bWari 110:4
cWari 110:4

Hebrews 7

Sahou nyala Melkisedek

Melkisedek doh iy kabin badu Salem, ma iy ale badeh, pris ta Kindrei in loken labai. Abraham idi oro kabin rayah, eme ma bahun ano, iy eme edek anya keme hamon keme kon, Melkisedek edek eme ndruni iy in san, eme ma iy nyosowani Abraham. Eme ma, Abraham apwai iri lakou nane iy akohok ta bahun i ronoh, ronoh, ano iy edeu ari, ari badu bolo ronoh doh i ta Melkisedek. (Moson ta nyara Melkisedek badeh, “Kabin mwasin labai.” Iri aloh iy ale “Kabin badu Salem.” Moson ta nyaran doh, “Kabin ta mondrei.”) Melkisedek iy ari taman ma tinen bwe, iy ari tubun bwe ale, ari len ta tinen edeu iy bwe, o ari len ta iy imek bwe le. Iy ari saren bwe. Eme ma gok tan ta pris kameh ta udu le buku doh, i buku Nadu Kindrei.

Taha kanyolom Melkisedek se, nyaran kabin labai. Nyaran ja udu bwele-en ta tubu taha Abraham. Tasah, tubu taha Abraham ndrapwai iri lakou tan ta bahun i ronoh, ronoh, ano iy edeu ari, ari badu bolo ronoh doh ndrala ta Melkisedek. Lundriye Libai iri le badeh, winiyan amekes iri gok ta pris. Kandriyen malen ta Moses asehek i buku doh, lundriye Libai iri badeh, kakohok ari, ari badu bolo ronoh ta lakou tiri lau badu Isra-el. Handru, iri Libai badu hawe iri Isra-el, ma iri mari badeh lundriye Abraham. Arile Kindrei anya, iri Libai kede-eh kakohok lakou nane ta nadu tine iri rayah ja. Melkisedek badeh, badu boho kamen ta Libai iri bwe. Arile iy ndrakohok lakou rayah ta Abraham. Eme Melkisedek nyosowani Abraham, iy ndramak nane tandrakan ta Kindrei udu bwele-en. Taha ndratanan ndramwenen, i buku ndramak boto-on ta edeu nyosowan ili ta ndramak ari ja, iy doh iy kabin. Ndramak nane akohok nyosowan, iy doh udu bahandran ja. Iri Libai badeh, akohok lakou ranah tiri Isra-el, arile udu, iri Libai amak. Arile Melkisedek doh iy akohok lakou, arile iy bamak bwe. Iy udu le buku doh, i buku le buk ndrabun asehek. Taha winiyan asehek i buku doh: Lundriye Libai iri adeu lakou ili ta Melkisedek in bwele-e tubu iri Abraham. 10 Libai basahan bwe le badeh, Melkisedek ndruni Abraham udu san, arile iy udu ndra bolo oda tubun Abraham kahis, udu bada len Abraham edeu iri lakou rayah ili ta Melkisedek. Eme ma idoh leheya taha ta Melkisedek badeh, pris randrah labai ja, ma iy udu bwele-en labai ja tiri pris badu boho kamen ta Libai.

Jises i buku le Melkisedek

11 Mwena mene iri lau mwan ma badih badu Isra-el akohok kandriyen malen ta Moses. Kandriyen malen nane asehek i buku doh: Iri lau badu boho kamen ta Libai le badeh, kamekes gok ta pris. Arile, i buku gok tiri pris badu boho kamen ta Libai winiyan bwidi iri lau mwan ma badih asahan mwasin labai, i buku sah handru Kindrei asehek ta pris ari ja kameh asahan hamon? I buku sah handru pris doh kameh i buku le Melkisedek? I buku sah iy winiyan bala buku Aron
(7:11) Pris ma mwena handru badeh, Aron. Iy amekes gok udu bahandra kandriyen malen ta Moses.
bwe?
12 Arile kandriyen malen ta Moses nane doh winiyan basebenei iri mwan ma badih asahan mwasin ta budon ta Kindrei bwe. Eme ma Kindrei atehei pris ari ja, iy i randrah labai, ta akohok kon ta pris bwena. I buku Kindrei akohok pris ari ja, kandriyen malen ta Moses nane doh ale kameh i randrah labai ja. 13 Iy ndramak nane Kindrei asehek iy kameh asahan pris, badeh, badu boho kamen ari ja. Oro ari badu boho kamen nane doh bamekes se gok ta mada koto-ok bwena i buku pris bwe. 14 Taha ndratanan ai, Laban tataha badeh, iy asahan boho kamen ta Juda. Eme Moses mene basehek se sare boho kamen nane doh kameh iri asahan pris bo-oh. 15 Handru, iri pris badu boho kamen ta Libai winiyan basebenei mwan ma badih asahan mwasin ta mada Kindrei bwe. Kati sahou dah aleu mara-ei labai, buku taha abudon ta pris ari nane doh kameh asahan i buku le Melkisedek. 16 Iri Libai asahan pris, tasah kandriyen tiri malen asehek i buku aliy. Arile, ndramak asahan pris i buku le Melkisedek, nyamu kohan badeh, boto-on labai udu le buku doh, eme bwidi iy asahan pris. 17 Kindrei asehek i tan i buku doh:

“Ou kameh asahan pris ta udu le buku doh, in hamon ta gok ta pris ari mene nyaran Melkisedek.” b 
18 Sahou dah leheya taha i buku doh: Kindrei ndrakahei kandriyen malen ta Moses bwena mene ndra-au, tasah kandriyen malen doh winiyan basebenei taha bwe. 19 Iy babwidi ari lakou basahan bala mwasin bwe. Eme ma Kindrei sihi madasan rasan ja, idoh udu mwasin ja ta kandriyen malen. Taha atondrok madasan doh, eme ta madasan le doh, taha kameh winiyan ala mirihik ta Kindrei.

20 Na len Kindrei atehei ndramak nane asahan pris i buku le Melkisedek, iy batehei iy bala laleyah bwe. Iy asehek sahou badu loken handru ano iy atehei iy ili aliy. Iri pris bwena bala buku aliy bwe. 21 Eme Kindrei le tandrakan, ano iy atehei Jises asahan pris. Udu bolo buk ndrabun ta Kindrei asehek i buku doh:

“Laban ndratandrakan, ‘Ou kameh asahan pris ta udu le buku doh,’ eme iy winiyan batubuni budon tan ja bwe.” c 
22 Tasah ta idoh, taha winiyan atanan, sahou randra le Jises ndratawiy ndrahis, idoh mwasin labai. Iy udu bwele-en ja ta sahou randra le ta Moses bwena mene. Tasah, Jises amwenen kameh atondrok sahou randra le ha-un nane doh.

23 Mwena mene iri lau solo-an asahan pris, tasah iri amak, eme ma pris rayah ja akohok kon tiri nane ndramak. 24 Arile Jises iy ta udu le buku doh, eme gok tan i buku pris, ari ndramak ja winiyan bakohok ndrahunen bwe. 25 Eme ma, are lau iri ndrala mirihik ta Kindrei badeh, an le bwele-e boto-on ta nyara Jises, iy winiyan sebenei koha iri ta udu le buku doh. Tasah kohan badeh, ta udu le buku doh, ma bolo len mari iy asolom i ta Kindrei ta aseben iri.

26 Jises doh, iy tinan tiri pris. Iy le ari winiyan sebenei taha. Iy ndrabun labai; iy ari budon ndra-in bwe; ma iy ndra nyikilikin labai ta mada Kindrei. Eme Kindrei atehei iy udu len labai ja tiri lau ta amekes iri kandriyen ndra-in. Ma iy andrei iy iu ili loken ili kandrah, ma atehei nyaran ndra tinan labai. 27 Len ari buku ari, gok tiri pris rayah ta adi iri lakou buku bulumakau i ta salom. Ma bwena badeh, iri amekes salom ta ruwani kandriyen ndra-in tiri amwenen iu. Ano ja, iri amekes salom ta ruwani kandriyen ndra-in tiri lau mwan ma iri badih marakon. Arile Jises bamekes bala buku iri amekes doh bwe. Iy amekes salom badeh, san rasan le, iy atehei kohan le amwenen ili ta Kindrei. 28 Kandriyen malen ta Moses ta akohok ndramak asahan tinan tiri pris, iri akohok ndramak nyamun bwe, ma iy ta amekes kandriyen ndra-in. Arile sahou ma tandrakan ta Kindrei badeh, asahan hamon labai ta kandriyen malen ta Moses. Eme ma sahou nane doh, atehei nadun asahan tinan tiri pris handru. Iri gok mari Kindrei aso-ok iy kamekes, iy bwidi marakon ndrano, ma ndra mwasin le ai.

Copyright information for `LID