Luke 5

Jises aloh oro lau tan

(Metiu 4:18-22; Mak 1:16-20)

Ano na len ari ja, Jises badeh, ales udu babi ta gwa li ari aloh Genesaret. Ya iri lau badeh, awudi iy, kon aso, ta anya kanuhun sahou ta Kindrei. Eme madan ili badeh, atou ndron lu-ei ta ni iri aluwi in babi. Oro lau ta ni badeh, ruwani ndron udu gwek, ya oro soroya kubwin toro. Eme Jises sandroh in bolo ndron ta Saimon, eme iy tiye Saimon susuwini iy i len sese ta babi. Ya eme Jises udu ndron badeh, leheya sahou ta Kindrei i tiri lau mari an babi. Eme sahou tan ano le badeh, iy tiye i ta Saimon, “Ado kasowe kame len, ya ado kakeh kubwin tado ki gwa, kawe-ek ni.”

Eme Saimon anya, “Ndramak ta leheya, aso badeh, ndramekes na ben ari buruwen ndra-au, arile aso bakohok se ni bwe. Arile, in hamon ta bohom ou ndratiye, jo kameh akeh kubwin ili gwa ja.” Eme oro akahei kubwin i gwa, eme ya kubwin toro anya katarah, tasah ni badeh, solo-an labai. Eme oro anyoleh i toro lau toro are ndron ra-ei ja kame kaseben oro. Ano oro weleyani ndron toro, ma lu-ei na ni, ma ndron toro anya katuh.

Eme Saimon Pita anyolom lakou dah asahan, ma iy taku i andri na bwili ndru-un udu kati Jises, ma tiye i buku doh, “Ou sado madak Laban, ou au. Jo badeh, kandriyen tek ndra-in!” Ya eme Saimon hawe oro lau tan ta ni are hawen badeh, mani oro atur labai, tasah ni oro kuhiy solo-an labai. 10 Ma uru lau badu hawe Saimon, Jemis uru Jon nadu Sebedi badeh, mani uru atur ale. Ano Jises tiye i ta Saimon, “Kabwai, ou sanoh; na dah, ma na len hamon eme, ou kameh akohok iri ndramak, i buku ou awe-ek ni badeh.” 11 Eme oro aluwi ndron toro eme babi eme loken, ano oro ruwani lakou toro mari udu api, ma oro an hamon ta Jises.

Jises amekes ndramak ari sik lepra udu tan amwenen ja

(Metiu 8:1-4; Mak 1:40-45)

12 Ano na len ari ja, Jises udu kon tinan ari, ya udu loboho doh badeh, ndramak ari sik lepra ini badan mari. Iy eme atou Jises le badeh, iy morahani iy i andri anyolou iy anya, “Laban, i buku ou aseken ou winiyan mesekei jo kamwenen ja udu mada Kindrei!”

13 Eme Jises atehei minen i badan ma tawi iy, ano iy tiye, “Jo aseken. Ya ou amwenen ja.” Eme ma sik lepra tan amai i le rasan.

14 Ano Jises tiye i tan, “Ou satiye lakou dah, sala ta ari ndramak labai; arile ou ales ala hawe iri pris, leheya badam ki tiri kanyolom; ano ou adeu salom ta asun i le buku Moses mene ndrabatanau. Ya eme iri kanyolom ma katanan ou badeh, ndramwenen ja.”

15 Arile, sahou ta nyala Jises badeh, ndraseker ndra tinan labai, eme ya iri lau solo-an ame ta anuhun sahou tan, ma hawe kamekes iri kamwenen. 16 Arile len solo-an badeh, Jises iu ili kon lau aliy bwe ta asolom.

Jises amekes ndramak ari badan imek amwenen ja

(Metiu 9:1-8; Mak 2:1-12)

17 Ano na len ari ja, Jises leheya iri lau mwan ma badih udu bolo asiu ari. Eme iri Parasi,
(5:17) Parasi badeh, moson Ndramak ta atondrok kandriyen malen tiri Juwis, ma ta anyolom lau mari badeh, ka-en hamon ta aliy
hawe iri lau ta leheya kandriyen tiri Juwis, badu bolo kon tinan Galili, iri badu Judiya ma hawe badu Jerusalem ame manyah anuhun Jises asehek sahou. Ya eme boto-on ta Laban badeh, eme la-u Jises ta amekes iri lau sik udu tiri kamwenen.
18 Eme lau rayah badeh, bwese-ei ndramak ari, badan imek udu bada sau eme. Oro anya kabwese iy keme bolo asiu, ma kadeu iy kudu mada Jises. 19 Arile iri lau solo-an labai, eme oro san ta bwese iy ili bolo asiu bwe. Eme oro bwese-ei ndramak dah i loke bwele-e asiu, ano oro bosokei bwele-e asiu dah, ma atehei ndramak dah, in bada nyahan i andri bolo lau nane dah, ili udu mada Jises. 20 Ya eme Jises anyolom budon toro handru, eme iy tiye i ta ndramak dah, “Kawas tek, kandriyen ndra-in tam ndrasikinei ndra-au.”

21 Eme oro lau ta leheya kandriyen tiri Juwis, hawe oro Parasi badeh, asehek i toro ari ari anya, “Iy ndramak kede-eh bobose o! Iy aluhe Kindrei kede-eh! Ari ndramak winiyan basikine kandriyen ndra-in bwe; Kindrei le ari, kabwe!”

22 Eme Jises badeh, ndratanan budon toro, eme iy tiye i toro, “Tasah handru ado ndremenya solo-an udu ndrine ado? 23 San manamun ndraheh, katiye, ‘Kandriyen ndra-in tam ndrasikine ndra-au,’ deh, bwe katiye, ‘Ou suri ou, ma ou adek.’ 24 Jo winiyan leheya ewek tado ma ado ki tana ado, ta Nadu Ndramak Awas badeh, boto-on labai udu bwele-e munyak dah ta tiye i ta ndramak ta mani kandriyen ndra-in tan iu.” Eme Jises tiye i ta ndramak badan imek dah, “Jo tiye tam, ou suri ou, ou andrei nyahan tam ma ou au a kon!”

25 Ano suwi labai, iy suri iy eme loken udu mada iri mari, ma andrei nyahan tan nane, ma iy atudun Kindrei udu bohon, ma iu i kon. 26 Eme iri mari badeh, mani iri atur handru en, ma iri atudun nyara Kindrei. Ya boho iri asak, ma iri tiye i buku doh, “Taha na dah badeh, ndranyolom kalem randrah labai.”

Jises aloh Libai

(Metiu 9:9-13; Mak 2:13-17)

27 Ano Jises eme len badeh, iy atou ndramak ari ta akohok luk ta takis, nyaran Libai, iy manyah ereu bolo asiu tan ta gok ta akohok luk ta takis. Eme Jises tiye i tan, “Ou ame an hamon tek.” 28 Eme Libai ruwani lakou tan mari, ma iy in hamon tan.

29 Ano, Libai mesekei tine nyamon udu asiu tan, i na Jises. Ma hawe iri lau solo-an ta akohok luk ta takis badeh, ame aimon nyamon hawe oro ale. 30 Ya oro Parasi rayah, hawe oro lau rayah ta leheya kandriyen tiri Juwis, badu bolo oro nane dah, nunu-uh oro lau ta Jises anya, “Tasah handru ado aimon nyamon hawe oro lau ta akohok luk ta takis, ma hawe oro lau ale ba-en hamon ta batanau ta Moses bwe?”

31 Ya eme Jises asumon i buku doh, “Iri lau ale babo sik bwe, iri winiyan baso-ok ndramak ta anyumor bwe. Arile, iri lau tiri sik le badeh, aseken seben. 32 Jo eme dah ta aseben lau mwasin le, bwe. Jo eme dah badeh, ta aseben iri lau ta karei ma lomondra ndra-in udu tiri badeh, katubuni ndrine iri, ma iri kasahan mwasin.”

Ndremenya ta san ta abeles ta nyamon

(Metiu 9:14-17; Mak 2:18-22)

33 Eme ya iri ndremenya Jises anya, “Oro lau ta Jon ta alomwa mene abeles oro ta nyamon, ma hawe oro amekes salom solo-an sese. Ma hawe oro lau tiri Parasi badeh, amekes i le buku oro le; arile oro lau tam badeh, babeles oro ta nyamon bwe.”

34 Eme Jises asumon i buku doh, “I buku none ndramak tasou bolohau udu aliy, ado winiyan babilisi oro lau ta molak bwe! 35 Arile, na len hamon eme kameh, iri lau ta kaliu tan kuhi iy eme len, ma na len doh kameh oro winiyan baimon nyamon bwe.”

36 Ano Jises tiye sahou sokek ari ja i toro i buku doh, “Ari ndramak winiyan batarani kolau ha-un, ya iy winiyan baserehei bala ta ndrabwak, udu ta kolau malen bwe. Ya i buku none iy kaserehei kolau ha-un ki aliy kameh tarani andra-i labai. Ma kolau malen kameh ndrabwak i tinan le gwek, ma winiya kolau ha-un bala winiyan ja bwe. 37 Ari ndramak winiyan basukuni waen ha-un bala bolo ku-i me malen bwe. Buku none iy amekes i buku doh, waen doh kameh tuburok, ma kohan kameh tarani ku-i me nane, ma waen kamou ma iu laleyah; ma ku-i me ale kameh andra-i. 38 Arile, waen ha-un badeh, ki bolo ku-i me ale ma bweseken kahis le.” 39 Eme iy anya, “Ma idah kameh, iri lau ndra-un waen malen kameh bwale iri a-un waen mamakahis le, tasah iri anya waen malen badeh, simidin.”

Copyright information for `LID