aWari 2:7
bWari 110:4

Hebrews 5

Jises tinan tiri pris iy winiyan andrei taha ame hamon

Kandriyen ta adeu ndramak asahan tinan tiri pris i buku doh: Kindrei le badeh, akohok ndramak badu ndrokowa iri lau, ma atehei iy ta aseben iri lau ta ndrokowa lau hawe Kindrei. Iy i saluwe iri lau mwan ma badih, ma iy edeu ndramas i ta Kindrei, ma edeu salom ta amekes kandriyen ndra-in tiri iu. Iy tanan, iy nyamun bwe, ma iy winiyan bamekes iri lakou solo-an bwe. Eme ma iy amekes amunum le ili tiri lau tana iri lakou bwe, ma ta iri lau ndramani san mwasin ta Kindrei. Ma iy ale ta amekes iri salom ta talou kandriyen ndra-in tan amwenen, ma hawe tiri lau mwan ma badih, tasah iy nyamun bwe, ma iy ta amekes kandriyen ndra-in ale.

Ndramak asahan tinan tiri pris, nyaran ndra tinan kabwe, ma ari ndramak winiyan bakohok gok doh na so-ok tan amwenen bwe. Kindrei kameh aloh iy bwena, ano iy barakohok gok nane doh, i buku le mwena mene Kindrei aloh Aron.

Ma Krais ale i buku aliy. Iy batudun nyaran ta asahan tinan tiri pris bwe. Kindrei le atehei iy ili aliy ta amekes iri gok doh. Kindrei eme tiye i tan:

“Ou naduk handru,
Na dah jo ndrasahan tamam kabwe.” a 
Ndrado bolo buk ndrabun sese kede-eh Kindrei tiye i buku doh:

“Ou kameh asahan pris ta udu le buku doh, in hamon ta gok ta pris ari mene nyaran Melkisedek.” b 
Len ta Jises mwena mene iy edek udu ndra kon munyak, iy amekes iri salom ma iy asolom ili ta Kindrei. Iy tanan idah kameh Kindrei winiyan aseben iy ta iy winiyan bamak bwe. Eme ma iy asolom ma eden boto-on labai ili tan. Iy anuhun ndrelen ta nadun, tasah iy atehei iy mara-ei iu ili andri labai. Jises badeh, Nadu Kindrei, arile iy bwese isi tinan labai. Ta san le doh, ma iy i tanan kandriyen handru ta in hamon ta sahou ta taman. Ma idoh bwidi iy asahan ndramak handru ta in hamon ta sahou ta Kindrei. Eme ma iy asahan kati kandriyen handru ta aseben ma ta akohok are lau iy in hamon ta sahou tan, ta iri kameh are le buku doh. 10 Eme ma Kindrei atehei iy asahan tinan tiri pris, ma iy asehek i buku doh, “Ou kameh asahan tinan tiri pris in hamon ta gok ta pris ari mene nyaran Melkisedek.”

Taha sala buku iri nadu nah bwisik

11 Sahou solo-an labai ta nyala lakou dah, arile boto-on labai ja ta leheya aha, tasah aha winiyan bakohok bolo sahou dah suwi bwe. 12 Aha akohok tanan badeh, luluwen labai, eme ma Kindrei aso-ok aha kaleheya iri rayah ja ta sahou tan. Arile aha winiyan bwe, aha aso-ok ari ndramak kudu ndra hawe aha kaleheya aha ta sahou handru ta Kindrei mara-ei kili hamon ja. Akohok kon ta nyamon boto-on, aha aso-ok ta a-un sur kahis. 13 Are lau ere ndra ta sur badeh, iy ma nyandren kahis. Eme ma iy winiyan baseleyani iri kandriyen mwasin ma ndra-in bwe. 14 Nyamon boto-on badeh, tiri lau ndra tinan ndra-en. Iri lau doh badeh, iri ndranone ma iri ndratanan mwasin labai ta seleya iri kandriyen mwasin ma ndra-in, iri ndratanan ma budon tiri mara-ei ndraleu.

Copyright information for `LID