Luke 11

Jises leheya san ta asolom

(Metiu 6:9-15; Metiu 7:7-11)

Na len ari badeh, Jises udu kon ari asolom. Iy amekes salom ano badeh, lau tan oro ari ndremenya iy anya, “Laban, ou leheya aso ta san ta asolom, i buku none Jon mene leheya oro lau tan.”

Eme Jises tiye i toro anya, “I buku none ado anya kasolom badeh, ado kasolom ki buku doh:

‘Tama aso,
Nyaram badeh, ki ndrabun,
Ma ou ame atondrok kon mari.
Ou atehei nyamon ki le winiyan ta aso kaimon, na len ari ari.
Ou mani kandriyen ndra-in taso,
i le buku aso mani kandriyen ndra-in toro are lau le, amekes eme taso.
Ma ou satehei aso sala bolo iri none, ndri-iy.’ ”
Ano ja iy tiye i toro, “I buku none ou ari kawas tam udu aliy, ya na ndrukulu ben badeh, ou ala hawe kawas tam anyar iy ta jabi ramen ma tolo-os, tasah kawas tam ari badeh, udu len barame ai, ya eme ou nyamon ta amekes nan bwe.

“Eme kawas tam udu asiu anya, ‘Au, ou ame amak jo, na ben alih dah ta sah? Kou taso ndrala, ma naduk oro ale ndramadin. Ya jo winiyan basuri jo, ta edeu nam nyamon bwai.’ Eme jo katiye tado kamwenen, ou badeh, kawas tan handru, arile iy winiyan basuri iy banyohan ou nyamon bwe. Arile, ta boto-on ta bwilima tam bwe, ou ndremenya ndremenya ja. Idah kameh, kawas tam kameh suri iy eme loken, anyohan ou na sasah ou aseken ta aliy.

“Eme ya jo katiye tado: Ado kandremenya, ya ado kameh akohok. Ado kasilah, ya ado kameh takalahei. Ado kalim kou, ya kou kameh asak tado. 10 Tasah, iy are lau ndremenya, iy kameh akohok. Iy are lau asilah, iy kameh takalahei. Ya iy are lau alim kou, ya kou kameh asak tan.

11 “Ya, i buku none ou badeh, a tama ari nah, ya iy kandremenya ou ta ari ni, ya ou badeu ni bwe? Ya, ou kameh adeu nan mwak ai? 12 O, buku iy kanyar ta ndrusu sirih, idah kameh ou atehei nan sabiyep ai? 13 Ya, ou tanam ou ndra-in, arile ou tanam ta adeu lakou mwasin ili na nadum oro, ou winiyan atanam handru, tama ado udu kandrah kameh sekesek labai ta edeu Malawin Ndrabun ale ili toro are lau ndremenya iy!”

Jises hawe Belsabul

(Metiu 12:22-30; Mak 3:20-27)

14 Ano udu, Jises tikahei malawin ndra-in udu la-u ndramak ari, mesekei iy basehek sahou bwe. Eme malawin ndra-in dah iu, ma ndramak dah asehek sahou ja. Eme ya iri lau boho iri asak. 15 Arile oro lau rayah anya, “Iy atikah malawin ndra-in iu tasah tinan tiri malawin ndra-in nyaran Belsabul badeh, edeu boto-on ili tan ta amekes lakou doh.” 16 Eme ya iri lau rayah badu bolo oro le badeh, ndremenya iy ma anya kanone iy, ta kamekes kalem badu kandrah ta leheya buku none iy amekes gok ta Kindrei handru.

17 Arile, Jises ndrandrei budon toro ndra-in tan, ya eme iy asehek toro i buk doh, “Ki buku none iri lau badu kon munyak tinan kapou iri ranah i len, ma ranah i len, ma iri amekes bahun, iri lau badu kon doh kameh andra-i. Ya, ki buku none, boho kamen ra-em kaseker, idah kameh, iri lau doh winiyan bales boto-on bwe. 18 Ya, ki buku none oro lau ta Satan kapou oro ki lumuk, ya, ki buku dah handru iy tan boto-on ta atondrok iri lakou? Jo asehek sahou ewek tado dah, tasah ado anya boto-on jo akohok dah, ta atikah iri malawin ndra-in au, badeh, ta Belsabul edeu eme tek. 19 Ya, ki buku none Belsabul aseben jo handru, ma jo katikah iri malawin ndra-in, ya are lau handru aseben iri lau taha ta atikah malawin ndra-in? Sebwe balik aseben oro nadeh? Iri gok oro lau tado amekes, leheya buku none sahou tado badeh, bamwenen bwe. 20 Arile ado kanuhun, i buku none boto-on ta Kindrei amwenen aseben jo ta atikah iri malawin ndra-in, ado ndratana ado kabwe, Kindrei ndrame ta atondrok aha lau mwan ma badih badu Isra-el.

21 “Ya, ki buku ari ndramak boto-on kandrei beteleu tan, ya iy katehei ndrokei ta asiu tan, idah kameh, lakou tan mari udu mwasin. 22 Arile, ki buku none ari ndramak boto-on ja, keme hawen uru kada uru, idah kameh, ndramak hamon nane, kameh idi iy ma kuhi lakou tan ta bahun kameh iu. Ano, iy akohok lakou tan mari ma atehei i tiri lau.

23 “Ya, eme are lau iy kawas tek bwe, iy ndramak ta amekes bahun eme tek. Ya are lau baseben jo ta atukum iri lau kame ka-en hamon ta Kindrei bwe, iy kameh atikah iri lau ka-en ndra len ta Kindrei.

Malawin ndra-in eme hamon ja

(Metiu 12:43-45)

24 “Buku none ari ndramak tikahei malawi ndra-in ereu la-u ari ndramak iu, malawi ndra-in doh iu laleyah i bolo kon lomale an ta iy katakaleh ari kon ja, iy kili aliy. Eme, buku iy batou ari kon mwasin ta iy ili aliy bwe, 25 iy kameh asehek, ‘Jo ndrawoyah ai, sebwe jo kili hamon kili asiu tek bwena mene jo ereu aliy.’ Eme iy ili hamon anyolom asiu nane ereu laleyah, ndrasahan ha-un, ma ndranyosowani kabwe. 26 Ehe, iy atou buku doh, eme iy ili hamon ja andrei oro malawi ndra-in ndro taloh ja sakalawi iy ta amekes kandriyen ndra-in. Ya oro kameh ala bolo asiu nane. Ya eme ndramak dah, bala buku bwena mene ja bwai, iy ndrandra-i labai ai.”

27 Eme Jises asehek sahou kahis le badeh, udu bolo iri lau mari nane dah, badih tasou ari aloh, “Sekesek handru labai i tare badih atehei ou, ma hawe nyohonei ou badeh.”

28 Arile, Jises tiye ja i buku doh, “Sekesek badeh, ki toro are lau anuhun sahou ta Kindrei, ma an hamon ta aliy.”

Kalem ta propet Jona

(Metiu 12:38-42; Mak 8:12)

29 Eme lau ame a sola badeh, Jises tiye i tiri anya, “Iri lau mwan ma badih ta len dah badeh, iri ndra-in handru. Iri ndremenya ta anya katou kalem, arile winiyan bwai, kalem ari le kameh iri atou, kalem ta Jona. 30 Jona badeh, i nyara kalem ta lau badu Ninibe na len bwena mene, ya jo Nadu Ndramak Awas ale, i nyara kalem ta lau na len dah. 31 Na len hamon ta Kindrei kameh atehei iri lau mari badu kon munyak dah ala ta mada sahou, badih tinan kabin badu kon tinan Seba, kon tan in loboho kum, kameh ales ereu ta mada sahou, iy kameh asehek ma nyowonya iri kandriyen ndra-in taha lau ta len hamon dah amekes. Tasah, iy badih kabin doh ereu len labai ta Isra-el, arile iy eme ta anuhun le kabin Solomon leheya iri tanan mwasin tan. Na dah, ndramak ari ereu ndrokowa ado, iy sakalawi ja Solomon, arile ado banuhun sahou, ma batubuni ndrine ado bwe. 32 Na len Kindrei le tanan ta edeu iri lau ala ta mada sahou, iri lau mwan ma badih badu Ninibe ale kameh ales ala ta mada sahou, ma iri kameh asehek sahou boto-on labai i taha lau ta len hamon dah. Tasah, iri lau badu Ninibe anuhun sahou Jona asehek, ma iri tubuni ndrine iri. Na idah, ndramak ari ereu ndrokowa ado dah, sakalawi ja Jona, arile ado banuhun sahou tan, ma batubuni ndrine ado bwe!

Sun ta lomada lau

(Metiu 5:15; Metiu 6:22-23)

33 “I buku none ari ndramak iy katelemei sun, iy winiyan batehei bala kon korohan bwe, ma hawe iy winiyan batehei bado bahandra bwekei bwe; iy kameh atehei udu ndrahunen loken. Ya, i buku none are lau eme anyolom kameh, iy eme asiu. 34 Mada ado badeh, i buku lomada sun ta atelem bolo oda ado. Ya, i buku none mada ado udu mwasin, badeh kameh bolo ado mara-ei idih na lomadan. Arile, i buku none mada ado ndra-in, idah kameh bolo ado kameh ilik. 35 Eme ya mada ado kaleu ta sun udu bolo ado badeh, samak. 36 Ya, i buku none sun lomatani bolo ado mari, ya sese lulik aliy bwe, idah kameh lomadan telemei kon mari. I buku none sun anya badeh, lomatani ado mara-ei.”

Jises asehek sahou nyarahan i tiri Parasi hawe iri lau ta leheya kandriyen tiri Juwis

(Metiu 23:1-36; Mak 12:38-40; Luk 20:45-47)

37 Eme ya sahou ta Jises ano le bohon badeh, Parasi ari andrei Jises i hawen aimon nyamon. Eme Jises ili manyah udu andri aimon nyamon. 38 Eme ya iy anyolom Jises badeh, basikine minen bwe, ya iy aimon nyamon, eme ya iy lomondra solo-an labai.

39 Ano Jises tiye i tan anya, “Ado Parasi badeh, sikine kona bwesam ma kona bwekei tado le, arile bolo ado badeh, ndrarahak le ko-ak hawe manahun ndra-in. 40 Ado bale ado bwe! Ndramak mene amekes konan badeh, iy ale amekes bolon. 41 Abo, i buku none ado anya kamekes kandriyen mwasin udu bolon ma konan badeh, ado kanyohan lakou udu bolo bwekei ki tiri lau tiri lakou bwe. Ma idoh kameh ado asahan mwasin.

42 “Ado Parasi, mada ado kaleu! Sisi-in laba tinan kameh ewek bwele-e ado! Ado badeh, apou la-ukei mint hawe la-ukei ruwe tado badeh, i ronoh, ronoh. Ano ado adeu ari ari badu bolo ronoh doh, i ta Kindrei. Ado ale, amekes i buku aliy i ta lakou mari badu bilin tado. Idoh mwasin, arile ado ndramani iri kandriyen ta tikisiy hawe kandriyen mwasin ta Kindrei. Sebwe mwasin ta ado ka-en hamon ta sahou batanau tinan ma ado samani iri sahou batanau bwisik nane ale.

43 “Ya ado Parasi, mada ado kaleu! Sisi-in laba tinan ale kameh ewek bwele-e ado! Tasah, ado badeh, aseken le ta manyah ado bada bwabwai mwasin udu ndrahu tukum taha Juwis. Ma hawe ado badeh, aseken lau le badeh, kasumon ado hawe kamasiye ado an bolo ba-en.

44 “Ado ndranuhun! Sisi-in laba tinan doh kameh ewek bwele-e ado! Nyolom ta bada ado badeh, mwasin. Arile bolo ado badeh, ndrandra-i labai, tasah ado badeh, mahu ado ndrala. I buku none iri lau adek ame badeh, banyolom mada lek bwe. Ya eme iri adek bwele-en ma bales balesani iri.”

45 Eme ari badu bolo oro lau ta leheya kandriyen tiri Juwis badeh, tiye i ta Jises anya, “Ndramak ta leheya, ou asehek sahou badeh, eme orowei aso amwenen.”

46 Eme Jises tiye i hamon ja anya, “Ado lau ta leheya kandriyen tiri Juwis, mada ado kaleu! Sisi-in laba tinan ale kameh ewek bwele-e ado! Tasah, ado atisih lau na kandriyen malen solo-an labai ta iri ka-en hamon ta aliy. Arile, ado badeh, batehei mine ado ta aseben bwe.

47 “Ado ndranuhun! Sisi-in laba tinan doh kameh ewek bwele-e ado! Tasah, iri propet mene, tubu ado oro amwenen badeh, adai oro. Eme ado lowosa lek amwenen badeh, ta aliy ai. 48 Eme ya ado kede-eh asakau ado laleyah, i buku none tubu ado mene amekes. Tubu ado oro adai iri propet, ya ado badeh, kani ado ta a-eh lek ai. 49 Ado kanuhun kamwenen! Tasah, ta katin doh, na tanan ta Kindrei mwasin le, iy anya, ‘Jo kameh suni iri propet hawe iri lau ta batun tiri lau ta Kindrei, ala hawe iri. Ma idah kameh, iri adai iri propet rayah amak, hawe adai iri lau rayah ta batun tiri lau ta Kindrei kameh amak ma hawe bwese isi tinan.’ 50 Ya eme ado lau na len dah kameh a saluwe iri lau ala adai iri propet mene amak, kabatana munyak asahan le. 51 Udu ndra kabatana ndraye Ebol eme isos ndraye Sekaraya, mene adai iy ya ndrayen amou udu ndrokowa mada koto-ok ma asiu ta atudun. Eme jo bawendreya bwe, ado lau na len dah kameh a saluwe oro bwese isi mari doh.

52 “Ado lau ta leheya kandriyen tiri Juwis, mada ado kaleu! Sisi-in laba tinan ale kameh ewek bwele-e ado! Tasah, ado ndrasulu-i kou ta asiu ta akohok tanan handru ndrala. Eme ya ado amwenen ale, bala se bolon bwe, ya eme iri lau buku liliy anya ka bolon, arile ado aturuk san ta iri sala bolon.”

53 Ano, Jises udu hawe iri anya ki-iu badeh, iri Parasi hawe iri lau ta leheya kandriyen tiri Juwis badeh, asehek sahou ndra-in ta losen i tan, hawe lelen iy ta ndremenya solo-an. 54 Iri anya kamekes iy kasehek saba sahou ndra-in ya iri kabarah iy.

Copyright information for `LID