Jonah 2

Jona Asolom

Jona udu bolo ndrine ni badeh, iy asolom ili ta Laban Kindrei tan. Jona anya, “Laban, jo ndrandra-i ai. Jo aloh ewek tam, eme ma ou anuhun bohok. Jo ale udu kon ndra-in tiri lau ndramak. Jo eme eden ewek tam, ma ou ame anuhun ndrelen tek.

“Ou akahei jo, iu amai ili bolo ndras andri handru on! Ndras tubuluhiy jo amai mara-ei. Eme ou bwidiy goi atohou eme bwele-ek. Jo eme asehek i buku doh. Ou ndratikahei jo ndra-au. Arile jo kameh atou asiu tam ndrabun ja.

“Goi atohou eme bwele-ek, ma bwidiy kohak anya kano. Eme ma ndras tubuluhiy jo mara-ei. Korak badu bolo ndras badeh tabuwiy batuk. Jo badeh iu ili andri kati iri mandrei marakon udu bolo ndras. Budon tek badeh anya, jo kameh erah udu gwek. Arile Laban, ou Kindrei tek handru. Ou andrei kohak eme hamon ja. Laban, jo atona buku jo anya kimek, eme bwidiy jo abudon ou ja. Ma salom tek ewek asahan tam udu bolo asiu tam ndrabun handru.

“Iri lau badeh atubwa bwilindru-u iri i ta kindrei ta wendreya, iri maniy san mwasin ta an hamon tam. Arile jo anya kiyah wariy ta atudun nyaram, ma jo anya kedeu salom kewek tam. Lakou mari jo ndratandrakan ndrawek tam badeh, kameh jo kabwidiy. Laban, ou le ari, badeh, ou andrei ahi ame hamon hawem, ma ou atehei koha ahi eme hamon ja.”

10 Eme ma Laban tiye ni, ma ni eya ili babi ma iy amuriy Jona ili loke bada babi.

Copyright information for `LID