Mark 3

Jises amekes lahou udu bolo len ta amunyau

(Metiu 12:9-14; Luk 6:6-11)

Eme Jises iu i hamon ja ili asiu ta atukum tiri Juwis, ya eme ndramak ari in aliy, minen imek. Oro lau rayah ado aliy, eme ya oro anya katakaleh madasan ta kadeu Jises ki ta mada sahou. Eme iri atehei mada iri udu tan, i buku iy kamesekei ndramak dah kamwenen na len ta amunyau dah, deh bwe. Eme Jises tiye i ta ndramak nane minen imek dah, “Ou ame mwena dah.” Ya eme iy ndremenya iri, “Saba kandriyen mwasin kameh taha kamekes na len ta amunyau? Kamekes kandriyen mwasin ta aseben koha lakou deh, bwe kamekes kandriyen ndra-in ta adai lau?”

Eme iri basehek randra sahou bwe.
Eme Jises anyolom ili eme i tiri, eme iy ibolosen, arile bwai, ndrinen ale tikisi iri, tasah iri badeh, ndrandra-i ma ndrine iri ndraso. Ano, iy tiye i ta ndramak nane dah anya, “Minem kales!” Eme iy talasei minen ma minen amwenen ja. Eme oro Parasi ame len ta asiu ta atukum, ma oro au suwi labai atukum hawe iri lau rayah ta Herot, eme ma oro asehek ma atilik nyala oro ta takaleh san ta kadai Jises kimek.

Jises leheya boto-on tan, arile iri lau badu kati kon tan amwenen batehei budon tiri bala tan bwe

(Kalan 3:7–6:6)

Jises asehek sahou mwasin ma amekes lau solo-an amwenen udu Galili

(Luk 6:17-19)

Ano Jises ma hawe oro lau tan ame gwa li Galili, ma hawe iri lau solo-an labai an hamon tan. Iri lau badeh, badu Galili, badu Judiya, ya badu Jerusalem, badu loboho Idumiya, badu loboho kapa gwa Jodan bilisiu ma hawe badu mirihik ta kon tinan Tair hawe Saidon. Iri lau solo-an doh nane ame hawe Jises, tasah iri anuhun lakou solo-an iy amekes. Iri lau solo-an labai, eme Jises tiye i toro lau tan lowosani ndron ra-ei ta iy ki aliy, koro-an lau katisi iy. 10 Iy ndramesekei iri lau solo-an ndramwenen, ya eme iri lau sik udu tiri ndrokowa iri ame hawen, tasah oro anya kateu le badan. 11 Ya eme loboho heh, loboho heh, Jises ili badeh, iri lau malawin ndra-in udu bwele-e iri atou iy le badeh, iri atarah a andri ma aloh, “Ou badeh, Nadu Kindrei!”

12 Eme Jises batanau iri ta iri sanyowonya iy are lau handru, ndri-iy.

Jises aloh oro lau tan ma ronoh la-uh

(Metiu 10:1-4; Luk 6:12-16)

13 Eme Jises iu ili bwele-e mandrei i loke ma iy aloh oro lau ala so-ok tan udu toro. Eme ma oro ame hawen. 14 Eme iy andrei oro lau ma ronoh la-uh dah, eme ma Jises tondrohani nyara oro i aposel, lau badu hawen ma iy kameh tiye oro au a len atiye sahou. 15 Ma iy edeu boto-on i toro ta atikah malawin ndra-in ki-iu.

16 Ya idah nyara oro lau tan ma ronoh la-uh:

  • Saimon (Jises tondrohani nyaran Pita),
  • Nadu Sebedi uru, Jemis uru Jon (eme Jises tondrohani nyara uru Bowanekes, moson “Nadu Kuruh”), ya hawe
  • Enduru,
  • Pilip,
  • Batolomiu,
  • Metiu,
  • Tomas, ma
  • Jemis nadu Alpeyus,
  • Tadeyus,
  • Saimon Selot,
    (3:16-19) Selot badeh, moson Ndramak ta aliu iri Juwis kame len ta baha tondrok ta Rom ma hawe.
  • Judas Iskariyot, iy ale ndramak doh hamon kameh iy edeu sa-oh ta Jises.

Iri anya Jises malawin ndra-in udu la-un ma iy asehek sahou sokek

(Metiu 12:24-32; Luk 11:14-23; Luk 12:10)

20 Eme Jises iu i kon. Udu ja, lau solo-an labai atukum, eme Jises hawe oro lau tan ari len ta aimon nyamon bwe. 21 Eme lowan oro anuhun, ma oro anya kala kakohok iy, tasah iri lau anya, “Iy badeh, ndra lolo-ou.”

22 Iri lau ra-on ta leheya kandriyen tiri Juwis are Jerusalem ame asehek anya, “Jises badeh, Belsabul ndra bwele-en!” Iri ra-on ja anya, “Idoh tinan tiri malawin ndra-in edeu boto-on i tan ta atikah iri au.”

23 Ya eme Jises aloh iri lau ame hawen ma iy asehek sahou sokek ra-on, “Ki buku sah handru tama iri balik Satan katikah Satan? 24 Ki buku sah handru, buku rakon kon buruwen kapou uru ki la-uh ya uru kadai uru, idah kameh ndrokowa uru udu aliy.

25 “Ya, ki buku iri lau badu boho kamen ra-em kaseker, idah kameh iri lau doh winiyan bales boto-on bwe. 26 Ya, ki buku oro lau ta Satan kapou oro ki lumuk, idah kameh iy boto-on bwe, ma kameh nyaran mirihik ano.

27 “Ya, buku none ndramak anya ki bolo asiu ta ndramak boto-on, ma kabahana iri lakou tan, iy kameh amekes sah handru? Ma bwena handru iy kameh sawei iy ndramak boto-on nane na malou boto-on. Ano iy winiyan akohok iri lakou ereu asiu ta ndramak nane.

28 “Jo tiye tado handru! Kindrei kameh winiyan mani kandriyen ndra-in ta lau, ma sahou ndra-in lau asehek. 29 Arile, are lau aluhe i bada nyara Malawin Ndrabun, Kindrei kameh winiyan bamani kandriyen ndra-in tan doh bwe, tasah maha-an tan winiyan bano bwe.” 30 Jises tiye sahou doh, tasah oro ra-on tiye anya, “Iy badeh, malawin ndra-in udu bwele-en.”

Are lau iy lowa Jises

(Metiu 12:46-50; Luk 8:19-21)

31 Eme tine Jises hawe nadu tinen oro asos. Oro ales are manan ya oro suni sahou ili ta ndremenya iy. 32 Ya lau solo-an labai manyah ma awudi Jises, eme oro tiye i tan, “Jises ei, tinem hawe nadu tinem oro are manan kodo-oh, oro anya ou ala.”

33 Eme Jises tiye, “Ado anya tine handru, are lau bah? Ya nadu tine oro handru, lau heh bah?” 34 Iy anyolom ili eme i toro lau nane manyah dah, eme ma iy tiye, “Jo asehek tado, tine ma nadu tine oro handru, asah ado mari manyah kede-eh! 35 Are lau in hamon ta so-ok ta Kindrei, iri badeh, nadu tine mwan ma badih handru, ma tine handru.”

Copyright information for `LID