bSekaraya 13:7

Mark 14

Pris tinan ma hawe lau ta leheya kandriyen tiri Juwis takaleh san ta aseu ma kadai Jises

(Metiu 26:1-5; Luk 22:1-2; Jon 11:45-53)

Ya idah kameh, len la-uh ano, ya hamon ta aliy badeh, len ndrabun aloh Pasoba ma hawe nyamon tinan ta jabi ramen yis bolon bwe, kameh asahan. Eme iri lau tinan tiri pris ma hawe iri lau ta leheya kandriyen tiri Juwis badeh, takaleh madasan ta bahana ta ateu Jises ma anya kadai iy. Tasah, iri anya, “To samekes sado bolo len ta nyamon tinan, ndri-iy, bwe kameh iri lau solo-an kabokoro-ei ma bahun kasahan.”

Badih ari asolou suluw i bwele-e Jises

(Metiu 26:6-13; Jon 12:1-8)

Ya eme Jises udu Betani udu asiu ta Saimon ale lepra mene udu tan. Ya iy manyah udu bada sau aimon nyamon. Eme ya badih ari eme hawen ma bwisi ndrau suluw tan amekes na kandro kei aloh nat. Ya sowan badeh, laba tinan labai. Eme iy tubwani bale bwisi ndrau suluw iu, ano iy asolou i batu Jises.

Eme ya oro lau rayah abolosen ma tiye i toro ari ari i buku doh, “Aden! Tasah handru iy asolou suluw doh iu laleyah? Ndrelekei doh nane katehei kili mada ba-en ya winiyan asahan i luk denariyus ere bwele-e tonek (300),
(14:5) Kane luk doh ja sakalawi luk i buku sihine ndramak ta lahou iy amekes udu bolo jaha ari buruwen.
ya kanyohan ki tiri lau lakou bwe.”

Arile Jises anya, “Ado karuwani iy. Ado abudon andra-i i ta iy badih kede-eh tasah? Badih kede-eh ndramesekei lakou tinan ma mwasin labai ndrame tek. Ya idah kameh, iri lau tiri lakou bwe kameh len mari iri are hawe ado, ma i buku none ado aseken, ado winiyan aseben iri, arile jo kameh winiyan bado hawe ado len mari bwe. Lakou iy badih dah anya kamekes badeh, asah iy ndramesekei dah. Iy asolou suluw badeh, i badak udu bwena dah, ta lowosa jo ta ki lek. Ya jo tiye handru i tado. Saba kon iri atiye sahou mwasin ili udu bolo kon munyak dah, saba lakou iy ndrabwidiy dah kameh iri asehek ta aliy ta abudon nyaran.”

Judas iu edeu sa-oh ta Jises

(Metiu 26:14-16; Luk 22:3-6)

10 Ano ya, iy ari badu hawe oro lau tan ma ronoh la-uh nyaran Judas Iskariyot, iu i hawe iri lau tinan tiri pris anya kedeu sa-oh ta Jises ki mine iri. 11 Eme iri tinan tiri pris anuhun badeh, iri sekesek ma tandrakan Judas ta kanyohan iy na luk. Eme Judas takaleh san ta edeu Jises ki mine iri.

Jises aimon nyamon ta Pasoba hawe oro lau tan

(Metiu 26:17-25; Luk 22:7-14; Luk 22:21-23; Jon 13:21-30)

12 Eme na len ma mwena ta nyamon tinan ta jabi ramen yis bolon bwe eme asahan, na len ta adai iri nadu sipsip i ta salom ta Pasoba, eme oro lau ta Jises ndremenya iy, “Ou aseken aso kala heh kamekes ma kalowosa ta to kaimon nyamon ta Pasoba kado aliy?”

13 Eme ya iy suni uru lau tan ma la-uh ma tiye turu i buku doh, “Ah kala bolo kon tinan Jerusalem ya idah kameh ndramak ari bwese gwa in bolo sabok kameh ndruni ah. 14 Eme ah ka-en hamon tan kala asiu ala iy anya ki bolon en, eme ah katiye ki ta ndramak ta asiu ki buku doh: ‘Ndramak ta leheya anya, asiu tan ndraheh? Ya idah kameh oro lau tan ma iy kameh aimon nyamon ta Pasoba a-en aliy.’ 15 Ya idah kameh iy leheya ah ta bolo asiu ari udu loken badeh, ndralowosaniy le. Eme ah kala aliy kamekes nyamon tato kudu le ai.”

16 Eme uru lau ta Jises dah adek au a kon tinan, eme uru takalahei i le buku none ndrasihidiy turu, ma oro lowosani nyamon ta Pasoba ma asiu buku le aliy.

17 Ano kon abeyeh Jises eme hawe oro lau tan ma ronoh la-uh ai. 18 Eme oro an ndra andri aimon nyamon badeh, Jises asehek i toro i buku doh, “Jo tiye sahou handru ewek tado, iy ari ereu bolo ado kede-eh kameh atehei jo i mine iri lau ndra-in, iy ala aimon nyamon hawek en.”

19 Eme oro tikisiy labai, ma oro ari ari ndremenya iy anya, “Jo nadeh, jo nadeh?”

20 Eme Jises tiye i toro, “Ari badu bolo ado ma ronoh la-uh dan. Iy are alomwa jabi ramen i bolo bwekei hawek en. 21 Tasah, Nadu Ndramak Awas kameh imek buku le none tarou mene ndratorowenei ta nyalan. Arile, sisi-in laba tinan kameh i bwele-e iy ndramak nane ale atehei Nadu Ndramak Awas ili mine iri lau ndra-in, sebwe mwasin tinen mene satuwi iy, ndri-iy!”

Jises asehek ta nyala odan ma ndrayen

(Metiu 26:26-30; Luk 22:14-20; 1 Korin 11:23-25)

22 Kala oro aimon nyamon doh, Jises kuhi jabi ramen, ma iy asalom i la-un, ano iy boso-ei i noro. Ano iy tiye i toro i buku doh, “Ado kandrei, idah odak amwenen.”

23 Ano iy kuhi bwiniu waen, ma iy edeu wurah i ta aliy, ano iy edeu i wa-i oro lau tan, eme ma oro mari a-un. 24 Eme Jises tiye i toro ja, “Idah ndrayek ta sahou randra le, ma idah kameh amou ta lau mari. 25 Jo tiye tado handru. Jo winiyan ba-un ndraye buwa waen dah hawe ado ja bwe, winiya le len jo kameh a-un ja i san ha-un udu bolo tondrok ta Kindrei.”

26 Eme oro ayah wari ari ta atudun, ano ma oro au ala mandrei Olip.

Jises nyowonya besebes ta Pita

(Metiu 26:31-35; Luk 22:31-34; Jon 13:36-38)

27 Oro adek ala le kahis, eme ma Jises tiye i toro anya, “Ado mari kameh ruwani jo, tasah iri ndratorowenei bwena udu bolo buk ndrabun asehek i buku doh,

‘Jo kameh idi ndramak ta tondrok, ya iri sipsip tan kameh aseker laleyah.’ b 
28 Arile, hamon ta aliy kameh jo amak ja, ya jo kameh ili bwena tado ili Galili.”

29 Ya eme Pita tiye i tan i buku doh, “I buku none oro mari anoh ma aseker, jo winiyan batobwak bwe.”

30 Eme Jises asehek i tan anya, “Handru jo asehek tam. Na ben dah kameh, kakaro baden san lusan bwe le badeh, ou kameh besebes anya ou tanam jo bwe san tulusin.”

31 Arile, iy tiye sahou boto-on boto-on i buku doh, “Jo winiyan basehek sahou badeh bwe, buku none jo imek hawem jo winiyan babesebes anya jo tanan ou, bwe.” Eme ya oro mari badeh, asehek sahou randra le.

Jises asolom in bolo bilin Getsemeni

(Metiu 26:36-46; Luk 22:39-46)

32 Eme ma oro adek au ala kon ari aloh Getsemeni. Eme iy tiye i toro lau tan, “Ado kamanyah kado dah, ya jo kameh asolom ki ta Kindrei.”

33 Ano iy kuhi Pita, Jemis ma hawe Jon oro a hawen, eme Jises atona bolo odan badeh, amaha ma sisi-in hawe iy tikisiy. 34 Eme iy tiye i toro anya, “Jo tikisiy labai, ma jo anya kimek. Ado kado dah ma mada ado katele.”

35 Eme ya Jises edek ili bwena sese, ma iy taku i andri bada ndren. Eme ma iy asolom i buku doh, i buku none winiyan eh, len doh ki-iu ki len tan. 36 Eme ma iy anya, “Tama, tama, lakou mari badeh, ou ndra winiyan le ai. Ou andrei bwiniu dah ki-iu ki len tek, arile idoh budon tek le, ou amekes saba lakou ou tanam mwasin.”

37 Ano iy eme hamon iy atou oro lau tan ma taloh nane dah ndramadin. Eme iy mete-ei oro ma tiye i ta Pita anya, “Saimon, ou kede-eh ndramadin? Buku sah handru ya ou winiyan bareu loken luluwen bwe? 38 Ado kanyolom ma ado kasolom ki ta Kindrei ta ado sataku sala bolo kandriyen ndra-in. Ndrine ado aso-ok handru ta amekes gok, arile oda ado badeh, boto-on handru bwe.”

39 Ano ja iy iu i hamon asolom ma tiye sahou nane le i ta Kindrei. 40 Ano iy eme hamon badeh, iy atou oro ndramadin ja, tasah mada oro badeh, maha-an ta amadin labai. Eme ya oro randra sahou ta tiye i tan bwai. 41 Ano iy eme hamon i san tulusin ja badeh, ma iy anya, “Ado kede-eh amadin ma amunyau kahis le? Ka-iy ai! Mada an ndrasahan. Ado katou! Idah kameh Nadu Ndramak Awas kameh ili mine iri lau ta lomondra ndra-in ai. 42 Ado kareu loken, to ka-au. Ado katou, iy ndramak ta atiye jo ili mine iri lau ndra-in asah ndrasahan kede-eh.”

Iri ateu Jises

(Metiu 26:47-56; Luk 22:47-53; Jon 18:3-12)

43 Ya eme Jises asehek sahou kahis le, Judas, iy badu hawe oro lau ma ronoh la-uh nane, edek eme hawen, hawe iri lau solo-an ma samen hawe kei udu mine iri. Iri tinan tiri pris ma hawe iri lau ta leheya kandriyen tiri Juwis ma hawe iri lau-en suni oro ame. 44 Judas nane ndratiye toro i buku doh, “Are lau jo atehei bohok i bohon, badeh iy le ai, ado katawi iy, ma kasirini iy ki-iu ma mwasin.”

45 Eme Judas isos le badeh, iy edek ales amwenen ili hawen ma anya, “Ndramak ta leheya!” Ma iy atehei bohon i boho Jises. 46 Eme ma iri atehei mine iri i ta Jises ma tawi iy. 47 Arile, oro lau tan ari badeh, ales are mirihik nane doh aluwi samen tan, ma iy sani ka-u ndranye bonyo-ou ta tinan tiri pris ari taku iu. 48 Eme Jises tiye i tiri lau marakon doh anya, “Buku sah ya ado ame ma samen hawe kei ta ateu jo, jo ari lau ta amekes ramwes deh? 49 Len mari jo udu hawe aha leheya in asiu tinan ta Kindrei, ya aha bateu jo bwe. Arile bwai. Kasahan ai, ya kamekes sahou ta buk ndrabun kasahan i handru.”

50 Ano oro lau tan mari ruwani iy ma oro atobwak au.

51 Eme ndramak loweu ari in hamon ta Jises ya lakou badan bwe, arile ra-ei le kolau in badan. Eme iri anya kaseu iy, 52 arile iy ruwani kolau tan ma iy ndrakane le sakaliye iu.

Jises udu ta sahou udu mada kansol

(Metiu 26:57-68; Luk 22:54-55; Luk 22:63-71; Jon 18:13-14; Jon 18:19-24)

53 Eme iri sirini Jises i hawe tinan tiri pris ari. Eme iri tinan tiri pris rayah hawe iri lau-en ma hawe iri lau ta leheya kandriyen tiri Juwis mari nane atukum dah. 54 Ya Pita badeh, edek in ndra hamon o-on, eme iy ili bolo kowah ta asiu ta tinan tiri pris dah. Eme iy manyah udu andri hawe iri lau ta atondrok madasan alakan iy i ta jih. 55 Ano iri tinan tiri pris ma hawe iri lau mari badu hawe iri kansol nane anya kanone katakaleh ari sahou wasai kihis bada Jises ta anya kadai iy kimek, arile iri takaleh labwe. 56 Tasah, iri solo-an labai asehek sahou ta wendreya i tan, arile iri batakalahei ari lakou ndra-in Jises mesekei bwe, ma sahou tiri ba-en badan bwe ale.

57 Eme iri rayah ales are loken badeh, asehek sahou ta wendreya i badan, i buku doh, 58 “Ahi mene ndranuhun iy anya ja, ‘Jo kameh tohowei asiu tinan ta Kindrei dah ala amekes na lim kameh iu, ano na len ma taloh ja kameh jo tutuni ari ja, idoh bamekes na lim bwe.’ ” 59 Arile bwai, sahou tiri ba-en se badan bwe ale.

60 Eme tinan tiri pris nane suri iy ereu loken bolo iri eme ma iy ndremenya Jises, “Ou randra sahou ta tiye i ta sahou nane doh oro to-en ewek tam deh bwe?”

61 Arile bwai, iy andru-uk le ai, ma iy batiye se sahou bwe. Ano ja tinan tiri pris ndremenya iy ja anya, “Ou kede-eh Krais handru deh bwe? Ya ou Nadu Kindrei ahi katudun ai?”

62 Eme Jises anya, “Ehe, jo adeh badeh. Ya idah kameh aha anyolom Nadu Ndramak Awas kameh manyah udu loboho lim salin ta Kindrei iy boto-on labai, iy kameh udu bwele-e asi jor badu kandrah eme.”

63 Eme ma tinan tiri pris ibolosen ta sahou doh ya iy tarani awin tan le ma iy anya ja, “I buku sah ja to anya kasilah sahou ta i badan ja? 64 Aha mari ndranuhun sahou bobose nane. Ya aha abudon i buku sah?” Eme iri mari anya, “Kadeu iy ki ta sahou ma kadai iy kimek.”

65 Eme iri rayah omor iy, ma iri tubuluhi madan ma a-um iy ma tiye sahou i tan anya, “Ou none tiye i buku ou propet, are lau a-um ou doh!” Eme iri lau ta tondrok madasan andrei iy ma ubwi iy.

Pita besebes anya iy tanan Jises bwe

(Metiu 26:69-75; Luk 22:56-62; Jon 18:15-18, 25-27)

66 Ya Pita badeh, manyah udu bolon loboho andri kahis le. Eme badih ari lohowan ta ndramak tinan tiri pris edek eme. 67 Eme iy atou Pita alakan iy eme iy anyolom iy boto-on boto-on. Ano i badih dah anya, “Ou kede-eh ale mene are hawe Jises badu Nasaret adeh.”

68 Arile Pita anya ja, “Bwe oh, jo tanan sasah ou asehek kede-eh bo-oh.” Eme ma Pita edek eme madasan le badeh. [Eme ma kakaro eden.]

69 Ya badih ta lohowan nane dah atou Pita ma iy asehek ja i toro lau ales dah, “Iy ndramak kede-eh iy ari badu hawe oro adeh.”

70 Arile iy anya ja, “Jo tanan bwe oh.” Ano luwen bwe iri lau ales tiye i ta Pita ja, “Handru, ou kede-eh ari badu hawe oro, tasah ou kede-eh badu Galili.”

71 Ano Pita tandrakan boto-on labai, “Jo asehek sahou handru, jo tanan ndramak ala ado asehek iy badeh, bo-oh. Buku none jo wasai, Kindrei kamesekei maha-an keme la-uk.”

72 Iy asehek sahou ano le badeh, kakaro eden san lusan ja. Eme Pita bwetenei sahou mene Jises tiye i tan anya, “Kakaro baden san lusan bwe le, ou kameh besebes anya ou tanam jo bwe san tulusin.” Eme ma iy atehei bohon i ta ndrelen.

Copyright information for `LID