aAisaya 29:13
bEksodus 20:12; Dutoronomi 5:16
cLebitikus 20:9

Mark 7

Sahou nyala kandriyen

(Metiu 15:1-9)

Eme iri lau ra-on ta leheya kandriyen tiri Juwis, iri badeh, ado Jerusalem ame hawe iri Parasi, atukum ame hawe Jises. Ya iri ndratou oro lau ra-on ta Jises aimon nyamon, ya oro basikine mine oro bala buku none kandriyen tiri Parasi bwe.

Tasah iri Parasi ma hawe iri Juwis mari badeh, winiyan baimon nyamon bwe, i buku none iri basikine mine iri bwena bwe, tasah iri an hamon ta kandriyen ta tubu iri. Ya i buku none iri are baen ame, ya nyamon badu baen iri winiyan baimon bwe, i buku none nyamon basikine bwe. Iri badeh, an hamon ta kandriyen solo-an labai, i buku none san ta sikine bwiniu ma kun hawe kun kaba ma hawe sau.

Ya eme iri Parasi ma hawe iri lau ta leheya kandriyen tiri Juwis ndremenya Jises i buk doh, “I buku sah oro lau tam aimon nyamon ya oro basikine mine oro bwe, ya oro ba-en hamon ta kandriyen ta tubu ahi iri bwe?”

Eme Jises tiye i tiri, “Amwenen handru i buku none propet Aisaya ndratiye nyala aha! Aha asehek na boho aha le, i buku none iy ndratorowenei,

‘Iri lau mwan ma badih dah bwese nyarak eme loken na boho iri le, arile ndrine iri ereu len labai.
Iri asehek sahou batanau ta lau le, arile iri anya, “Idah sahou ta Kindrei.” Idoh ya iri asolom laleyah eme tek.’ ” a 
Eme Jises anya, “Aha ndraruwani kandriyen ta Kindrei, eme aha an hamon ta kandriyen tiri ndramak.”

Eme ja iy tiye i tiri, “Batu aha ndrala labai, ya eme aha baseken batanau ta Kindrei bwai, eme ma aha tawi kandriyen taha le. 10 Moses mene ndratiye,

‘Ou a-en bahandra tamam uru tinem, ma ou anuhun sahou turu,’ b 
ma,

‘Are lau aluhe taman uru tinen, iy kimek ta aliy.’ c 
11 “Arile ado Parasi ma ado lau ta leheya kandriyen tiri Juwis tiye i buku doh, ‘I buku none ari ndramak luk tan ta aseben taman uru tinen, arile iy tiye turu i buku doh, “Luk jo anya kaseben ah na aliy badeh, Korban (moson ta aliy, ndraleheyani ta adeu i ta Kindrei).” ’ 12 Ya, ta san doh ado baseken iy baseben taman uru tinen bwe. 13 Ta kandriyen doh le ado atehei sahou ta Kindrei i andri mara-ei, ma hawe lahou ra-on ja badu hawen, ya ado bwese-ei iri kandriyen solo-an ado akohok ta tubu aha iri ja eme loken mara-ei.”

Lakou ala amekes ndramak andra-i

(Metiu 15:10-20)

14 Eme Jises aloh iri lau mwan ma badih a hawen ja, ya eme iy tiye tiri i buku doh, “Aha mari kanuhun jo, ma aha kabudon kamwenen. 15 Saba lakou badu manan i bolo boho ari ndramak, badeh winiyan bamesekei iy bandra-i bwe. Arile lakou udu bolo bohon eme len idoh kameh, mesekei ndramak andra-i adeh.” [ 16 “I buku none are ndramak ndranyen udu aliy, badeh iy kanuhun!”]

17 Ano iy ruwani iri lau ma iy ili bolo asiu, eme ma oro lau tan ndremenya iy ta sahou sokek nane. 18 Eme ma Jises tiye i toro, “Buku sah? Ado ale budon tado baleu bwe le? Sebwe ado tana ado bwe, sasah udu manan i bolo ndramak, badeh winiyan bamesekei ndramak bandra-i bwe, 19 tasah idoh winiyan bala budon bwe, arile ili ndrabai ano ndramak iu akeh ili sareu.” (Eme sehek ta aliy, Jises anya, nyamon mari mwasin ta aimon le ai.)

20 Eme Jises asehek ili le, “Saba lakou ala udu bolo boho ndramak eme len, lakou don adeh, mesekei ndramak andra-i. 21 Lakou ala udu bolo budon ta ndramak eme len, ma lolowa ndramak amekes lomondra ndra-in. Lakou buku none, kandriyen mari ta karei, kandriyen ta bahana, kandriyen ta adai ndramak imek, ma kandriyen ta amekes tasou andra-i. 22 Ya i buku none kandriyen ta madalakis ta lakou ta ndramak, ya kandriyen ta ramwes, kandriyen ta wendreya l au, kandriyen ta aten lau, kandriyen ta atudun nyaram, ma hawe kandriyen ta nyaladan. 23 Iri kandriyen mari doh badu bolo ndramak eme len ma mesekei ndramak andra-i adeh.”

Badih badu leheleh atehei budon tan handru in ta Jises

(Metiu 15:21-28)

24 Ano Jises suri iy ma iy iu ili loboho kon tinan Tair ma Saidon. Eme ya iy i bolo asiu ra-em. Eme Jises anya, iri sala tanan iy udu doh, arile iy winiyan batone iy bwai. 25 Eme suwi labai badih ari anuhun nyalan, eme ya iy eme taku i andri kati Jises, tasah nadun badih badeh, malawin ndra-in udu la-un. 26 Badih dah kandriyen tan badu Grik, arile iy badu Siroponisiya, eme iy lelen Jises katikahei malawin ndra-in udu la-u nadun badih keme len. 27 Eme Jises tiye i tan i buku doh, “Kanyohan iri nah bwena op, tasah bamwenen ta ari lakou bwe, i buku none iri andrei nyamon tiri nah ma iri akahei i na nadu mwi.”

28 Arile, iy tiye i ta Jises i buku doh, “Laban, ou asehek sahou handru. Arile iri nadu mwi an bahandra sau badeh, aimon kahu nyamon tiri nah.”

29 Eme iy tiye i tan, “Ya ta sehek ta aliy, ou au ai. Malawin ndra-in nane udu la-u nadum badih badeh, ndra-au.”

30 Eme badih dah iu i kon, ma iy atou nadun ales in bada sau, ya malawin ndra-in badeh, ndra-au.

Jises bwidi ndramak ari ndranyen siu ma bohon bwe amwenen ja

31 Ano Jises udu loboho Tair edek iu ili Saidon, ma iy edek ja ili loboho gwa li Galili, ano ili loboho kon ma ronoh udu bolo Dekapolis. 32 Eme iri lau ra-on tiyani ndramak ari ndranyen siu ma iy bohon bwe, eme oro ndremenya Jises katehei minen ki bwele-en. 33 Eme Jises andrei iy udu bolo iri lau nane eme len, ya Jises sakaruk i kandro minen ma iy atehei i munu ndranye ndramak nane ma i bada kalimen ale. 34 Eme Jises anyolom i kandrah ma ndrinen eden labai, eme iy tiye i ta ndramak nane dah, “ Epata,” moson ta aliy i buku doh, “Ou asak!”

35 Se nawin bwe, ndranye iy ndramak dah asak ma kalimen nyokolokon ma iy asehek sahou amwenen mara-ei ja. 36 Ano Jises tiye sahou batanau i toro anya, “Ado sasehek sala ta ari ndramak.” Jises tiye i toro san solo-an solo-an, arile bwai, oro asehek le ili ai. 37 Eme iri anuhun, ma mani iri atur. Eme iri tiye i buku doh, “Lakou mari iy amekes doh, ndra amwenen le ai. Iy mesekei ndramak ndranyen siu ma hawe bohon bwe, amwenen ja!”

Copyright information for `LID