bWari 22:18
cEksodus 12:46; Namba 9:12; Wari 34:20
dSekaraya 12:10

John 19

Ano Pailat atehei Jises ili mine iri lau ta bahun, ta iri ka-um iy na malou iri sakabuk ihis i bek. Iri lau ta bahun tabuwi bada malou bobodon i se buku none barak ma atehei ili batun. Ano iri atehei kolau ra-ei saraman lawe-en ili la-un. Ano iri marakon adek ame hawen ma iri bobose iy i buku doh, “Ou kabin tiri Juwis ou areu le buku doh len mari!” Ano iri a-um iy na bolo mine iri i bolo kapan.

Pailat edek eme manan ja, iy asehek sahou ili tiri san rasan ja, “Aha kanuhun, jo kameh andrei iy eme manan hawe aha ta aha kanyolom, ma aha katanan, jo badeh, basilahei ari ndra-in udu tan bwe-en.” Udu, Jises eme manan. Bada malou bobodon nane iri tabuwiy i buku barak udu batun ma awin saraman udu bwele-en ale. Pailat eme tiye ili tiri, “Aha kanyolom iy ndramak nane asah idah!”

Iri tinan tiri pris hawe iri lau ta atondrok asiu tinan ta Kindrei anyolom iy le badeh, iri arah, ma iri asehek sahou boto-on i buku doh, “Katatahi iy ki bada kei tondreh! Katatahi iy ki bada kei tondreh!”

Pailat eme asehek sahou ili tiri ja, “Aha kandrei iy kewek hawe aha, ano aha baratatahi iy barala ta kei tondreh. Jo winiyan basilahei ari ndra-in tan bwai.”

Iri Juwis somolei sahou ta Pailat ja anya, “Ahi badeh, kandriyen tahi malen udu aliy, asehek ta adi ndramak imek, tasah iy le anya, iy Nadu Kindrei.”

Pailat anuhun iri asehek i buku doh, eme ma bwidi iy inoh tinan labai. Iy eme iu ili bolo asiu tiri kabin ja, ma iy ndremenya Jises ja, “Ou badu heh handru?” Arile, Jises basumon bohon bwe. 10 Pailat asehek sahou i tan ja, “Tasah handru ou winiya basumon bohok bwe? Ou tanam jo bwe? Jo le ari atondrok, ta jo winiya tiye ou au laleyah, ma jo winiya tatahi ou ala ta kei tondreh ale.”

11 Jises eme tiye i tan ja, “Ou winiya batondrok jo bwe, i buku Kindrei batehei boto-on ta atondrok jo bawek tam bwe. Ta idoh le kameh, are lau iy atehei jo eme minem dah, iri kandriyen tan marakon kameh udu bwele-en labai ja ta iri kandriyen ndra-in tam.” 12 Pailat anuhun iri sahou doh, eme iy asilah san ta Jises ki-iu laleyah. Arile iri Juwis arah i tan ja, “Buku ou ruwani iy ndramak badeh, iu laleyah eh, badeh, kameh ou kawas ta Sisa bwai. Are lau asehek, anya iy kabin, badeh, iy bobose Sisa.”

13 Pailat anuhun iri sahou nane doh, eme iy sirini Jises eme manan ja. Ano Pailat manyah udu andri bada koyeu tiri kabin, udu loboho bolo asiu doh iri aloh “Bek Malahan.” (Iri Hiburu aloh Gabata.)

14 Mada an eme ndrado le alih, mirihik ta len ndrabun iri aloh Pasoba anya kasahan. Pailat eme tiye i tiri Juwis, “Ya, aha kanyolom, idah kabin taha.”

15 Iri lau ame arah ili bwele-e Pailat, “Kadi iy kimek! Kadi iy kimek! Katatahi iy ki bada kei tondreh!”

Pailat eme ndremenya iri, “Aha aso-ok jo katatahi kabin taha kede-eh kili ta kei tondreh?” Arile, iri tinan tiri pris anya, “Ahi ari kabin ja bwe. Sisa le ari, kabin tahi.”

16 Eme bwidi Pailat inoh, ma iy atehei Jises ili mine iri, ta iri katatahi iy kili ta kei tondreh.

Iri lau ta bahun atahi Jises i ta kei tondreh

(Metiu 27:32-44; Mak 15:21-32; Luk 23:26-43)

Iri lau ta bahun ame andrei Jises iu ili hawe iri.
17 Iri tiye iy ta bwese kei tondreh tan. Iy bwese-ei ili isos kon ari iri aloh “Kon ta bwisi bar ta ndramak,” ili boho kon tiri Hiburu iri aloh Golgata. 18 Udu loboho doh, iri lau ta bahun tatahi Jises ili ta kei tondreh. Iri tatahi uru lau la-uh ala ta kei tondreh ale. Iy ari udu loboho minen salin, iy ari udu loboho minen kamweu, Jises udu alih turu ma la-uh.

19 Pailat eme torowenei sahou rayah, ano iy tiye oro lau ta bahun tatahiy udu bwisi no-o kei tondreh ta Jises. Tarou nane tiye i buku doh, “Jises Badu Nasaret, Kabin tiri Juwis.” 20 Sahou nane doh iri torowenei ili boho kon tiri Hiburu, boho kon tiri Latin (Rom), ma boho kon tiri Grik. Iri Juwis badeh, solo-an ame anyolom sahou nane iri torowenei udu ta kei tondreh ta Jises. Tasah kon nane iri tatahi Jises udu aliy bado len ta kon tinan nane doh bwe. 21 Eme iri tinan tiri pris anyolom ma iri abolosen. Iri ame asehek ili ta Pailat i buku doh, “Ou satorou sala buku kodo-oh: ‘Kabin tiri Juwis.’ Ndri-iy labai. Ou atorou kili buku doh: ‘Iy ndramak le kede-eh asehek i buku doh: “Jo Kabin tiri Juwis” ’ ”

22 Pailat eme asehek sahou boto-on i tiri, “Ndri-iy ai, saba sahou jo ndratorowenei badeh, kudu gwek ai.” 23 Na len iri lau ta bahun tatahi Jises ili ta kei tondreh, iri andrei awin tan ta bwele-en, iri tarani ili ma ha-ei, ano iri ondrek tiri. Awin tan ra-ei ja ma buruwen ta badan badeh, iri andrei ale. 24 Iri asehek ili tiri ari, ari, “To satarani awin tan mwasin dah, to kamekes laki ta aliy.
(19:24) Idoh i buku kau tare lau aserek, idah kameh iy andrei awin ma buruwen nane doh ili tan.
To kanyolom are handru kameh andrei.” Lakou nane dah bwidiy amwenen ta sahou udu bolo buk ndrabun asahan handru,

“Iri andromwei iri awin tek ili le winiya iri. Iri amekes nyorei laki ta awin tek.” b 
Iri kandriyen marakon nane doh, iri lau ta bahun amekes.

25 Ales are mirihik ta kei tondreh ta Jises badeh, tinen, nadu tine tinen, Mariya udu Klopas, ma hawe Mariya badu Makdala. 26 Jises anyolom tinen ma hawe lau tan ari iy aso-ok iy tinan labai ales are hawe tinen. Iy eme asehek sahou ili ta tinen, “Tine, iy ndramak kede-eh nadum handru.” 27 Ano iy asehek ili ta lau tan nane, “Iy badih kede-eh tinem.” Eme udu ndra bada len doh badeh, iy lau ta Jises nane andrei tine Jises ili asiu hawen ma tondrokei iy.

Jises imek

(Metiu 27:45-56; Mak 15:33-41; Luk 23:44-49)

28 Jises tanan ta iri gok tan mara-ei ndrano ai. Iy eme aloh, “Balek ndramar ta gwa.” Iy asehek doh ta amekes sahou udu bolo buk ndrabun eme asahan handru. 29 Kun ari, waen titi-in udu bolon udu mirihik ta kei tondreh tan. Iri lau ta bahun andrei konyei, oro tolomwani i bolo waen titi-in nane doh, ano oro atehei ili no-o kei ari, iri aloh hisop. Ma oro adeu ili bohon. 30 Jises anyuwi waen nane dah ano, ma iy anya, “Kabwai, lahou mara-ei ndrano.” Iy eme atehei batun i andri ma iy ruwani kohan ma iy imek.

Ndramak ari ta bahun aso-ei kabede Jises na nyah

31 Len doh badeh, ta alokou len ndrabun ta amunyau tiri Juwis. Len tiri nane doh kameh ndrabun labai. Eme ma iri Juwis bwale iri ta ndramak sukik udu bada kei tondreh na bolo len doh. Eme iri ndremenya Pailat ta atubwa kati oro lau nane are bada kei tondreh, ta oro kamak suwi, ma iri lau ta bahun kandrei oro are bada kei tondreh kame andri. 32 Iri lau ta bahun ala tubwani kati uru lau ma la-uh nane sukik are hawe Jises ado bada kei tondreh. 33 Arile iri ame ta Jises, iri anyolom iy ndramak ndra nane, ma iri batubwani katin bwai. 34 Arile ndramak tiri ari ta bahun eme aso-ei kabede Jises na nyah. Eme ma ndra hawe gwa amou eme len. 35 Jo ndramak nane jo anyolom iri saba lakou nane asahan doh, eme jo asehek, “Lakou marakon doh handru. Jo tanan, lakou marakon jo ndratorowenei ndrano, iri ndra handru le ai. Aha katehei budon taha kili aliy.” 36 Iri lakou marakon nane doh, bwidiy amwenen ta sahou udu bolo buk ndrabun eme asahan handru,

“Ari ndruwin winiyan babok bwe.” c 
37 Sahou randra ja bolo udu buk ndrabun asehek i buku doh,

“Iri kameh anyolom i ta ndramak nane iri orowei kabeden na nyah.” d 

Iri atehei Jises ili bolo lek

(Metiu 27:57-61; Mak 15:42-47; Luk 23:50-56)

38 Ano, ndramak ari nyaran Josep iy badu kon tinan Arimateya, iy ili ndremenya Pailat ta akohok Jises udu ta kei tondreh keme andri, ta adeu iy kili lek. Josep doh, lau ta Jises ari ale. (Arile iy inoh iri tinan tiri Juwis, iy eme basehek nyaran bame len bwe.) Pailat eme aso-ok, eme Josep ili andrei bada kei udu ta kei tondreh eme andri. 39 Nikodemus, iy le mene ili atou Jises na ben rasan. Iy ili hawe Josep ale. Iy bwese-ei kohei rahak irek tiri suluw ma iri nyasou manahu buburen. Maha-an tiri suluw doh i buku kilo tonoh hahuw (34). 40 Uru lau ma la-uh nane dah andrei bada kei eme andri, uru su-iy na iri kari kolau ma hawe adeu iri suluw i badan. Uru asu iy i buku kandriyen le tiri Juwis ta asu lau amak. 41 Mirihik ta kon tinan nane iri adi Jises, bilin ari udu mirihik ta aliy. Ya udu bolo bilin doh, munu bek ari ma ha-un le, iri badeu ari ndramak imek bala aliy bwe le. 42 Len doh ta alokou len ta amunyau tiri Juwis. Munu bek nane doh udu le mirihik turu, eme uru anyuhi Jises ili bolon.

Copyright information for `LID