aWari 41:9

John 13

Jises sikine kati oro lau tan

Len ndrabun iri aloh Pasoba ma hawe nyamon tinan ndrame mirihik. Jises ndratanan, udu bolo len doh eme kameh iy ruwani kon munyak ta iy iu ili loken hawe taman. Iy aso-ok iri lau tan marakon ado bolo kon munyak tinan labai, ili winiya le iy imek.

Oro manyah aimon nyamon ta beyeh, balik ndratehei budon boto-on labai ndrala ndrine Judas Iskariyot nadu Saimon, ta iy kameh edeu sa-oh ta Jises. Jises tanan taman badeh, ndratehei iri boto-on marakon ndrala bahandra tondrok tan, iy udu hawe Kindrei eme, ano iy kameh iu ili loken hawen ja. Eme ma iy aimon nyamon hawe oro, ano iy suri iy ere loken, iy asini awin badu bwele-en le iu, ma iy andrei kolau ra-ei eme iy tabuwiy i ndrukulun. Ano ja iy solowei gwa ili bolo bwisi sabok ma iy sikine kati oro lau tan, ano iy owei kati oro lau tan abosar na kolau nane iy tabuwiy udu ndrukulun.

Iy eme isos hawe Saimon Pita, Saimon Pita eme asehek sahou i buku doh i tan, “Laban, ou anya sikine katik?”

Jises asumon sahou ta Pita i buku doh, “Ou bala tanam ta saba lakou jo amekes dah bwe, arile hamon kameh ou barala tanam baramwenen.”

Pita anya, “Jo bwalek, ou winiyan basikine katik bwe!”

Jises eme asehek sahou i tan ja, “I buku jo basikine katim bwe eh, ou kameh winiya bado hawek bwai.”

Saimon Pita anuhun sahou ta Jises nane doh, ma manin atur labai. Eme ma iy asehek sahou i tan ja, “Laban, anya i buku baden eh! Ndri-iy ai, ou sasikine le katik, ou sikine minek ma la-uh ma batuk ale.”

10 Jises anya, “Are lau ndranyu mara-ei, iy winiyan banyu ja bwai, idah kameh kasikine le katin. Bada ado ndra bele, arile jo basehek bada ado marakon bwe.” 11 Iy ndratanan are lau handru kameh edeu sa-oh tan, ta idoh le ma iy eme asehek, “Bada ado ndra bele, arile jo basehek bada ado marakon bwe.”

12 Iy sikine kati oro lau tan ano, iy eme atehei awin tan ili la-un ja, ma iy edek ili hamon manyah ili ndrahunen ja. Iy eme lelen oro lau tan, “Saba lakou jo ndramekes ndrawek tado, ado ndratanan sese deh bwe? 13 Ado aloh jo ndramak ta leheya, ma Laban, mwasin handru ta ado aloh jo i buku doh, tasah, badeh jo amwenen. 14 Jo Laban ma jo ndramak ta leheya, jo nane ndrasikine kati ado. Ado satudun nyara ado, mwasin ta ado kala kasikine kati nadu tine ado iri rayah ja. 15 Jo leheya ado ta kandriyen mwasin, ta ado ari ari kamekes ki buku le jo nane ndramekes. 16 Ado kanuhun kamwenen, iri lau bonyo-ou winiya basakalawi kabin tiri bwe, ma iri salibah ale winiyan bala bwena tare lau nane tiye iy eme ta amekes gok tan bwe ale. 17 Idah ado ndratanan iri lakou marakon nane doh, ya Kindrei winiyan nyosowani ado i buku ado amekes iri lakou marakon doh.

18 “Jo winiyan basehek ado marakon bwe, jo tanan are lau jo ndrandrei, arile sahou udu bolo buk ndrabun asehek, kameh asahan handru, tiye i buku doh,

‘Ndramak nane iy aimon nyamon hawek, iy le kameh edeu sa-oh tek.’ a 
19 “Lakou doh basahan bwe le, jo kasehek tado kere bwena ai, ano lakou barasahan hamon, i buku lakou doh asahan, idah kameh ma ado barabudon ai, jo iy ndramak nane iy udu le buku doh. 20 Ado kanuhun, jo tiye tado handru, are lau iy akohok ma aseben ndramak nane iy amekes lahou tek, idoh i buku none le iy akohok jo ma aseben jo ale. Ma are lau akohok jo, idoh i buku none le iy akohok Kindrei iy suni jo eme dah.”

Jises asehek sahou nyala sa-oh tan

(Metiu 26:20-25; Mak 14:17-21; Luk 22:21-23)

21 Sahou tan ano le bohon badeh, ndrinen eden ta tikisiy. Iy eme asehek sahou amwenen ili toro lau tan i buku doh, “Jo asehek sahou handru ewek tado, iy ari ereu bolo ado kede-eh kameh atehei jo ili mine iri lau ndra-in.”

22 Oro lau tan anuhun, ma mada oro ari i ta ari, tasah oro bala tanan ta are lau handru Jises asehek. 23 Lau ta Jises ari manyah udu hawen, iy lau doh Jises aso-ok iy labai. 24 Eme Saimon Pita ndrokonya batun ili ta iy lau nane ma iy asehek, “Kandremenya iy, are lau handru ale iy asehek iy doh?”

25 Iy lau tan ari nane dah sosokok ili mirihik ta Jises. Iy eme atehei batun ili batalan ma suburuk i tan, “Ndramak tinan, ou tiye tek, are lau handru?”

26 Jises anya, “Ou anyolom, jo kameh atehei jabi ramen ili bolo suw, ano kameh jo atehei ili nan, badeh, iy le ai.” Iy eme atehei jabi ramen ili bolo suw ano iy atehei ili na Judas Iskariyot nadu Saimon. 27 Judas andrei jabi ramen ano le badeh, balik ndrala bolo iri budon tan mara-ei ai. Jises anya, “Judas, ou ala. Saba lakou nane ou anya amekes, ou amekes suwi.” 28 Oro lau tan ado bada koyeu doh, oro anuhun Jises asehek sahou ili ta Judas, arile oro bakohok bolo sahou tan bwe. 29 Judas badeh, ta atondrok kohei ta luk, eme oro lau rayah anya Jises kede-eh tiye iy ta asih rayah nyamon ta len ndrabun aloh Pasoba nadeh, o, iy kili kedeu rayah lakou kili tiri lau, tiri lakou bwe nadeh.

30 Judas ini jabi ramen ranah nane ano le badeh, iy suri iy iu ili manan, ma kon eben ai.

Jises edeu batanau ha-un i toro lau tan

31 Iy ndra-au ndra manan ndra luluwen sese, Jises eme asehek, “Na idah kameh Nadu Ndramak Awas atudun nyaran, ma Kindrei kameh leheya lomadan i ta lohowan tan Jises. 32 Buku Kindrei atudun iy, se nawin bwe iy atudun uru nadun i le rasan.

33 “Ado naduk, jo kameh bado hawe ado luluwen bwe. Ado kameh asilah jo, arile jo asehek tado i buku jo mene ndrasehek ndrala ta tinan tiri Juwis, ta ado winiya bala kon kameh jo ilih aliy bwe.

34 “Na dah jo edeu kandriyen ta batanau ha-un ewek tado: Ado ari ari badeh, kaso-ok nadu tine ado iri rayah ja. I buku le jo mene aso-ok ado labai, eme ma ado kaso-ok nadu tinem iri rayah ja. 35 Buku ado ari ari aso-ok labai iri lau tek rayah badu hawek, idoh kameh leheyani iri lau marakon badu kon munyak, i buku ado badeh, lau tek handru.”

Jises tiye ta Pita, “Idah kameh ou mani jo”

(Metiu 26:31-35; Mak 14:27-31; Luk 22:31-34)

36 Ano Saimon Pita lelen Jises i buku doh, “Laban, ou kameh alih heh handru?”

Jises tiye i tan ja, “Jo ili heh, ou winiyan ba-en hamon tek na dah bwe, arile ou kameh bara-en hamon tek ja na len hamon.”

37 Pita lelen iy ja, “Laban, i buku sah handru jo kameh winiyan bawek hawem na len dah bwe? Jo kameh atehei kohak marakon ewek le tam.”

38 Jises eme tiye i tan ja i buku doh, “Buku sah? Ou winiyan atehei koham marakon eme tek ta aseben jo handru deh? Ou anuhun, jo asehek sahou handru ewek tam, kakaro baden bwe le, ou kameh besebes anya, ou tanam jo bwe san tulusin.”

Copyright information for `LID