aWari 95:7-11
bWari 95:7-8

Hebrews 3

Jises badeh, udu bwele-en labai ja ta Moses

Ado nadu tine i san ta Jises, Kindrei udu kandrah kodo-oh iy aloh ado ale. Ado kabudon kamwenen kili le ta Jises, Kindrei tiye iy eme ta asahan aposel ma tinan tiri pris. Taha ale atehei budon in tan, ma asehek nyaran ili ta lau marakon. Kindrei ndratehei gok doh ndrala tan, ma iy in hamon ta sahou handru ta Kindrei ta iri kandriyen i buku le ta Moses bwena mene amekes udu asiu ta Kindrei. Moses batah asiu doh bwe, iy amwenen i buku asiu doh. Arile to atudun nyara ndramak ta atah asiu badeh, udu bwele-en labai ta asiu le amwenen. Eme ma Kindrei atehei nyara Jises i tinan labai ja ta nyara Moses. Iri asiu marakon kede-eh lau atah. Arile Kindrei le ari bwidi iri lakou marakon. Moses badeh, buku ndramak ta amekes lahou ta Kindrei, iy in hamon handru ta sahou ta Kindrei, ma iy amekes gok in asiu tan. Gok tan ta tiye iri lakou Kindrei asehek ta aliy kameh asahan hamon. Arile Krais, iy Nadu Kindrei mwasin labai. Iy atondrok asiu ta Kindrei mara-ei. Taha mari badeh, asiu ta Kindrei, buku taha sanoh ta atehei budon tataha boto-on in tan, ma taha sawoyah ta atondrok iy. Badeh, taha lau tan handru.

Kon ta amunyau tiri lau ta Kindrei

Malawin Ndrabun asehek boho Kindrei i buku doh:

“Buku aha anuhun bohok na dah,
aha satunuhun ja ai. Aha sala buku tubu aha iri Isra-el mene tebelese hawek, udu bolo len bwena jo none iri udu kon lomale an.
Iri ndranyolom boto-on handru ta gok marakon jo amekes udu bolo jaha ma hanoh, arile iri tunuhun ma none jo ja.
10 Eme ma bwidi jo ibolosen tinan labai ili tiri lau nane doh, ma jo asehek tiri, ‘Aha ba-en hamon tek bwe. Ma len marakon aha bwale aha an hamon ta tanan tek mwasin.’
11 Eme ma ndrinek ibolosen ma jo tandrakan iri,
‘Aha winiyan bala bolo kon tek ta amunyau bwe.’ ” a 
12 Aha nadu tine, aha katondrok aha kamwenen, kora-on nadu tine taha ari udu ndrokowa taha, budon ndra-in udu ndrinen, ma iy kamani budon tan mwasin, ma iy katubuni konan kili ta Kindrei, iy le ari kohan handru. 13 Na len dah Kindrei aloh “Na dah” kahis le. Iy isan len eme tataha ta anuhun sahou tan. Eme ma ta len marakon, taha kadeu sahou mwasin kili ta nadu tine taha mwan ma badih, ta amekes budon tiri kabadok. Tasah, kora-on taha ari ka-en hamon ta kandriyen ndra-in ta wasai, ma tebelese hawe Kindrei. 14 Ma bwena mene to atehei budon tato in ta Krais. Eme na dah, to katehei iri budon tato mari kihis handru kudu winiya le to baramak. Buku to amekes ili buku doh, idah kameh to akohok lomada Krais, ma to asahan kawas tan handru.

15 Buk ndrabun nane asehek:

“Buku aha anuhun bohok na dah, aha satunuhun bohok ja ai. Aha sala buku tubu aha iri bwena mene tebelese ma banuhun sahou tek bwe.” b 
16 Lau heh bwena mene anuhun boho Kindrei, eme iri tebelese ma banuhun bohon bwe? Idoh iri lau mwan ma badih marakon mene Moses andrei iri are Ijip ame len. Iri le adeh amekes iri kandriyen doh. 17 Kindrei ibolosen hawe lau heh mene udu bolo jaha ma hanoh (40)? Iy ibolosen ili tiri lau mwan ma badih marakon nane amekes kandriyen ndra-in are kon lomale an, ma iri amak. 18 Kindrei mene tandrakan ta lau rayah winiyan bala bolo kon ta amunyau tan bwe. Ya, iy tandrakan lau heh handru? Iri le lau mwan ma badih marakon mene banuhun sahou tan bwe. 19 Taha ndranyolom, iri mene bala bolo kon ta amunyau doh bwe. Tasah, iri batehei budon tiri mara-ei bala ta Kindrei bwe.

Copyright information for `LID