John 11

Imek ta Lasarus

Ndramak ari nyaran Lasarus iy ibo sik in andri. Iy badu Betani, kon ta Mariya uru nadu tinen Mata. Uru ma la-uh doh, nadu tine uru nane, Lasarus, iy ibo sik in andri. Mariya mene ale asolou suluw manahun buburen ili bwele-e kati Laban, ano iy owei na lami batun. Eme uru nadu tinen suni sahou turu ili ta Jises i buku doh, “Laban, kawas tam mene, ou ale aso-ok iy labai badeh, ibo sik in andri.”

Jises anuhun le badeh, iy eme tiye, “Sik doh ta amekes ndramak imek bwe. Bwe, idoh eme ta taha kanyolom ma taha katudun Kindrei, ta idoh le nadun kameh akohok nyaran mwasin.” Jises aso-ok Mata uru nadu tinen ma Lasarus tinan labai. Iy akohok sahou ta Lasarus badeh, ibo sik, arile iy eme udu kon doh udu gwek, len la-uh ja.

Ano iy eme asehek i toro lau tan, “To ka-au kala hamon ja kala Judiya.”

Oro lau tan ame asehek ili tan, “Ndramak ta leheya, na le mene badeh, iri Juwis badu loboho Judiya anya korou ou na bek, arile ou anya ala hamon ala kon doh ja?”

Jises asehek sahou i toro lau tan, “Ado sanoh. Len ari ma buruwen mandraben ili winiya beyeh, idoh luluwen labai. Are lau iy edek na len iy winiyan bataku bwe, tasah iy atou lomada len ta kon munyak. 10 Buku iy are edek na ben, iy kameh winiyan banyolom kon bwe, ma iy kameh taku, tasah iy lomadan ari sun bwe.”

11 Iy asehek sahou ano, iy eme ili tiye toro, “Kawas tato Lasarus badeh, amadin tuk le, arile jo kameh ili mete-ei iy amak eme loken ja.”

12 Oro lau tan asehek sahou i tan, “Laban, i buku iy ndramadin tuk, iy kameh winiyan amwenen.” 13 Jises asehek nyala imek tan, arile oro lau tan anya iy kede-eh asehek ta iy amadin le. 14 Ma iy eme asehek amwenen ili toro, “Lasarus ndramak. 15 Jo abudon ado labai, eme bwidi jo sekesek ta to marakon bado hawen bwe. Tasah, ado kameh atehei budon tado eme le tek. Ya, to ka-au kala katou iy.” 16 Ano Tomas (iri aloh iy Didimus)
(11:16) Didimus badeh, moson Mumwir.
asehek sahou i toro lau ta Jises marakon, “Mwasin, to marakon kala Judiya, ma to kamak ka le hawen ka-au ai!”

Jises bahabah nadu tine Lasarus uru

17 Jises hawe oro lau tan asahan le badeh, ma iy i tanan Lasarus iri ndratehei iy ndrala munu bek len hahuw ndra-au. 18 Betani udu mirihik ta Jerusalem. Nyolom ta aliy i buku kilomita taloh, 19 ma iri Juwis badeh, solo-an labai ame hawe Mata uru Mariya ta bahabah uru ta imek ta nadu tine uru. 20 Mata ndranuhun, idah kameh Jises eme, iy eme edek ili ndruni iy udu ndra ndrukulu san ranah. Mariya le ari udu asiu turu udu.

21 Mata eme asehek i ta Jises, “Laban, buku ou ado aliy nane, nadu tine winiyan bamak bwe. 22 Arile, jo tanan, na idah kameh Kindrei edeu saba lakou ewek tam buku ou ndremenya iy ta aliy.”

23 Ano Jises asehek sahou i tan i buku doh, “Nadu tinem kameh amak eme loken ja.”

24 Mata anya, “Jo tanan, idah kameh iy amak ja na len hamon.”

25 Jises tiye i tan, “Amak udu bolo lek eme awas ja badeh, jo le ari. Iy are lau atehei budon tan mara-ei eme tek, iy imek arile kohan handru kameh udu mwasin. 26 Ma are lau iy bamak bwe le, iy atehei budon tan mara-ei eme tek, iy winiyan bamak bwe. Ya ou atehei budon tam in ta aliy?”

27 Iy tiye i tan, “Ehe Laban, jo atehei budon tek in tam, tasah ou Mesaya, ma ou Nadu Kindrei. Ou le mene, Kindrei suni ou ame andri bolo kon munyak.”

28 Iy asehek sahou ano le badeh, iy edek eme hamon eme luhi nadu tinen Mariya eme hawen ma iy asehek i tan, “Ndramak ta leheya ndrame, iy anya ou ala hawen.” 29 Mariya anuhun le badeh, iy suri iy ere loken suwi suwi, ma iy edek ili hawe Jises. 30 Jises bame basos bolo kon bwe le, iy udu ndra san ranah nane Mata asahan hawen. 31 Oro Juwis rayah ado hawe Mariya ado asiu ta tikisiy hawen. Eme oro anyolom Mariya suri iy suwi suwi ere loken, ma iy edek iu ili manan. Ano oro an hamon tan ala manan, tasah oro abudon anya, “Kora-on iy kili keden kili mada lek.”

32 Mariya edek ili isos ndrukulu san nane Jises udu aliy, ma iy anyolom iy, iy eme taku ili bada katin ma iy asehek sahou i ta Jises, “Laban, i buku ou ado aliy badeh, nadu tine winiyan bamak bwe.”

33 Jises anyolom iy eden, ma iri Juwis nane adek an hamon tan aden ale, iy anyolom iri aden eme bwidi ndrinen eden tinan labai ta tikisiy. 34 Iy eme lelen iri, “Aha ndratehei iy udu heh?”

Iri anya, “Laban, ou ame anyolom.”

35 Eme ma Jises eden.

36 Iri Juwis asehek, “Aha kanyolom iy eden. Iy aso-ok Lasarus tinan labai!”

37 Arile iri rayah asehek anya, “Iy le mene adeh, sihi mada ndramak ari bwe asak. I buku sah iy winiyan basebenei iy ndramak kede-eh ja bwe?”

Jises mete-ei Lasarus amak ja

38 Jises tikisiy tinan labai, iy eme edek ili mirihik ta mada lek. Lek doh udu munu bek iri turuki madan na bek tinan. 39 Jises tiye i tiri, “Aha katundruwi bek udu mada lek kede-eh ki-iu kili len.”

Mata nadu tine ndramak nane imek asehek sahou i buku doh, “Laban, manahun ndrala, iy udu bolo lek badeh len hahuw ai.”

40 Ano Jises asehek sahou i tan i buku doh, “Jo nane ndrasehek tam eh, i buku ou atehei budon tam mara-ei eme tek eh, idah kameh ou winiyan anyolom boto-on ta Kindrei.”

41 Iri ame tundruwi bek udu mada lek nane ili len. Ano Jises anyolom ili kandrah, ma iy asehek sahou, “Tama jo edeu wurah i tam ta ou anuhun jo. 42 Jo ndratanan len marakon ou anuhun jo, arile jo asehek sahou dah ta lau badih ma mwan ales ado hawek kada-ah, ta iri kameh katehei budon tiri kewek tam, tasah ou suni jo eme.”

43 Iy asehek ma iy aloh boto-on labai, “Lasarus ou ame manan.” 44 Ndramak imek nane dah edek eme manan, minen ma katin badeh, iri su-iy na kari kolau. Ma kolau ra-ei ja iri su-i madan na aliy.

Jises eme asehek i tiri, “Aha kala katolowei kolau ta lek udu badan kodo-oh ki-iu, ma iy kedek.”

Iri lau tinan adeu sa-oh ta adi Jises

(Metiu 26:1-5; Mak 14:1-2; Luk 22:1-2)

45 Iri Juwis solo-an an hamon ame ta atou Mariya, ma iri anyolom saba lakou Jises amekes, ma iri atehei budon tiri marakon i tan. 46 Arile iri rayah ala hamon asehek i tiri Parasi ta saba lakou nane Jises amekes.

47 Eme iri lau tinan tiri pris ma iri Parasi luhi iri kansol ame atukum ma asehek i tiri. Iri ndremenya iri i buku doh, “Taha kamekes kili buku sah handru? Iy ndramak kede-eh amekes iri lahou tinan ma kalem solo-an labai. 48 I buku taha bamekes ari lakou bwe, idah kameh iri lau marakon atehei budon tiri, ma iri an hamon tan. Ano, iri lau ta bahun badu Rom ame kameh tohowei asiu tinan ta Kindrei tataha iu, ma andrei iri lau tataha marakon au.”

49 Ano ndramak tiri ari nyaran Kayapas, iy in bwena tiri pris na le jaha doh. Iy asehek bohon a tinan i loken, “Aha kede-eh tana aha se lakou bwe! 50 Aha babudon se bwai? Mwasin ta ndramak ari le, iy kimek ta saluwe lau marakon. Ndra-in ta lau marakon amak laleyah.”

51 Iy basehek sahou na budon tan amwenen bwe, iy asahan kabin tiri pris na jaha nane doh, iy eme amekes sahou i buku propet ta adi Jises kimek ta saluwe lau marakon badu Juwis; 52 ma iy imek kameh tiri Juwis le bwe, iy imek ta atukum nadu Kindrei iri mene ndratalan, kame hamon ka le se. 53 Ma udu ndra bada len doh ili badeh, iri amekes sa-oh ta adai iy.

54 Eme ma Jises badek bala bame hawe iri Juwis ja bwai. Iy ruwani kon nane iy udu aliy, iy edek iu ili kon ari doh mirihik ta kon lomale an, ili loboho kon ari iri aloh Iparayim, ma iy manyah udu hawe oro lau tan ado kon doh udu gwek.

55 Len ndrabun iri aloh Pasoba ma nyamon tinan ta jabi ramen yis bolon bwe tiri Juwis anya kasahan, eme iri lau solo-an badu loboho doh adek au ala le loken Jerusalem, ta sikine ndraka-an udu tiri iu, ano iri baramekes Pasoba. 56 Iri badeh, asilah Jises, iri ales ado bolo kowah ta asiu tinan ta Kindrei, iri ndremenya iri ari, ari i buku doh, “Saba budon taha handru? Sebwe iy winiyan bame ta nyamon tinan dah bwe nadeh?” 57 Iri lau tinan tiri pris ma iri Parasi ndratehei sahou ndrado aliy, i buku are lau tanan Jises udu heh handru, iy keme katiye tiri ma iri kala katawi iy.

Copyright information for `LID