John 8

Arile, Jises le ari udu, ano iy edek iu ili bwele-e mandrei ari iri aloh mandrei ta Olip. Udu mandraben ma wahun iy edek eme hamon eme andri ili bolo kowah ta asiu tinan ta Kindrei ja. Iri badih ma mwan ame hawen ja. Jises eme manyah ma iy leheya iri. Eme iri lau ta leheya kandriyen malen ta Moses, ma hawe iri Parasi, andrei badih ari eme, atehei iy ales udu mada Jises hawe iri lau marakon. Iri anya iy amekes karei. Iri ame asehek i ta Jises i buku doh, “Ndramak ta leheya, ahi anyolom iy badih kede-eh amekes karei le badeh, eme ahi andrei iy eme dah. Kandriyen malen ta Moses mene batanau taha badeh, i buku are badih, iy amekes karei i buku doh, ahi kandrei bek korowei iy kimek ki-iu. Abo, ou kameh asehek i buku sah handru?” Iri amekes sahou i buku doh anya kawendreya Jises kili ta mada sahou. Arile Jises aluh i andri iy atorou lakou na kandro minen in bada munyak. Iri ndremenya Jises kahis le. Ano iy suri iy ere loken ma iy asehek sahou ili tiri i buku doh, “Ya, are lau handru udu hawe aha kada-ah, iy bamekes se karei bwe-en? Iy kandrei bek, iy korowei i badih kede-eh.” Jises asehek sahou ano iy aluh ili andri ja. Iy atorou lakou na kandro minen in bada ndren ja. Iri marakon anuhun sahou doh badeh, ma iri asilah san tiri ta atobwak. Iri asoh ari ari. Iri lau alon adek au ma bwena. Ano iri rayah ja an hamon tiri. Jises le ari erah udu, hawe iy badih nane ales udu batalan. 10 Jises eme suri iy ere loken ma iy ndremenya iy i buku doh, “Badih den? Iri lau marakon nane ndraheh? Ari tiri batehei ou bala ta mada sahou bwai?”

11 Iy badih nane dah anya, “Bo-oh! Ndramak tinan.” Ano Jises asehek sahou i tan, “Jo ale batehei ou bala ta mada sahou bwe. Ou au ai. Arile, ou sala samekes karei ja ai.”]

Jises badeh, iy sun ta kon munyak

12 Ano Jises asehek sahou ili tiri lau ja. Iy asehek ili tiri i buku doh, “Jo badeh, sun ta kon munyak. Are lau iy in hamon tek, iy winiyan ba-en lulik bwe. Iy kameh akohok tan sun kohan udu aliy, kameh edeu kohan udu le buku doh.”

13 Arile iri Parasi asehek i ta Jises i buku doh, “Ou kede-eh asehek iri gok ma kandriyen tam amwenen, eme ma iri lau kameh winiyan batehei budon tiri bala ta iri sahou nane ou asehek bwe.”

14 Jises anya, “Ehe, jo asehek saba lakou eme badak amwenen. Arile iri sahou handru. Jo tanan jo udu heh eme handru, ma jo tanan jo kameh ili heh. Aha bala tanan jo badu heh handru, ma jo kameh ili heh handru, bwe. 15 Aha adeu ndramak i ta mada sahou badeh, in hamon ta budon tataha lau badu munyak amwenen. Arile jo badeu ari ndramak bala ta mada sahou bwe le. 16 Arile, buku jo edeu ndramak i ta mada sahou, jo kameh anuhun sahou tan amwenen labai, tasah jo le ari badeh, banuhun sahou tan bwe; tama suni jo eme ma iy amekes gok hawek ale. 17 Kandriyen taha malen asehek i buku doh, ‘Buku sahou turu lau ma la-uh i le randra eh, uru badeh, tiye sahou handru ai.’ 18 Jo badeh, asehek jo amwenen. Ano tama nane suni jo eme dan, iy ale asehek jo.”

19 Iri ndremenya iy, “Tamam ndraheh?”

Jises eme tiye tiri i buku doh, “Aha tanan jo bwe, ma aha tanan tama bwe le. Buku aha tanan jo eh, badeh kameh aha tanan tama ale ai.”
20 Jises asehek iri sahou marakon doh badeh, udu bolo len iy leheya iri udu bolo asiu tinan ta Kindrei. Iy ales udu mirihik ta lakou ari ta iri adeu ta ndrahune luk ta nyara salom. Arile ari ndramak babawei iy bwe, tasah len tan handru badeh, kahis le.

Ado winiya bala kon kameh jo ilih aliy bwe

21 Jises asehek sahou ili tiri lau ja, “Jo kameh iu ai. Aha kameh asilah jo, arile aha kameh amak ta kandriyen ndra-in taha. Aha kameh winiyan bame kon kameh jo ilih aliy bwe.”

22 Eme bwidi iri Juwis ndremenya iy ja, “Iy kidi iy nadeh? Eme adeh iy asehek i buku doh, ‘Aha winiyan bame kon kameh jo ilih aliy bwe.’ ” 23 Arile Jises asehek le ai, “Aha lau marakon kede-eh badu kon andri dah. Jo le badu kon loken. Aha marakon badu kon munyak dah. Jo badu kon munyak dah bwe. 24 Jo ndratiye taha, ta aha kameh amak ma ndra-in taha. Buku aha batehei budon taha bame tek bwe, buku, ‘Jo iy ndramak nane iy ta udu le buku doh,’ aha kameh amak hawe kandriyen ndra-in taha.”

25 Iri ame ndremenya iy ja, “Ya ou are lau handru?” Jises eme tiye i tiri, “Jo adeh lakou nane jo ndrasehek taha. 26 Budon tek solo-an labai ta asehek ewek taha ma ta maha-an taha. Arile jo kameh tiye iri kandriyen taha i buku ari ndramak ta anuhun sahou. Jo ndranuhun iri sahou ta are lau nane suni jo eme dah, iy asehek iri sahou handru. Eme jo asehek ili tiri lau badu kon munyak.”

27 Jises asehek taman ili tiri, arile iri bandrei bolo sahou tan bamwenen bwe. 28 Jises eme asehek ili tiri ja, “Buku aha ndratudun Nadu Kindrei ere bada kei tondreh, ma aha kameh atanan, jo iy ndramak nane iy udu le buku doh. Ma jo winiyan bamekes iri lakou na le budon tek le bwe. Jo asehek dah buku tama ndraleheya jo. 29 Are lau iy nane suni jo eme dah iy udu hawek. Iy winiyan bamani jo bwe, tasah jo amekes iri lakou in hamon ta budon tan.” 30 Jises asehek iri sahou doh kahis le, eme iri lau solo-an atehei budon tiri ili tan.

Nadu Abraham iri handru

31 Jises eme asehek tiri Juwis nane atehei budon tiri in tan, “Ya, buku aha anuhun sahou tek, ma aha an hamon tiri leheya tek badeh, aha lau tek. 32 Idah kameh aha atanan sahou handru, ma sahou handru kameh bwidi aha mani gok taha bonyo-ou.”

33 Iri Juwis ame asehek i ta Jises, “Ahi dah nadu Abraham handru. Ahi bala buku bonyo-ou ta ari ndramak bwe le. I buku sah ja, ou anya, ahi kameh mani gok tahi bonyo-ou?” 34 Jises asehek sahou ili tiri ja, “Handru labai jo tiye taha, buku are lau iy amekes kandriyen ndra-in, iy badeh, ndra bonyo-ou tiri kandriyen ndra-in. 35 Buku are lau iy bonyo-ou, iy kameh winiyan bala buku nadu iy ndramak ta asiu nane iy in hawe oro, bwe.
(8:35) Iy ndramak ta asiu winiyan tiye bonyo-ou ta amekes iri gok tan marakon. Arile, bonyo-ou winiyan bakohok ari lakou ta iy ndramak nane, iy in hawen bwe; nadun amwenen le badeh, kameh akohok iri lakou ta taman.
Arile nadun handru amwenen kameh udu hawe taman uru tinen na len marakon.
36 Ya, buku Nadu Ndramak Awas ndrabwidi aha ndramani iri gok taha bonyo-ou, badeh, kameh aha winiyan bamekes gok ta bonyo-ou ja bwe. 37 Jo tanan aha nadu Abraham handru. Arile aha anya kadi jo kimek, tasah aha batehei budon taha bala ta sahou tek bwe. 38 Jo asehek taha ta iri lakou tama ndraleheya jo. Arile aha amekes lakou an hamon ta tama aha, iy ndrasehek taha.”

39 Iri ame asehek i ta Jises, “Ahi nadu Abraham.”

Ano Jises asehek ili tiri ja, “Buku aha nadu Abraham handru eh, ya aha kamekes lakou kili le buku iy ndramekes.
40 Iri lakou marakon jo ndrabwidiy ma sahou handru jo ndrasihidiy ndrawek taha, jo anuhun ta Kindrei. Bwe ja, aha none ta adi jo. Abraham bamekes bala buku aliy bo-oh. 41 Aha amekes iri lakou kede-eh i le buku tama aha amwenen amekes.”

Iri Juwis anya, “Ahi nadu andra bweu bwe! Kindrei le ari amwenen badeh, tama ahi, ma ahi dah nadun handru.”

Iri nadu balik

42 Jises asehek ili tiri, “Buku Kindrei tama aha handru eh, badeh, aha kaso-ok jo ai, tasah jo udu hawe Kindrei eme udu kada-ah. Jo bame laleyah na le budon tek amwenen bwe. Iy suni jo ta eme. 43 Buku sah handru aha bakohok bolo iri sahou tek bala mwasin bwe? Tasah aha bandrei kati iri sahou tek bamwenen bwe. 44 Tama aha balik, aha nadun, aha amekes lakou an hamon ta iri lakou iy aso-ok. Udu ndra bada katin eme, iy ta idi lau. Iy bwalen sahou handru, tasah iy tanan ta asehek sahou handru bwe. Iy ta wendreya, ma iy aso-ok ta asehek sahou ta wendreya. Iy badeh, tine wendreya udu tan. 45 Jo badeh, asehek iri sahou handru. Arile, aha ja, batehei budon taha bame ta sahou tek bwe. 46 Are lau taha winiyan nyuwani jo amekes iri kandriyen ndra-in? Buku jo asehek sahou handru, i buku sah, aha batehei budon taha bame tek bwe ja? 47 Are lau iy badu hawe Kindrei handru, iy anuhun saba lakou Kindrei asehek. Katin ta ou bwalem ta anuhun, tasah ou badu hawe Kindrei bwe.”

Jises uru Abraham

48 Iri Juwis asehek sahou boto-on i ta Jises i buku doh, “Ahi asehek handru, ou ndramak ndra-in badu Samariya, malawin ndra-in udu bwele-em.”

49 Jises asehek i tiri, “Ari malawin ndra-in bado bwele-ek kada-ah bo-oh. Jo masiye tama, arile aha ja bamasiye jo bwe. 50 Jo bwalek ta atudun nyarak. Ndramak ari kede-eh, iy aso-ok ta atudun nyarak, ma iy kameh ta anuhun sahou tiri lau. 51 Jo asehek taha handru. Are lau iy anuhun sahou, ma iy in hamon ta sahou tek, iy kameh winiyan bamak bwe.”

52 Ndrine iri Juwis irih ta sahou ta Jises, eme iri asehek sahou i buku doh, “Idah ahi ndratanan ndramwenen ai. Ou kede-eh malawin ndra-in udu bwele-em! Abraham ma hawe iri propet badeh, ndramak ndra bwena ndra-au. Arile ou anya ja, ‘Iy are lau iy anuhun ma iy in hamon ta leheya tek, iy winiyan bamak bwe.’ 53 Budon tam kede-eh anya ou bwena labai ma ou ado bwele-en labai ta Abraham ja nadeh? Abraham ma iri propet badeh, ndramak ndra-au ndra bwena. Ya ou anya, ou are lau handru?”

54 Jises eme asehek i toro i buku doh, “Buku jo katudun nyarak amwenen, idah kameh basahan bala mwasin bwe. Iy ndramak nane masiye jo badeh, tama amwenen. Aha nane aloh iy Kindrei taha en? 55 Aha bala tanan iy bwe, arile jo tanan iy. Buku jo kasehek anya jo tanan iy bwe eh, badeh, kameh jo ndrawendreya i buku le aha. Arile jo tanan iy, ma jo anuhun sahou tan. 56 Tama aha Abraham ndrasekesek ndrandra-i labai, ta anyolom len tek nane dah. Iy anyolom ma iy sekesek tinan labai.”

57 Iri Juwis asehek i tan ja i buku doh, “Ou bala mirihik ta jaha ma lomonoh (50) bo-oh! I buku sah ja ou ndranyolom Abraham?”

58 Jises tiye ili tiri, “Jo asehek taha handru en. Abraham basahan bwe le badeh, jo iy ndramak nane ta udu le buku doh.” 59 Jises asehek sahou ano le badeh, iri lau akohok bek, iri ame anya korou iy. Arile Jises aton udu bolo asiu tinan ta Kindrei udu. Ano iy iu ili manan.

Copyright information for `LID