cWari 118:26

Matthew 23

Oro Parasi hawe oro lau ta leheya batanau malen amekes kandriyen ndra-in

(Mak 12:38-39; Luk 11:43, 46; 20:45-46)

Hamon ta aliy Jises asehek sahou ili tiri lau mwan ma badih hawe oro lau tan. Iy asehek i buku doh, “Iri lau ta leheya batanau malen hawe iri Parasi leheya aha ta sahou batanau, buku le Moses bwena mene amekes. Iri sahou mari oro asehek ewek taha badeh, aha kanuhun ma ka-en hamon ta aliy. Arile kandriyen oro amekes, ado sa-en hamon ta aliy, tasah oro asehek iri sahou, arile oro ba-en hamon ta sahou toro bwe. I buku le oro atisih lau na kandriyen malen solo-an labai ta iri ka-en hamon ta aliy, arile oro winiyan batehei mine oro ta aseben bwe.

“Iri lakou mari oro amekes doh, ta amekes iri lau katou. Oro asin nyeh ndra tinan ta asolom ereu mine oro ma bwili oro, ma oro aseu malou lawe-en ereu kiri awin toro.
(23:5) Udu bada nyeh tinan ta asolom badeh, iri aseu bwisi lakou, ya in bolo bwisi lakou doh iri atehei iri tarou rayah badu bolo sahou ta buk ndrabun. Ano iri asin nyeh doh ereu mine oro kamweu ma hawe bwili oro. Ou anyolom ili ta Eksodus kalan 13:9, 16 ma Dutoronomi 6:8; 11:18. Ya iri Juwis ale a-en hamon ta sahou udu bolo tarou ta Namba kalan 15:37-41. Eme ma iri aseu malou ereu kiri awin tiri. Jises anya, iri lau ta leheya batanau malen hawe iri Parasi bwidi iri lakou doh asahan i tinan ta iri lau katou, ma kabudon iri badeh abadok handru ta a-en hamon ta sahou ta Kindrei.
Iri anya kamanyah kareu le ndrahu kon ta atudun ta nyamon tinan, ma bwabwai mwasin badu ndrahu tukum tiri Juwis. Ya oro anya lau mari kasumon oro na len ta baen. Ma oro anya lau kaloh oro ‘ndramak ta leheya.’

“Arile lau saloh ado ‘ndramak ta leheya,’ ndri-iy. Tasah ndramak ari le, iy ndramak tinan ta leheya ado, ya ado mari badeh, nadu tine ado. Ya ereu kon munyak dah ado saloh ari ndramak tama ado, ndri-iy. Ndramak ari le tama aha, ya iy udu kandrah. 10 Ya iri saloh ado ‘ndramak ereu bwena,’ ndri-iy, tasah ndramak ari le ereu bwena, iy Mesaya o Krais. 11 Ndramak nyaran tinan ereu ndrokowa aha iy kasahan lohowan taha. 12 Ndramak atudun nyaran amwenen ili loken, nyaran kameh eme andri, ya are lau amekes nyaran amwenen eme andri, nyaran kameh ili loken.”

Jises tiye oro lau tanan hawe oro Parasi ta kandriyen ndra-in oro amekes

(Mak 12:40; Luk 11:39-52; 20:47)

13 Jises asehek sahou ja i buku doh, “Ado lau tanan ta batanau malen ma ado Parasi, mada ado kaleu! Sisi-in laba tinan doh kameh ewek bwele-e ado! Ado kalime ado la-uh! Tasah, ado ndrasulu-i kou ta ala bolo kon mwasin udu kandrah ereu mada iri lau. Ado ale winiyan bala bolon bwe. Ya, buku none iri lau anya kala bolon, ado aturuk san tiri.
(23:13-14) Iri lau rayah ta tanan anya, sahou rayah ja udu hawe sahou ta bolo Metiu kalan 23:13 i buku doh: (14) Ado lau tanan ta batanau malen ma ado Parasi, mada ado kaleu. Ado kalime ado la-uh! Ado bahana lakou tiri nyau ale ano ado asolom lawe-en labai. Ta kandriyen doh ado kameh akohok maha-an tinan labai. Ou anyolom kili ta tarou ta Mak kalan 12:40.


15 “Ado lau tanan ta batanau malen ma ado Parasi, ado kabudon kamwenen! Sisi-in laba tinan doh kameh ewek bwele-e ado! Ado kalime ado la-uh! Ado adek bolo kon ma bwele-e ndras mari ta amekes ndramak ari le ta in hamon taha. Ya buku none iy in hamon taha, ado mesekei iy ndramak ta i bolo jih, i buku none ado le. Ado mesekei kandriyen tan asahan ndra-in, sakalawi tado ja.

16 “Ado lau mada ado bwe! Sisi-in laba tinan doh kameh ewek bwele-e ado! Ado anya kaleheya san ki tiri lau, ado kabudon kamwenen. Ado asehek i buku doh, ‘Buku none ndramak asehek sahou handru i ta asiu tinan ta Kindrei, ma iy tandrakan handru i ta kon loken, idoh lakou laleyah. Arile, buku none ndramak asehek i ta gol ereu bolo asiu ta Kindrei, ma iy tandrakan ili kon loken, idoh kameh iy kabwidi lakou buku iy nane ndrasehek.’ 17 Ado lolo-ou ma mada ado bwe. Saba lakou iy mwasin ereu mada Kindrei? Gol mwasin deh, asiu tinan ta Kindrei? Ado tana ado bwe nadeh? Buku none gol ereu asiu tinan ta Kindrei, gol doh bamesekei asiu tinan ta Kindrei bala mwasin bwe; asiu ta Kindrei le mwasin, ma iy mesekei gol doh asahan mwasin ma ndrabun. 18 Ya ado ale anya, ‘Buku none ari ndramak tandrakan in bwele-e mada koto-ok, idoh ari lakou handru bwe. Arile, buku none iy tandrakan in bwele-e iri lakou ta asun ere bwele-e mada koto-ok, iy kamesekei buku iy nane ndratandrakan.’ 19 Ado mada ado bwe. Saba lakou mwasin ereu mada Kindrei, iri lakou ta asun nane deh, o mada koto-ok? Iri lakou ta asun nane ereu bwele-e mada koto-ok, idoh lakou laleyah. Arile, mada koto-ok le mesekei iri lakou ta asun nane asahan ndrabun ta Kindrei. 20 Ya, buku none ou tandrakan ereu bwele-e mada koto-ok, idoh ou asehek sahou ndrabun handru. Ou ndratandrakan udu bwele-e mada koto-ok ma hawe iri lakou mari ta salom nane ereu bwele-e mada koto-ok nane. 21 Ya buku none ou tandrakan ili bwele-e asiu tinan ta Kindrei, ou ndratandrakan ndrala bwele-e asiu tinan ta Kindrei ma ndrala bwele-e Kindrei ale, tasah ou ado bolo asiu tan. 22 Ya are lau tandrakan ili kandrah, iy ndratandrakan ndrala ndrahu manyah ta Kindrei ma Kindrei ale, tasah idoh ndrahunen ta manyah.

23 “Ado lau ta leheya kandriyen tiri Juwis ma ado Parasi, mada ado kaleu! Sisi-in laba tinan doh kameh ewek bwele-e ado! Ado kalime ado la-uh! Iri bake mari badu bolo bilin ado apou ari, ari i ronoh, ronoh, ya ado adeu ari ari badu bolo ronoh doh, i ta Kindrei. Idoh mwasin, arile ado ndramani iri sahou tinan badu bolo batanau ta Kindrei, buku none kandriyen ta anuhun sahou amwenen, ma tikisiy lau, ma adeu budon boto-on i ta Laban. Sebwe mwasin ta ado ka-en hamon ta sahou batanau tinan ma ado samani iri sahou batanau bwisik nane ale. 24 Ado mada ado bwe. Ado anya kaleheya san ki tiri lau, arile ado amwenen batou san bwe. Ado atou lakou nadu bwisik buku buruku udu bolo suw tado, ya ado abo gok ta akohok eme len, arile ado batou lakou tinan buku kamel udu bolo suw tado, ya ado a-un le ma sakalami lakou mari.

25 “Ado lau ta leheya kandriyen tiri Juwis ma ado Parasi, mada ado kaleu! Sisi-in laba tinan doh kameh ewek bwele-e ado! Ado kalime ado la-uh! Ado sikine kona bwesam ma kona bwekei amwenen, arile nyamon ale ado apwe irek in bolo bwekei tado, ado akohok i san ta bahana ma san ta ndrakok. 26 Ado Parasi, ado mada ado bwe! Ado kasikine bolo bwesam ma bolo bwekei op, ano konan barasahan mwasin ale.

27 “Ado lau ta leheya kandriyen tiri Juwis ma ado Parasi, mada ado kaleu! Sisi-in laba tinan doh kameh ewek bwele-e ado! Ado kalime ado la-uh! Ado buku none ari lek ta lau ndramak areu bolon, konan badeh, iri nyosowaniy na iri kanyeu ma iri lakou konen mwasin labai, arile bolon kodo-oh ndrarahak le ndruwi ndramak ma manahun ndra-in labai. 28 Ado a buku aliy adeh. Iri lau atou bada ado, iri anya ado mwasin. Arile bolo oda ado kodo-oh irek ta sahou wasai ma kandriyen ta ba-en hamon ta sahou batanau bwe.”

29 Jises asehek sahou ili ja i buku doh, “Ado lau ta leheya kandriyen tiri Juwis ma ado Parasi, mada ado kaleu! Sisi-in laba tinan doh kameh ewek bwele-e ado! Ado kalime ado la-uh! Ado a-eh lek mwasin tiri propet, ma ado anyasou lek tiri lau mwasin. 30 Ma ado anya, ‘Buku none to ka-en hawe iri tubu taha bwena, sebwe to winiyan baseben ta adai iri propet ta Kindrei amak bwe.’ 31 Na sahou ado amekes doh, ado leheya buku none ado nadu iri lau mene adai iri propet ta Kindrei bwena. 32 Mwasin, ado kadek, ado kabwidiy kano iri kandriyen ndra-in mene iri tubu aha mene ndramesekei!

33 “Ado mwak ndra-in. Kindrei kameh atehei ado ala ta mada sahou, ma ado kameh ala bolo jih. Ya ado kasahan kamwenen ki buku sah handru? 34 Ado kanuhun kamwenen! Jo kameh suni iri propet ma iri lau budon tiri mwasin ma iri lau tanan mwasin ta leheya ado, ame atou ado. Arile ado kameh adai iri ra-on amak ma atahi iri ra-on ala bada kei tondreh, hawe iri ra-on kameh ado ubwi iri na malou an bolo asiu ta atukum taha. Ya ado kameh sobolon iri ereu bolo kon tinan taha ma oro kameh sakaliye au ala kon rakon ja. 35 Kandriyen ta adai iri lau mwasin don adeh, mesekei maha-an eme kon munyak. Maha-an doh kameh ereu bwele-e ado amwenen. Iri adai iri lau mwasin udu ndra kabatana ndraye Ebol eme isos ndraye Sekaraya nadu Berekaya, iy ndramak ale ado adai ereu ndrokowa asiu tinan ta Kindrei ma mada koto-ok. Ado amwenen kameh akohok iri maha-an ta kandriyen ndra-in doh. 36 Jo asehek sahou handru ewek tado, sohowa iri kandriyen ndra-in doh kameh ewek bwele-e aha lau mwan ma badih ale kede-en.”

Jises tikisiy Jerusalem

(Luk 13:34-35; 19:41-44)

37 Jises asehek sahou ja anya, “Jerusalem, Jerusalem, jo tikisi ado labai, ado adai iri propet, ma ado ateu iri lau Kindrei suni iri ame atou ado, ma ado orowei iri na bek ma adai iri amak. San solo-an jo anya katukumwi nadum oro, buku none iri kakaro tukumwi nadu iri areu bahandra bani iri. Arile ado bwale ado! 38 Nadah asiu ta salom tado kameh andra-i ma udu laleyah. 39 Jo asehek tado amwenen, ado winiyan batou jo ja bwe, winiya le len hamon kameh ado anya,

‘Kasekesek ki ta ndramak doh iy eme ta nyara Laban.’ ” c 
Copyright information for `LID