aAisaya 40:3-5

Luke 3

Jon ta alomwa lowosa san

(Metiu 3:1-12; Mak 1:2-8; Jon 1:19-28)

Idoh, udu bada jaha ronoh limeh ta Sisa ari ja nyaran, Taiberiyus atondrok kon mari; eme Pontiyus Pailat badeh, atondrok kon loboho Judiya. Ya Herot badeh, atondrok kon loboho Galili. Ya nadu tinen Pilip badeh, atondrok kon loboho Ituriya hawe Trakonitis; ma Lisaniyas atondrok Abilene, ya Anas uru Kayapas badeh, uru lau tinan tiri pris. Eme nadu Sekaraya Jon udu kon lomale an, ya eme Kindrei suni sahou i tan. Eme Jon edek ili bolo kon mari badu loboho gwa Jodan ili atiye sahou, ta tiye iri lau katubuni ndrine iri ta kandriyen ndra-in ma Kindrei kameh sikine iu. I buku none propet Aisaya mene ndratorowenei udu bolo tarou tan:

“Ndramak ari aloh udu bolo kon lomale an i buku doh,
‘Kalowosa san ta Laban, ma kadik san kales lewan.
Bolo sa-eu badeh, katurukiy kanyemes keme loke,
ma hawe iri bwili ndrondro-ou hawe mandrei badeh, katiriy kanyemes keme andri,
Ma san mwekele-eu badeh, kales le,
Ma san totokon badeh, kanyemes le.
Ya eme iri lau mari kanyolom ndramak ta seben ta Kindrei.’ ” a 
Eme iri lau solo-an ame hawe Jon ta iy kinyu iri. Arile, iy tiye i tiri i buku doh, “Aha badeh, mwak ndra-in. Are lau tiye aha ta atobwak au a len ta losen ta Kindrei kameh eme? Ado kadeu nah ma ado kabatanau oro ta oro katubuni ndrine oro ta kandriyen ndra-in toro ki san ta tikisiy. Ya ado sabudon ado ma satiye ado sala buku doh: ‘Aso badeh tama aso Abraham, eme ya aso anya, aso mwasin.’ Arile bwe. Jo katiye tado kamwenen, Kindrei winiyan mesekei iri bek dah, winiyan asahan i nadu Abraham. Samen kamondrou ta Kindrei badeh, ndrala ndrado mwe-e kei, ya iri kei ala bato-ou sali iri bala mwasin bwe, idah kameh amundroh iri ala andri, ano ma akeh iri au ala bolo jih.”

10 Eme iri lau ndremenya, “Ya ahi kameh ki buku sah handru bah?” 11 Eme Jon anya, “Ado lau heh, awin tado la-uh, ado kanyohan ari ki ta ndramak tan awin bwe. Ma are lau nan nyamon udu aliy, iy kanyohan ki na ndramak nan nyamon bwe.”

12 Ano iri lau ta akohok luk ta takis ame anya kanyu iri ma iri ndremenya Jon, “Ndramak ta leheya, ahi ka buku sah handru bah?”

13 Ya eme Jon anya, “Ado sakohok lakou sawek la-u lakou tado bwena ja!”

14 Eme iri lau rayah ta bahun ndremenya iy ja, “Ya, aso ka buku sah bah?”

Eme iy tiye i toro, “Ado kasekesek ta sihine ado le. Ya ado sawendreya ta satara luk ta ari ndramak, ma ado sandres ndramak laleyah ta sahou.”

15 Eme ya mada iri lau asak, ma iri lomondra i bada Jon. Eme ya iri anya, “Iy sala Krais?” 16 Eme Jon anya, “Jo alomwa ado na gwa, arile ndramak ari in hamon tek eme kameh, boto-on tan badeh, sakalawi boto-on tek ja. Jo badeh, mwasin handru bwe, ta talou malou ta molowa ku-i katin bwe. Arile, iy kameh inyu ado na boto-on ta Malawin Ndrabun ma aleben ado buku jih. 17 Ma iy andrei lakou tan udu minen ta asorok bada kalom eme len lewa salin. Idah kameh iy atukum sali kalom ili asiu ta asumwe nyamon, ma idah kameh, iy asun iri bada kalom ili bolo jih ta winiyan bamak bwe.”

18 San solo-an, Jon badeh atiye sahou mwasin ta aliu iri. 19 Ya eme Jon asehek sahou boto-on i ta Herot, ndramak ta atondrok, tasah iy sudi udu nadu tinen Pilip Herodiyas i tan, hawe iy amekes kandriyen ndra-in solo-an labai. 20 Ano ma ndra-in labai ja badeh, iy atehei Jon i bolo kou.

Jon inyu Jises

(Metiu 3:13-17; Mak 1:9-11)

21 Jon bala bolo kou bwe le badeh, iy anyuwi iri lau mari, ano iy inyu Jises. Eme ya iy amekes salom le badeh, kandrah asak, ano 22 Malawin Ndrabun atah i buku ban eme andri eme bwele-en. Ya eme aloh ari udu kandrah tiye i buku doh, “Ou badeh, naduk handru, ma ou adek handru; ou le mesekei jo sekesek labai.”

Sare Jises

(Metiu 1:1-17)

23 Ano Jises jaha tan ndra buku none tonoh (30), iy amekes lahou tan eme len. Eme iri lau mari abudon anya tama Jises badeh, Josep. Arile,

  • tinen badeh, edek ndrine Heli,
24 
  • ano Heli edek ndrine Matat,
  • ano Matat edek ndrine Libai,
  • ano Libai edek ndrine Melki,
  • ano Melki edek ndrine Janai,
  • ano Janai edek ndrine Josep,
  • 25 
  • ano Josep edek ndrine Matatiyas,
  • ano Matatiyas edek ndrine Amos,
  • ano Amos edek ndrine Nahum,
  • ano Nahum edek ndrine Esli,
  • ano Esli edek ndrine Nagai,
  • 26 
  • ano Nagai edek ndrine Mat,
  • ano Mat edek ndrine Matatiyas,
  • ano Matatiyas edek ndrine Semen,
  • ano Semen edek ndrine Josek,
  • ano Josek edek ndrine Joda,
  • 27 
  • ano Joda edek ndrine Jo-anan,
  • ano Jo-anan edek ndrine Resa,
  • ano Resa edek ndrine Serubabel,
  • ano Serubabel edek ndrine Seyaltiyel,
  • ano Seyaltiyel edek ndrine Neri,
  • 28 
  • ano Neri edek ndrine Melki,
  • ano Melki edek ndrine Adi,
  • ano Adi edek ndrine Kosam,
  • ano Kosam edek ndrine Elmadam,
  • ano Elmadam edek ndrine Er,
  • 29 
  • ano Er edek ndrine Josuwa,
  • ano Josuwa edek ndrine Eliyeser,
  • ano Eliyeser edek ndrine Jorim,
  • ano Jorim edek ndrine Matat,
  • ano Matat edek ndrine Libai,
  • 30 
  • ano Libai edek ndrine Simiyon,
  • ano Simiyon edek ndrine Juda,
  • ano Juda edek ndrine Josep,
  • ano Josep edek ndrine Jonam,
  • ano Jonam edek ndrine Eliyakim,
  • 31 
  • ano Eliyakim edek ndrine Meleya,
  • ano Meleya edek ndrine Mena,
  • ano Mena edek ndrine Matata,
  • ano Matata edek ndrine Netan,
  • ano Netan edek ndrine Debit,
  • 32 
  • ano Debit edek ndrine Jesi,
  • ano Jesi edek ndrine Obet,
  • ano Obet edek ndrine Bowas,
  • ano Bowas edek ndrine Salmon,
  • ano Salmon edek ndrine Nason,
  • 33 
  • ano Nason edek ndrine Aminadap,
  • ano Aminadap edek ndrine Atmin,
  • ano Atmin edek ndrine Arni,
  • ano Arni edek ndrine Hesron,
  • ano Hesron edek ndrine Peres,
  • ano Peres edek ndrine Juda,
  • 34 
  • ano Juda edek ndrine Jekop,
  • ano Jekop edek ndrine Aisik,
  • ano Aisik edek ndrine Abraham,
  • ano Abraham edek ndrine Tera,
  • ano Tera edek ndrine Nahor,
  • 35 
  • ano Nahor edek ndrine Seruk,
  • ano Seruk edek ndrine Reu,
  • ano Reu edek ndrine Pelek,
  • ano Pelek edek ndrine Eber,
  • ano Eber edek ndrine Sela,
  • 36 
  • ano Sela edek ndrine Kenan,
  • ano Kenan edek ndrine Apasat,
  • ano Apasat edek ndrine Sem,
  • ano Sem edek ndrine Nowa,
  • ano Nowa edek ndrine Lemek,
  • 37 
  • ano Lemek edek ndrine Matusala,
  • ano Matusala edek ndrine Inok,
  • ano Inok edek ndrine Jaret,
  • ano Jaret edek ndrine Mahalalel,
  • ano Mahalalel edek ndrine Kenan,
  • 38  ano Kenan edek ndrine Inos, ano Inos edek ndrine Set, ano Set edek ndrine Adam, ya ano Adam badeh, nadu Kindrei.
    Copyright information for `LID