Mark 8

Jises anyohan iri lau ma hawa (4,000)

(Metiu 15:32-39)

Udu bolo len doh iri lau solo-an labai atukum ame le hawen. Iri ado, ya iri nyamon ta aimon bwai. Eme Jises luhi oro lau tan ala hawen, ma iy asehek i toro i buku doh, “Jo tikisi iri lau dah. Iri an hawek ndra winiya len taloh ai, ma niri nyamon ta aimon bwe. Ya i buku none jo katiye iri ma son tiri ka-au ka kon tiri, kora-on mada iri kabuluw ya iri kataku kado san, tasah iri rayah mene ame, san tiri lawe-en labai.”

Eme oro lau tan anya, “Kon dah lau aliy bwe. Are lau kameh winiyan salahani niri nyamon udu bolo kon lomale an le dah?”

Eme Jises ndremenyani oro, “Nado jabi ramen sabe udu aliy?”

Eme oro anya, “Ndro taloh le.”

Eme iy tiye i tiri lau mwan ma badih kamanyah kado andri bada munyak. Eme iy andrei jabi ramen ma ndro taloh dah, eme iy edeu wurah i ta Kindrei. Ano iy boso-ei ma atehei ili mine oro lau tan, ma oro adeu ili niri lau. Oro ale ni toro ra-on udu aliy, eme Jises asehek sahou ta nyosowan i ta aliy. Ano iy tiye oro lau tan adeu i le winiya iri. Eme iri aimon ma ndrine iri idih. Ano oro lau ta Jises tukumwi tikibwah tiri erah asahan i bwak ma ndro taloh.

Ya kane iri lau nane doh i buku hawa (4,000). Ano iy tiye iri lau mwan ma badih au ala hamon ala kon tiri.

10 Eme Jises i bolo ndron ra-ei hawe oro lau tan ma oro au ala loboho kon Dalmanuta.

Oro Parasi anya katou kalem badu kandrah

(Metiu 16:1-4)

11 Ano iri Parasi ame ya andres hawe Jises. Iri anya kanone iy ma iri ndremenya iy kamekes kalem badu kandrah ta leheya buku none iy amekes gok ta Kindrei handru. 12 Eme ya budon tan ihis in bolo ndrinen o-on, eme iy anya, “Ki buku sah handru iri lau mwan ma badih ta len dah anya katou kalem? Jo tiye tado handru en! Idah kameh kalem handru winiyan basahan tiri lau na len dah bwai.”

13 Eme Jises ruwani iri Parasi areu, ma iy i ndron ma iu i len ili kapa gwa li bilisiu.

Sahou ta nyala yis ta Herot hawe iri Parasi

(Metiu 16:5-12)

14 Ya oro lau ta Jises ndramaniy ta akohok jabi ramen, oro andrei rabah le i ndron. 15 Eme Jises anya, “Mada ado kaleu ta yis tiri Parasi ma ta Herot.”

16 Eme oro tiye nyala oro ari ari, “Sebwe iy amekes sahou doh tasah to bakohok jabi ramen bwe nadeh?”

17 Eme Jises tanan ta sahou nane oro asehek, eme iy tiye i toro, “Buku sah handru ado asehek, anya ado jabi ramen bwe? Sebwe mada ado baleu bwe le nadeh? Bar tado boto-on? 18 Ado mada ado udu aliy ya ado batou bwe? Ma ndranye ado udu aliy ya ado banuhun bwe? 19 Ado ndramaniy ja, ta jo mene boso-ei jabi ramen ma limeh i niri lau ma lamawa (5,000) mene deh bwe? Ya bwak sabe mene erah ado andrei?”

Eme oro anya, “Ma ronoh la-uh.”

20 “Ya ado ndramaniy ja ta jabi ramen ma ndro taloh i niri lau ma hawa (4,000), ma bwak sabe mene erah ado andrei?”

Eme oro anya, “Bwak ma ndro taloh.”

21 Eme Jises tiye i toro, “Budon tado kede-eh baleu bwe le?”

Jises leheya iri lau tan

(Kalan 8:22–10:52)

Jises bwidi ndramak ari madan kaseu amwenen ja udu Betsaida

22 Ano Jises hawe oro lau tan au ala asahan Betsaida. Eme ma iri lau ra-on sirini ndramak ari madan kaseu, ya oro tiyani iy eme hawe Jises. Ma oro tiye i ta Jises i buku doh: “Aso aso-ok ou atehei minem kili bwele-e iy ndramak dan op.” 23 Eme Jises tawi mine ndramak madan kaseu nane dah ma sirini iy eme len ta kon. Eme Jises sakaruk i madan ma atehei minen i bwele-e madan, ma iy anya, “Ou atou ari lakou deh bwe?”

24 Eme ya iy anyolom i loke ma iy anya, “Ehe, jo atou iri lau, iri a buku none kei adek ma seselek laleyah.”

25 Ano ja Jises atehei minen i bwele-e mada ndramak dah ja, ma ndramak dah madan atau i loke eme ma iy anyolom lakou amwenen mara-ei. 26 Eme Jises anya, “Ou au ala asiu tam ya ou sala bolo kon.”

Pita tiye, Jises are handru

(Metiu 16:13-20; Luk 9:18-21)

27 Eme ma Jises hawe oro lau tan adek san anya kala loboho kon tinan Sesariya Pilipai, eme ya Jises ndremenya oro lau tan, “Iri lau anya jo are lau handru?”

28 Eme oro tiye i tan, “Iri ra-on anya ja ou Jon ta alomwa, ya iri ra-on anya ja, ou Alaija, ya iri ra-on anya ja, ou ari propet.”

29 Eme Jises ndremenya oro, “Ya ado amwenen anya jo are lau handru?”

Eme Pita asumon bohon i buku doh, “Ou kede-eh Krais handru oh.”

30 Eme Jises batanau oro satiye ta ari lau ja ai, ndri-iy.

Jises asehek nyala imek ma amak tan

(Metiu 16:21-28; Luk 9:22-27)

31 Ma iy leheya oro ta, Nadu Ndramak Awas kameh akohok sisi-in solo-an labai, ma iri lau tinan areu bwena, hawe iri lau tinan tiri pris, ma hawe iri lau ta leheya kandriyen tiri Juwis kameh baseken iy bwe. Ma idah kameh iri adai iy imek, ya len taloh ano iy kameh amak ja. 32 Iy asehek aleu amwenen i toro lau tan. Eme Pita anuhun sahou doh, ya iy seheyani Jises i kabwak, ma iy ibolosen i tan anya, “Ou sato-en sala buku badeh!” 33 Arile Jises tubuni iy ma iy anyolom oro lau tan, eme ma iy to-en Pita anya, “Satan, ou a len a konak! Ou ba-en hamon ta budon ta Kindrei bwe. Ou a-en hamon le ta budon tiri lau.”

San tare lau anya ki-in hamon ta Jises ma kakohok kohan handru

34 Eme Jises luhi iri lau solo-an solo-an ma hawe oro lau tan, eme ma tiye i toro, “Buku none ari ndramak anya ki-in hamon tek, mwasin, iy kamani so-ok tan mari, ya iy kabwese kei tondreh tan, ya iy ki-in hamon tek. 35 Tasah, buku none ari ndramak anya katawi kohan kudu, kohan kameh ano. Arile, buku none ari ndramak abudon jo ma atiye sahou mwasin tek, ya kohan ano, iy kameh winiyan andrei kohan ja. 36 Ya, buku none ari ndramak kuhi lakou mari badu kon munyak, ya iy kimek, iri lakou doh kameh sebenei iy i buku sah handru? 37 Ya lau kadeu saba sowan handru kameh ta akohok kohan keme hamon? 38 Ou are lau bwilim ama jo ma ta sahou tek udu bolo lau rebesem dah ta maliye Kindrei ma lomondra ndra-in, Nadu Ndramak Awas kameh bwilin ama ou ale, i buku none len hamon kameh, iy eme ma hawe lomada taman hawe iri angelo, lau ndrabun badu loken.”

Copyright information for `LID