeh, ndraye aha bamou bwe, ma aha bamak bala buku Krais imek bwe. Buku sah? Sebwe aha ndramani sahou udu bolo buk ndrabun asehek, Kindrei badeh, aloh taha nadun amwenen:

“Naduk, buku Laban amekes ari kandriyen ewek tam ta leheya ou, ou sabudon anya, idoh lakou ndra-in. Buku iy edeu maha-an ewek tam ta amekes ou amwenen, ya ndrinem sandra-i sala ta iri maha-an doh.
Tasah, ou ndratanam, buku Laban aso-ok ari ndramak, eme kameh iy aseben ta leheya iri kandriyen mwasin i tan. Buku iy andrei ndramak doh i nadun amwenen, iy kameh a-um iy, ta leheya ma batanau iy ta asahan ndramak mwasin.” a 
Handru, Kindrei badeh, aso-ok iri lakou ndra-in doh kasahan tataha, ta amekes taha kamwenen ma taha kado le. Tasah iy amekes kandriyen doh eme tataha i buku ndramak amekes ili ta nadun amwenen. Tama taha iri mwasin, len marakon badeh, iri batanau taha ta iri kandriyen ma lakou mwasin. Kindrei batanau nadun iri marakon, eme buku iy babatanau aha bwe eh, idah aha ndratanan ai, aha badeh, nadun handru bwe. Aha i buku iri nah laleyah badu san. Tama taha iri badu kon munyak, iri batanau taha, eme taha beleben iri kahis. Mwasin ja ta taha mari kala le bahandra tondrok ta tama taha badu kandrah, eme ma koha taha kameh ta udu le buku doh. 10 Tama taha badu kon munyak dah, iri batanau taha sese luluwen bwe, iri amekes i buku iri abudon mwasin. Arile Kindrei batanau taha ta iri kandriyen mwasin ta aseben taha handru, tasah iy aso-ok taha kala ndrabun ki buku le iy. 11 Len ta adeu maha-an eme tataha ta batanau taha, taha basekesek bwe. Ndrine taha atona maha-an labai. Arile, len ta batanau taha marakon ndrano, taha kameh amekes kandriyen mwasin handru ta mada Kindrei, ma ndrine taha kameh udu mwasin.

12 Na idah aha kales kamwenen! Kati aha satotoreh ja! 13 Eme,

“Aha kadek san monen.” b 
Ya, i buku ari ndramak iy badek bamwenen bwe, iy kameh edek amwenen ja.

Taha katadau ndruwi taha ta ales

14 Aha marakon kanone ka-en hamon ta kandriyen ta lau marakon kamanyah kare le se. Ma aha kabadok ta an hamon ta kandriyen mwasin ta are mada Kindrei. Buku aha bamekes bwe eh, aha kameh winiyan banyolom Laban bwe. 15 Aha katondrok aha kamwenen, kora-on aha katehei kona aha kili ta tikisiy ta Kindrei mene edeu eme tataha. Tasah, kora-on ari mwan, o, ari badih kamekes kandriyen ndra-in kili buku doh, ma katehei maha-an kewek taha, ma aha kamekes kandriyen ndra-in kili ta budon ta Kindrei. Iri mwan, o iri badih doh, i buku ra-ei kei ato-ou salin nyakadan, ma iy kameh kabwidi kandriyen tiri lau ta Kindrei solo-an labai kandra-i.

16 Mada aha kaleu ta ndramak iy in hamon ta kandriyen ta karei. Kora-on ari ndramak katehei konan kili ta Kindrei, i buku le Iso mene, iy anya kisih nyamon san rasan le, eme iy atehei iri lakou marakon mwasin ta iy winiyan akohok i buku iy kadok, ta iu laleyah. 17 Aha tanan, udu ja iy anya kakohok iri lakou doh kili hamon. Arile taman anya, winiyan bwai. Iso eden san solo-an labai ta akohok nyosowan kili hamon, arile iy ari madasan ja ta amekes ja bwai.

18 Len ta taha ame hawe Kindrei, lakou asahan tataha bala buku asahan tiri lau badu Isra-el bwe, iri mene ala mirihik ta mandrei aloh Sainai. Iri ame ado mirihik ta mandrei doh, iri winiyan anuhun ma atona iri lakou mari doh handru. Eme ma iri anyolom jih taladan ili loken, ma lulik hutu-un tinan labai, ma jor atohou a tinan. 19 Eme ma iri lau marakon badu Isra-el anuhun boho Kindrei badeh, i buku ndrah eden tinan labai, eme bwidi iri anoh labai. Eme ma iri asehek ili ta Moses i buku doh, “Ahi bwale ahi ta anuhun boho ndramak doh ja.” 20 Iri anoh labai, tasah Kindrei mene asehek ili tiri i buku doh,

“Buku ari ndramak o me le anya kili bwele-e mandrei kodo-oh, aha kandrei bek, korowei iy kimek ki-iu.” c 
21 Eme bwidi iri marakon anoh labai ta lakou nane iri anyolom, eme Moses ale asehek, i buku doh,

“Jo inoh labai eme bwidi jo totoreh.” d 
22 Arile, aha bala basahan ta lakou i buku doh bwe le. Aha ndrame ndrasos mandrei ta Sayon, eme aha ala kon tinan ta Kindrei kameh udu le buku doh, kon tinan Jerusalem udu bolo kandrah. Aha ndrame ndrasahan hawe iri angelo ma nyaran bwe, ame atukum ta sekesek. 23 Idah aha ndruni iri nah Kindrei aso-ok iri tinan labai, nyara iri iy ndratorowenei udu bolo buk tan udu kandrah. Eme aha ndrasilahei Kindrei amwenen, iy atehei lau marakon are ta mada sahou. Ma malawi iri lau ale mwena mene ndramak, Kindrei aloh iri lau mwasin, ma iri ndrasahan mwasin labai ta madan. 24 Eme aha ndrasilahei Jises ale, iy le ari adeh amekes sahou randra le ha-un ta Kindrei hawe taha. Eme ma ndrayen le bwidi sahou randra le abadok. Ndrayen doh udu bwele-en labai ja ta ndraye Ebol, tasah ndraye Ebol leheya i buku doh: Ndramak ari kameh kakonohei ndra-in doh. Arile, ndraye Jises bwe. Ndrayen amou ta akunoh iri kandriyen ndra-in tataha mari iu.

25 Bale aha ki-in taha, kora-on aha katunuhun, ma aha ba-en hamon ta boho Kindrei bwe. Tasah, ma bwena mene Kindrei ere bwele-e mandrei Sainai asehek sahou boto-on ili tiri lau badu Isra-el are kabede mandrei doh, arile iri tebelese bohon. Eme ma, na bolo len bwena mene doh, iri winiyan batobwak ma bateleyani ndramas ta kandriyen ndra-in tiri bwe. Na idah, Kindrei udu kandrah, ma iy asehek sahou boto-on labai ja eme tataha. Buku taha atehei kona taha i tan, taha winiyan batobwak ma bateleyani ndramas ta kandriyen ndra-in nane doh bwe, handru en. 26 Kindrei asehek sahou ma bwena badeh, kurutuwe bohon le bwidi kon munyak doh totoreh. Arile, na dah, iy ndratandrakan,

“Jo kameh nyokoda kon munyak san rasan ja; kon munyak le bwe, jo kameh nyokoda kon munyak ma hawe kandrah ale.” e 
27 Sahou doh, “san rasan ja” iy leheya taha i buku doh: Iri lakou bwena Kindrei mene amekes buku kandrah hawe munyak, na idah iy nyokoda, iri lakou ale doh kameh ano, ma winiyan bado ja bwe. Arile iri lakou iy bandrokonya bwe, badeh iri lakou handru badu kandrah, kameh ta are le buku doh, winiyan ba-au bwe. 28 Ya, taha kadeu wurah kili ta Kindrei, tasah taha ndrasahan iri lau ta are bahandra tondrok ari, badeh, winiyan bandrokonya ma babwidiy bandra-i bwe. Taha badeh katudun nyaran ki-in hamon ta kandriyen iy amwenen aso-ok; taha kanoh ma kabeleben iy, 29 tasah,

“Kindrei tataha badeh, iy i buku jih ta asun lakou ano iu.” f 
Copyright information for `LID