Jonah 4

Arile Jona badeh basekesek bwe, eme ma bwidiy ndrinen ibolosen, tasah Kindrei batubuniy boho kon bala andri bwe.

Jona eme asolom, “Laban, jo tanak, i dah kameh lakou asahan. Jo i tanak badeh udu ndra kon tek, i doh le badeh bwidiy jo mene atobwak ili Tasis. Jo tanak ou badeh, Kindrei. Ou ta leheya kandriyen ta tikisiy. Ou winiya babolosen suwi bwe. Tikisiy tam badeh tinan labai. Jo tanak, ou kameh maniy kandriyen ndra-in, ma ou winiya bamwekes maha-an bala toro bwe.”

“Laban, jo anya kandremenya ou, jo aso-ok ou andrei jo kimek ki-iu. Jo bwalek ta udu. Buku jo kimek, i dah kameh mwasin ai. Buku jo bamak bwe badeh, i dah kameh ndra-in.”

Laban eme asumon sahou ta Jona anya, “Ou abolosen badeh, katin sah?”

Jona eme edek ili manyah udu loboho an eme loken. Iy eme bwidiy nadu mandron ra-em ta iy in korohan ma iy atondrok, ma iy anya kanyolom saba lakou handru kameh asahan ta kon tinan Ninibe.

Laban Kindrei eme bwidiy badamalou ari ateh ma seselek ili bwele-e mandron ta Jona. La-u badamalou dah eme turukiy an basulumwiy batun bwe, eme bwidiy Jona sekesek handru en. Udu mandraben, an eme loken. Kindrei eme tiye koromweh ari ili iniy kandro badamalou dah, ma malou dah asara. An eme loke udu le alih badeh, Kindrei eme ja bwidiy jor rai nyarahan labai eme ma an nyarahiy batun ma bwidiy madan abuluw, ma bwidiy iy nyamun bwe. Jona anya, “Jo kimek badeh kameh mwasin ai. Buku jo bamak bwe, badeh kameh ndra-in.”

Kindrei eme tiye ta Jona i buku doh: “Badamalou badeh asara eme bwidiy ou abolosen neh? Ou abolosen badeh, katin sah?”

Jona eme asehek sahou ja, “Ehe, losen tek badeh amwenen. Jo ibolosen badeh, winiyan bwidiy jo kimek ki-iu.”

10 Eme Laban tiye i ta Jona i buku doh: “Badamalou badeh ateh na ben, iy asara na ben ari ja. Ou bamwekes ari lakou bala tan bwe, ma ou babwidiy iy batinan bwe. Arile ou tikisiy badamalou badeh, tinan labai. 11 Badeh kameh tikisiy tek tinan ili ta kon Ninibe, tasah Ninibe badeh kon tinan labai. Ma kane iri badih ma mwan udu bwele-e kane 120,000 ja. Ma bulumakau tiri badeh solo-an labai.”

New Testament

Copyright information for `LID