aWari 95:11
bJenesis 2:2
cWari 95:11
dWari 95:7-8

Hebrews 4

Len ta amunyau ta lau ta Kindrei

Tandrakan ta Kindrei ta atiye taha ala bolo kon ta amunyau udu aliy kahis. Eme ma taha kabudon kamwenen, kora-on Kindrei kanyolom ari tataha, iy winiyan bala bolo kon ta amunyau doh bwe. Taha ndranuhun iri sahou mwasin, i buku le bwena mene iri Isra-el anuhun. Iri anuhun, arile baseben iri bwe, tasah iri batehei budon tiri mara-ei bala ta sahou nane iri anuhun bwe.

Idah, are lau iri atehei budon tiri mara-ei ndrala ta Kindrei, idah kameh iri winiyan ala bolo kon tan ta amunyau. Idoh mene Kindrei abudon ta lakou nane doh ma iy asehek:

“Eme ndrinek ibolosen ma jo asehek, ‘Jo ndratandrakan loken handru, iri winiyan bala bolo kon tek ta amunyau doh bwe.’ ” a 
Handru, Kindrei ndrabwidi gok tan ta amekes iri lakou marakon ndrano ndra bwena, arile iy tiye iri sahou doh, tasah iri lau batehei budon tiri bala tan bwe, eme ma iri winiyan bala bolo kon tan ta amunyau bwe.
Udu bolo buk ndrabun asehek nyala len ma ndro taloh i buku doh:

“Udu bada len ma ndro taloh doh Kindrei amunyau, tasah iy ndrabwidi gok tan marakon ndrano.” b 
Buku sahou le nane doh iy asehek ja:

“Iri winiyan bala bolo kon tek ta amunyau doh bwe.” c 
Idoh ta leheya taha. Iri lau ma bwena mene anuhun sahou mwasin, arile iri bandrei amunyau doh bwe, tasah iri batehei budon tiri bala tan bwe. Arile, na dah, lau winiyan akohok amunyau doh kahis. Iri winiyan akohok, tasah Kindrei ndratehei len tan ari ja, ta taha mwan ma badih winiyan ala bolo amunyau tan. Kindrei luhi nyara len doh “Na dah” ja. Bwena mene Kindrei tiye iri Isra-el, eme ma Debit torowenei ili bolo buk ndrabun:

“Buku aha anuhun bohok na dah, aha satunuhun bohok ja ai.” d 
Buku bwena mene Josuwa katehei amunyau kili tiri ta udu le buku doh, idah kameh Kindrei winiyan batiye ta ari len hamon ja bwe. Taha lau ta Kindrei ndratanan, len ta Kindrei ta amunyau udu kede-eh kahis. Amunyau doh i buku le Kindrei amunyau udu bada len ma ndro taloh.
(4:9) Len ma ndro taloh i boho iri Hiburu iri aloh Sabat. Buku taha anya kala bolo amunyau ta Kindrei, taha katehei budon taha marakon kili le ta nadun.
10 Taha ndratanan, are lau anya ki bolo amunyau ta Kindrei, badeh, iy kamunyau ta gok tan amwenen o. Idoh i buku le Kindrei bwena mene amunyau ta gok tan. 11 Taha kabadok ta akohok amunyau doh. Kora-on ari mwan o badih in hamon ta kandriyen ta tebelese boho Kindrei, i buku le iri Isra-el bwena mene amekes, ma iri taku.

12 Sahou ta Kindrei doh badeh, kohan udu aliy, iy amekes gok boto-on labai. Iy madan labai ja ta samen ari, madan la-uh iri aloh bainat. Sahou doh iy winiyan orowei ili bolo oda ndramak amai iu ili alih. Iy winiyan seleyani kohan uru malawin. Ma iy seleyani bolo ndruwin ma bolo bwisi bar ale. Iy ndraseleyani mwasin ma ndra-in tiri budon ma iri so-ok ta ndrine taha marakon ere le lewan. 13 Iri lakou marakon Kindrei mesekei, ari winiyan bamai ta madan bwe. Iri lakou marakon ere le lewan, ma udu kon lewan labai ta madan. Ma iy le ari kameh winiyan anyolom iri kandriyen taha amekes, ma taha kanyowonya marakon ki tan.

Jises ili udu kandrah ma iy asahan i buku tinan tiri pris marakon ta bolo sahou randra le ha-un

(Kalan 4:14–-10:3)

Jises iy tinan tiri pris

14 Tinan tiri pris tataha badeh, in aliy. Nyaran Jises, iy Nadu Kindrei. Iy ndra-au ndrala kandrah hawen. Eme ma taha katawi iri budon marakon nane

taha ndrasehek ndrala tiri lau badeh, kihis mara-ei.
15 Tasah, nyamu taha amwenen winiyan batisih iri kandriyen ndra-in iu bwe. Arile tinan tiri pris tataha amwenen doh, iy le ari winiyan tikisi taha. Tasah, iri maha-an asahan tataha, badeh, mene ndrasahan tan ta none iy ale. Arile iy bamekes ari kandriyen ndra-in bwe. 16 Taha sanoh ta ala mirihik ta koyeu ta Kindrei, iy ndrinen mwasin ma iy ta tikisiy. Iy winiyan aseben taha, buku maha-an tataha tinan labai, ndrinen mwasin ma tikisiy tan kameh winiyan sebenei taha.

Copyright information for `LID