aAisaya 66:24

Mark 9

Jises ndra randrah ja ma lomadan asahan

(Metiu 17:1-13; Luk 9:28-36)

Eme Jises asehek i toro i buku doh, “Jo asehek sahou handru ewek tado. Lau ra-on ales ereu bolo to dah kameh winiyan bamak bwe, ya iri kameh anyolom tondrok ta Kindrei ma hawe boto-on tan kameh asahan.”

Len onoh ano, Jises kuhi Pita, Jemis ma hawe Jon a hawen, ma Jises kuhi oro ala bwele-e mandrei ari loken labai, ya oro le ado aliy. Oro ado, oro anyolom ili bada Jises ndratubuniy ndra randrah ja. Ma awin tan ndra nyikilikin asahan i belen ma sakalawi belen ta lakou mari badu munyak dah, i buku kasikine. Eme oro lau tan ma taloh nane dah atou Alaija uru Moses asahan, ma asehek sahou hawen. Eme Pita atou lakou doh ya iy asehek ta Jises i buku doh, “Ndramak ta leheya, mwasin handru ta aso are ndra kada-ah, ya aso katahi taloh mandron kudu dah, ra-em tam, ra-em ta Moses, ma ra-em ta Alaija.” Pita asehek sahou doh, tasah iy hawe uru nane anoh, eme iy bala tanan sahou nane iy asehek bwe.

Eme ma asi kandrah asahan ma tubuluhi oro, ya sahou ari asahan bolo asi kandrah nane asehek i buku doh, “Idah naduk handru. Jo aseken iy labai, ya ado kanuhun sahou tan.”

Eme suwi labai oro anyolom ili, ma oro batou ari lau hawe oro bwe, arile Jises le ari.

Oro ndremenya Jises ta Alaija

Eme oro are bwele-e mandrei ame andri, Jises batanau oro i buku doh, “Saba lakou ado ndratou ma ndranuhun, ado sasehek sala ta ari ndramak, ili winiya le Nadu Ndramak Awas amak ereu bolo lek tan eme loken.”

10 Eme oro basehek bwe, toro le, eme udu ndrokowa oro le, oro ndremenya oro ta saba moson, “Ta amak ta imek tan,” ma i buku sah handru. 11 Eme oro ndremenya Jises i buku doh, “Buku sah iri lau ta leheya kandriyen tiri Juwis anya Alaija kameh eme bwena op?”

12 Eme iy tiye i toro anya, “Sahou badeh, handru. Alaija eme bwena handru ta lowosa iri lakou mari. Ya i buku sah handru ja sahou mene torowenei anya idah kameh Nadu Ndramak Awas kameh akohok sisi-in solo-an ma iri kameh bwale iri iy? 13 Arile jo asehek tado i buku doh, Alaija ndrame, arile iri an hamon ta budon tiri amwenen, ya iri amekes iri kandriyen mari i badan, i buku none ndratorowenei sihiden.”

Jises tikahei malawin ndra-in udu bwele-e nah ari iu

(Metiu 17:14-21; Luk 9:37-43)

14 Eme oro ame hawe oro lau ra-on ja ta Jises, eme oro anyolom lau solo-an solo-an awudi oro ma iri lau ta leheya kandriyen tiri Juwis ame andres hawe oro lau ta Jises. 15 Eme nawin bwe, iri lau atou Jises ma mani iri atur ma iri sakaliye ala hawen ma sekesek ma anyumos badan. 16 Eme ya Jises ndremenya oro lau tan, “Ado andres hawe iri ta sasah handru?”

17 Eme ndramak ari udu bolo iri anya, “Ndramak ta leheya, jo atiye naduk eme hawem ai, tasah malawin ndra-in udu la-un, ya iy winiyan basehek sahou bwe. 18 I buku none asahan, malawin ndra-in kameh moraha iy i andri bada ndren, ma bubusi bohon eme len ma iy andrebek lihin ale, ma iy sorokok en. Eme jo tiye oro lau tam katikahei malawin ndra-in doh ki-iu, arile oro winiyan batikahei ba-au bwe.”

19 Eme Jises tiye i toro, “Ado lau mwan ma badih batehei budon tado handru bame tek bwe. Len sabe kameh jo kereu hawe ado, ano ado barala tanan boto-on ta Kindrei? Ado katiyani nah badeh, keme hawek.” 20 Eme oro tiyani iy i hawen. Eme malawin ndra-in anyolom Jises, ma iy morohani nah dah i andri bada ndren ma iy tundrundru ma bubusi bohon atau. 21 Eme Jises ndremenya tama i nah nane dah, “Malawin ndra-in udu la-un len sabe handru?” Eme iy anya, “Iy ma nadu bwisik le badeh, asahan ai. 22 San solo-an iy moraha iy i jih ma i gwa anya kamekes iy kimek. Ya i buku none saba lakou ou winiyan mesekei, ya ou tikisi aso, ma ou sebenei aso!”

23 Eme Jises tiye i tan i buku doh, “I buku sah handru ou anya, i buku jo winiyan? Lakou mari winiyan asahan i tare lau i buku none budon tan handru in tek.”

24 Eme tama nah nane dah aloh, “Laban, jo badeh, budon tek sese le in tam, arile ou aseben jo ja ya budon tek handru ki tam.”

25 Eme ya Jises anyolom iri lau solo-an solo-an sakaliye a le se ame, eme iy tiye sahou boto-on i ta malawin ndra-in anya, “Ou malawin ndra-in, ou bohom bwe, ou ndranyem siu, jo tiye tam, ou ame len tan ma ou same hamon ja ai!”

26 Ano malawin ndra-in nane anyar ma iy morohani i nah dah i andri ma iy amei, eme ma malawin ndra-in nane udu bwele-en eme len, ya i nah mwan dah sorokok i buku none iy ndramak, eme iri lau solo-an anya ja, “Iy ndramak.” 27 Arile Jises tawi minen, ma suri iy eme loken.

28 Eme Jises iu i asiu, ma oro lau tan ndremenya iy anya, “Buku sah handru ya aso winiyan batikahei malawin ndra-in nane iu bwe?”

29 Eme iy tiye i toro, “Lakou i buku dah winiyan batikahei bame len na saba san ja bwe, arile na salom i ta Kindrei le winiyan ai.”

Jises asehek nyala imek ma amak tan ja

(Metiu 17:22-23; Luk 9:43-45)

30 Eme ma, Jises hawe oro lau tan ruwani kon doh ame len, ma oro adek ales au ala bolo Galili. Ya Jises bwalen lau sala tanan ta iy udu heh handru. 31 Tasah iy anya kaleheya oro lau tan, “Iri kameh atehei Nadu Ndramak Awas ili mine iri lau. Ya iri lau kameh adai iy imek. Ano len ma taloh ja kameh iy amak ja.” 32 Arile budon toro baleu ta sahou tan nane bwe, eme oro anoh ta ndremenya iy.

Are udu bwele-en labai

(Metiu 18:1-5; Luk 9:46-48)

33 Eme oro ame asahan Kapena-um, oro ame ala ado bolo asiu ra-em. Eme Jises ndremenya oro lau tan, “Ado andres ta sasah nane an san?” 34 Arile, oro batiye randra sahou bwe, tasah oro adek san doh, oro le andres oro, ta are handru udu bwele-en toro mari. 35 Eme Jises manyah udu andri, ano iy luhi oro lau tan ma ronoh la-uh ame hawen, ano iy tiye i toro, “Are lau anya ki bwena badeh, iy ki-in ndrobek, ma iy ki ndrahu so-ok ta lau mari.” 36 Eme Jises andrei nadu nah ari nadu bwisik eme ales ereu ndrokowa oro. Eme iy awudi iy na minen ya eme iy tiye i toro, 37 “Ya buku none ari ndramak abudon jo, ya iy aseben ari nadu nah bwisik buku nah dah, badeh iy aseben jo. Ma are lau oro aseben jo, badeh, oro baseben jo le bwe, arile oro ale aseben Kindrei iy nane suni jo eme dah.”

Are lau iy losen tato bwe iy badeh, kawas tato

(Luk 9:49-50)

38 Eme Jon tiye i ta Jises, “Ndramak ta leheya, aso atou ndramak ari atikah malawin ndra-in eme len na boto-on ta nyaram, ya eme aso anya kabarah iy, tasah iy badu hawe to bwe.”

39 Eme Jises tiye i toro, “Ado sabarah iy, tasah are lau amekes lahou tinan na boto-on ta nyarak, suwi labai iy winiyan batiye ndra-in ta nyarak bwe. 40 Ya are lau tan bahun tato bwe, iy badeh, kawas tato ma iy badu hawe to. 41 Jo tiye tado handru! Are lau atehei bwiniu gwa i wa-im, tasah ou badu hawe Krais, sihine i lau doh winiyan ba-au laleyah bwe.

Kandriyen ndra-in badeh, amekes ndramak taku

(Metiu 18:6-9; Luk 17:1-2)

42 “Buku none ari ndramak bwidi ari nadu nah ale atehei budon tan eme tek taku ta kandriyen ndra-in, sebwe mwasin ta ndramak doh kasawei ari bek maha-an ki balen ya kakahei iy katuh kili bolo ndras ki-in gwek kimek. 43 Ya i buku none minem aliu ou ta amekes kandriyen ndra-in, mwasin ou saniy ki-iu! Sebwe mwasin ta minem raka le ka-iy ta akohok koham mwasin ta ereu le buku doh. Kora-on minem ma la-uh udu aliy, ya ou kameh ala bolo jih ta winiyan bamak bwe! 45 Ya, i buku none katim aliu ou ta amekes kandriyen ndra-in ou saniy ki-iu! Sebwe mwasin ta katim raka le ka-iy ta akohok koham mwasin ta ereu le buku doh. Kora-on katim ma la-uh udu aliy, ya iri kakahei ou ala bolo jih ale ta winiyan bamak bwe! 47 Ya, buku none madam aluwi ou ta amekes kandriyen ndra-in, sebwe mwasin ta ou holowaniy ma kakahei ki-iu! Mwasin ta madam ari le ka-iy, ya ou ala bahandra tondrok ta Kindrei, kora-on madam ma la-uh kudu aliy, ya iri kakahei ou ala bolo jih ta anya ereu le buku doh. 48 Ya bolo jih doh,

‘Iri nadu un aimon iri lau ndramak, ya iri winiyan bamak bwe. Ma jih asun iri lau ndramak ale winiyan bamak bwe.’ a 
Iri lau ndramak ado bolo jih doh kameh akohok sisi-in solo-an ndra-in ta udu le buku doh.

49 “Lau marakon kameh asah i buku none ndras hawe jih. Jih badeh, i buku none sisi-in ta leheya kandriyen ta ndramak mwasin, ya ndras i bolo nyamon badeh, ta amekes nyamon i simidin. Eme ma aha marakon kandrei sahou ta Kindrei ma katehei ki buku ndras kudu bolo oda aha, ma iy kameh winiyan atisih iri kandriyen ndra-in. 50 Ndras mwasin, arile i buku none iy mani nyiminyen, ya idah kameh ou baramesekei nyiminyen barame hamon barala buku sah bah? Ou badeh, i buku ndras ki-in bolo odam ya ndrinem kamunum ki ta ndramak ari ari.”

Copyright information for `LID