Mark 5

Jises tikahei malawin ndra-in au

(Metiu 8:28-34; Luk 8:26-39)

Oro ame asos kapa gwa li loboho kon tiri lau Gerasa. Jises udu ndron eme andri le badeh, ndramak ari badu mada lek, malawin ndra-in udu bwele-en eme asahan hawen. Ya ndramak nane dah ndrahu matinou tan badu mada lek ta lau amak, ya ari lau winiyan basawei iy bwe, sen winiyan bwe. San solo-an aseu iy na sen ma sei i sakan, arile iy mindrindri sen amendreh, ma iy sekese-ei andra-i labai, ya ari lau iy boto-on, iy winiyan batawi iy bwe ale. Ben len ben len, iy in mada lek ndrokowa mandrei anyar ma alim iy na bek.

Ya eme iy atou Jises i ndra len on, eme iy sakaliye ili taku udu katin ma atudun nyaran. Eme Jises tiye i tan, “Ou malawin ndra-in, ou ame len ta ndramak badeh.” Eme iy anyar bohon i tinan anya, “Jises Nadu Kindrei, ou anya amekes sasah keme tek? Jo tandrakan ta nyara Kindrei, ou samekes sisi-in same tek.”

Eme Jises ndremenyani iy, “Nyaram are lau?”

Eme iy anya, “Nyarak badeh, Solo-an, tasah aso nyaran bwe!”
10 Eme ya iy asehek sahou ta tikisiy i ta Jises i buku doh, “Ou satikahei aso sa-au ta kon dah.”

11 Eme ya bou rakou buruwen aimon nyamon an ka-u mandrei. 12 Eme malawin ndra-in tiye sahou tikisiy i ta Jises anya, “Ou tikahei aso ka bwele-e bou.” 13 Eme Jises tiye i toro, “Abo, ado ka-au.” Eme malawin ndra-in nane dah ame len ma a bwele-e bou. Ya kane oro bou doh, i buku none luwa (2,000), eme oro sakaliye are bwele-e mandrei ame andri ala bolo gwa li, ma oro amak.

14 Eme ma lau ta atondrok iri bou doh atobwak au a kon tinan ma hawe a lokei asehek i tiri lau. Eme ma iri lau ame anyolom. 15 Iri ame hawe Jises ma iri anyolom ndramak nane malawin ndra-in mene udu la-un nane dah manyah udu andri ai. Iy ndratani kolau ma budon tan ndramwenen ja ai. Eme ma iri anoh. 16 Ya oro lau nane anyolom dah, ala asehek nyala iri ta ndramak mene, malawin ndra-in udu la-un badeh, ndramwenen ja, ma hawe bou.

17 Eme iri tiye Jises ta iy ki-iu ki rasi ja ta loboho doh.

18 Suniya Jises anya ki-iu kili bolo ndron, ya ndramak nane malawin ndra-in udu bwele-en eme tiye sahou tikisiy i ta Jises, ta iy anya ki hawen.

19 Arile Jises bwalen, eme iy tiye i tan, “Ou a kon hawe lowam oro, ya ou asehek nyala oro ta lahou tinan Laban ndramesekei ndrawek tam, ma iy tikisi ou, ma iy mesekei ou ndramwenen ja.”

20 Ya eme ndramak nane dah, iu ili bolo kon ma ronoh udu loboho Dekapolis asehek ta nyala lahou tinan mene, Jises ndramesekei i tan, ya eme iri lau marakon lomondra solo-an.

Jises mete-ei nadu Jairus badih ma mesekei badih ari sik ndra udu tan iu

(Metiu 9:18-26; Luk 8:40-56)

21 Eme Jises i ndron ja iu i kapa gwa bilisiu, eme ya lau solo-an labai, atukum ame le kapa gwa hawen. 22 Eme ndramak ari ta atondrok asiu ta atukum tiri Juwis nyaran Jairus, iy atou Jises ma iy eme taku in katin. 23 Eme Jairus tiye sahou tikisiy i tan i buku doh, “Naduk badih badeh, mirihik ta anya kimek ai, ou ame atehei minem ki tan ya iy kamak ja.”

24 Eme Jises i hawen, ma hawe iri lau solo-an an hamon tan ala ale, ma awudi iy udu le alih.

25 Eme ya badih ari udu aliy, sik ndra udu tan winiya jaha ma ronoh la-uh. 26 Iy ndrakahei luk sabe kolek ndra tiri lau ta anyumor ma amekes iy kamwenen, arile bwe, sik tan bamwenen se bwai. Ya iy akohok sisi-in kahis le, ma sik ja asahan boto-on le gwek. 27 Iy ndranuhun nyala Jises bwena, eme iy sokohani iy i ndrokowa iri lau ili in hamon tan, eme iy tawi kiri awin ta Jises, 28 tasah iy anya, “I buku none jo katawi le kiri awin tan kameh jo amwenen ja.”

29 Eme se nawin bwe, sik ndra tan iu ma ano mara-ei, eme iy atona bolo odan badeh, ndramwenen mara-ei. 30 Jises ndratanan boto-on tan ndrame len, eme iy tubuni madan i tiri lau marakon, eme ma iy tiye, “Are lau tawi awin tek?”

31 Eme oro lau tan anya, “Ou atou lau ahas badam badeh, i buku sah handru, ma ou tiye anya ja, ‘Are lau tawi jo?’”

32 Eme madan ili eme, iy anya kasilah are lau nane amekes lakou doh. 33 Eme badih nane dah tanan lakou nane asahan tan, eme iy inoh ma iy totoreh, ma iy morohani iy i andri kati Jises eme ma iy asehek sasah mene asahan tan. 34 Eme Jises tiye i tan anya, “Nadu badih den, ou atehei budon tam handru in tek, ma mesekei ou asahan amwenen. Ou au ma ndrinem kamunum, tasah sik tam ndra-au ma ndrano mara-ei.”

35 Eme iy asehek sahou kahis le, lau ra-on ado asiu ta Jairus ame tiye ta Jairus, “Nadum badih ndramak. I buku sah ou asehek sahou kahis i ta ndramak ta leheya badeh?”

36 Eme Jises banuhun sahou toro bwe, eme iy tiye i ta Jairus, “Ou sanoh, budon tam handru ki-in tek.” 37 Eme Jises bwalen ari lau sa-en hamon tan, arile Pita le, Jemis le hawe Jon nadu tine Jemis, oro le a hawen ala. 38 Oro ame asos asiu ta Jairus, eme Jises atou iri lau ta kabek taya andra-i labai. 39 Eme Jises i bolon tiye i tiri, “I buku sah ado aden ma taya ndranyen? Nah kede-eh bamak bo-oh, iy amadin le oh.”

40 Eme iri ehe-en iy. Arile iy tikahei iri ame len ta asiu, eme Jises hawe tama nah hawe tinen ma hawe oro lau tan le ala bolo asiu, nane iy nadu badih imek in aliy. 41 Eme Jises tawi minen ma tiye i tan i buku doh, “ Talita kumi,” moson, “Nadu badih, jo tiye i tam, ou amak ame loke.”

42 Eme se nawin bwe, nadu badih dah suri iy ma iy edek (jaha tan badeh, ronoh la-uh). Eme suwi labai mani oro atur. 43 Eme Jises tiye sahou batanau i toro lau, ta oro sala sasehek ta ari ndramak ja ndri-iy, eme iy tiye i toro, “Ado kadeu nyamon ki nan.”

Copyright information for `LID