aWari 82:6

John 10

Ndramak ta atondrok sipsip ma iri sipsip tan

Jises tiye ja i buku doh, “Jo tiye taha handru, are lau iy badek madasan ta kowah tiri sipsip bwe, iy inyek o iy apou ja san kabede kowah, idoh iy ndramak ta bahana. Ndramak iy edek amwenen ta madasan ta kowah tiri sipsip idoh ndramak handru ta atondrok iri sipsip. Ndramak ta atondrok madasan kameh eme sihi kou, ma iri sipsip ale anuhun bohon amwenen. Iy eme aloh nyara iri, ma iy sirini iri ado bolo kowah ame manan. Iy eme sirini iri sipsip tan marakon ado bolo kowah ame manan, ano iy edek in bwena, ma iri sipsip tan adek a-en hamon tan, tasah iri tana iri iy ma iri anuhun bohon amwenen. Iri winiyan ba-en hamon ta ari ndramak badu kon leheleh bwe, ma idah kameh iri atobwak tan ale, tasah iri anuhun boho ndramak ari ja.” Jises amekes sahou sokek, arile iri bandrei se bolo sahou tan iy asehek ili tiri se bwai.

Jises eme asehek sahou san rasan ja, “Jo tiye taha handru, jo madasan handru tiri sipsip. Iri lau rayah ndrame bwena badeh, iri lau ta bahana ma iri ta akohok lakou laleyah, eme ma bwidi iri sipsip banuhun boho iri bwe. Jo le, jo madasan handru, are lau iy anya keme bolon loboho madasan jo udu aliy, iy kameh winiyan bamak bwe. Iy kameh winiyan edek ili bolon, ano iy eme manan ja, ta asilah nan bwidiu nyorowan badu kapa gwa. 10 Iy ndramak ta bahana, iy winiyan bame laleyah bwe, iy eme badeh, ta bahana iri sipsip ma ta adai iri marakon amak au. Jo eme dah badeh, ta edeu koha iri udu luluwen. Ma koha iri winiyan bapwe bwe, idah kameh udu luluwen labai.

11 “Jo le badeh, jo ndramak mwasin handru ta atondrok iri sipsip. Iy ndramak mwasin ta atondrok sipsip badeh, iy winiyan banoh ta imek ta iri sipsip tan bwe. 12 Iy ndramak ibo gok ta akohok ndramas le, iy ndramak doh iy ta atondrok iri sipsip bwe, ma iri sipsip doh, tan bwe. Buku iy anyolom mwi badu lokei sakaliye eme ta aimon iri sipsip, iy kameh inoh, ma iy ruwani iri sipsip areu, iy kameh atobwak iu. Mwi eme ini iri, ma iri kameh atalan laleyah. 13 Iy ndramak nane atobwak iu, tasah iy ta akohok le ndramas ta gok, iy ari ndramak handru ta tanan ta atondrok iri sipsip bwe.

14 “Jo ndramak ari mwasin labai ta atondrok iri sipsip, jo tanan iri sipsip tek amwenen, ma iri sipsip tek amwenen tanan jo. 15 I buku tama, iy tanan jo ma jo ale tanan iy, ma jo winiyan banoh ta imek ta iri sipsip tek bwe. 16 Iri sipsip tek rayah badeh, bado bolo kowah bwe. Gok tek ta akohok iri kame hamon bolo kowah ale. Iri ale katana iri bohok, ma iri kameh ala le rakou, ma ndramak ari le atondrok iri mara-ei.

17 “Katin ta tama aso-ok jo badeh, ta jo atehei ndrinek labai, ma jo banoh ta imek tiri sipsip tek bwe. Ano kameh jo andrei kohak eme hamon ja. 18 Ari ndramak winiyan bandrei kohak ba-au bwe. Na tanan ma budon tek le amwenen jo edeu kohak iu. Boto-on ta adeu ma boto-on ta akohok eme hamon badeh, tek amwenen. Sahou batanau dah jo akohok badu mine tama amwenen.”

19 Sahou nane doh eme ma bwidi ndrokowa iri Juwis udu aliy, ma apwai iri a la-uh. 20 Iri solo-an asehek anya, “Iy badeh, malawin ndra-in udu bwele-en ma iy lolo-ou. Buku sah? Taha sanuhun iy!”

21 Iri lau rayah anya, “Sahou doh bala buku iy ndramak, balik bado bwele-en bo-oh! I buku balik udu bwele-en, iy winiyan babwidi mada ndramak kaseu, basak bwe.”

Iri Juwis batehei budon tiri bala ta Jises bwe

22 Len ta nyamon tinan anya kasahan Jerusalem ta abudon len nane iri atah asiu tinan ta Kindrei. Idoh udu bolo len ta kon nyala-an asahan ale. 23 Na len doh badeh, Jises edek in bolo asiu tinan ta Kindrei bahandra beleheleh ta Solomon, iri amekes na bek. 24 Iri Juwis ame turuki iy ales udu le alih tiri marakon, eme ma iri ndremenya iy, “Len sabe handru kameh ahi kabe-en ou? Buku ou Mesaya handru, ahi aso-ok ou asehek amwenen keme tahi na le dan!”

25 Jises eme asehek i tiri, “Jo ndrasehek ndrawek taha, arile aha batehei budon taha bala ta sahou tek bwe. Iri lahou tinan jo amekes na boto-on ta nyara tama badeh, ta aha katanan jo, 26 arile aha batehei budon taha bala ta aliy bwe, tasah aha sipsip tek handru bwe. 27 Iri sipsip tek anuhun ma iri tanan bohok. Jo tanan iri, ma iri adek an hamon tek. 28 Jo atehei kohak handru ili tiri, ma iri kameh winiyan bamak bwe, ma ari ndramak winiyan baruwi iri ado minek bala len bwe. 29 Tama amwenen, iy ndratehei iri ndrame tek, iy udu bwele-en labai tiri lakou marakon, ma ari ndramak winiyan baruwi iri ado mine tama ame len bwe. 30 Jo hawe tama, aru ari le.”

31 Sahou tan eme ma bwidi iri Juwis akohok bek anya korou iy ja. 32 Eme Jises asehek sahou i tiri ja i buku doh, “Jo ndraleheyani aha ta iri lahou laba tinan solo-an labai, ta tama. Ta saba lahou tinan handru, aha anya korou jo na bek?”

33 Iri anya, “Ahi winiyan borou ou na bek ta iri lahou tinan rayah ou amekes bwe, arile ou bobose Kindrei, tasah ou ndramak laleyah, ou aloh ou, ma ou amekes ou ja i buku Kindrei.”

34 Jises eme tiye sahou ili tiri anya, “Ta kandriyen malen taha, sahou ta Kindrei randra asehek i buku doh,

‘Jo Kindrei, jo asehek, aha badeh, ndra kindrei.’ a 
35 Bwena mene Kindrei asehek sahou dah ili tiri lau, iy tiye tiri ta iri ndra kindrei. Aha ndranuhun, sahou udu bolo buk ndrabun ta Kindrei kameh udu le buku doh, winiyan bano bwe. 36 Arile jo, tama amwenen leheyani jo, ma iy suni jo eme andri kon munyak. Jo ndrasehek taha, ‘Jo Nadu Kindrei.’ Buku sah ja aha anya, jo bobose Kindrei ma jo anya kakohok ndrahunen? 37 Buku aha anya jo bamekes gok ta tama bwe, mwasin ta aha satehei budon taha same ta sahou tek. 38 Jo badeh, amekes iri gok ta tama. I buku aha batehei budon taha bame ta sahou tek bwe, mwasin, aha katehei budon taha kili le tiri lahou tinan mene jo ndramekes. Tasah, jo aso-ok aha katanan ma aha kabudon kamwenen ki buku doh: Tama badeh, i buku jo, jo i buku le tama. Aru ma la-uh badeh, ari le.” 39 Eme ma bwidi iri anya kateu iy, arile iy eme atobwak iri.

40 Jises eme edek iu ili hamon ili kapa gwa Jodan bilisiu bwena mene Jon ta alomwa inyu iri lau are aliy, ma iy udu aliy udu gwek. 41 Ma iri lau solo-an labai adek ame hawen. Iri ame asehek i tan, “Jon badeh, bamekes ari lahou tinan ma kalem bwe; iri sahou marakon iy asehek nyala iy ndramak doh badeh, marakon amwenen le.” Ma udu bolo kon doh iri lau solo-an labai atehei budon tiri marakon ili le ta Jises.

42 

Jises edek ili Judiya ma Jerusalem ma iri lau tinan anya kadi iy kimek

(Kalan 11–12)

Copyright information for `LID