bDaniyel 9:27; 11:31; 12:11
cAisaya 13:10; 34:4

Matthew 24

Jises asehek anya asiu tinan ta Kindrei kameh andra-i

(Mak 13:1-2; Luk 21:5-6)

Jises ruwani asiu tinan ta Kindrei ma iy iu i len, ya oro lau tan ame leheya i tan asiu tinan ta Kindrei nane, konen handru. Eme iy asehek sahou ja i toro i buku doh,
(24:2) Idoh badeh, i buku sahou limeh ai, badu bolo oro sahou lawe-en ma limeh nane Jises asehek udu bolo tarou ta Metiu. Sahou dah badeh, udu ta kalan 24:2-25:46, ma asehek ta nyala iri lakou kameh asahan na len munyak anya kano.
“Ado ndratou iri lakou mari ta asiu kede-eh? Jo tiye tado amwenen, ari ndruwi asiu bek kameh winiyan bales bareu loken bwe. Iri marakon kameh ato-oh iu i andri.”

Len ndra-in ma bahun kameh asahan

(Mak 13:3-13; Luk 21:7-19)

Jises eme manyah udu bwele-e mandrei Olip, oro lau tan aton le ame ndremenya iy anya, “Ou tiye keme taso, na saba len handru kameh lakou doh kasahan? Ya saba kalem kameh leheya aso buku none len tam ta eme hamon, ma kon munyak ano.”

Jises asumon oro i buku doh, “Ado kanyolom kamwenen, ya ari ndramak sawendreyani ado, ndri-iy. Iri lau solo-an kameh ame anya iri asehek sahou tek ma anya, ‘Jo dah Krais.’ Ya iri kameh wendreyani lau solo-an. Ado kameh anuhun kurutuwe bahun ereu mirihik, ma yoyou ta bahun ereu len. Arile, budon tado sandra-i, ndri-iy. Iri lakou doh kameh asahan bwena op, arile lakou mari ta ano kameh, kahis le. Tasah, kon munyak tinan ari kameh amekes bahun i ta kon tinan ari, ya kabin badu kon rakon kameh amekes bahun i ta kabin badu kon rakon ja. Son kameh asahan bolo kon, ma kon ari ari kameh ndroi asahan. Iri lakou mari doh anya kasahan buku none sisi-in ta badih anya kato-ou nah.

“Ano, iri kameh ateu ado, ma a-um ado, ma adai ado amak. Iri lau badu kon munyak tinan mari kameh baseken ado bwe, tasah ado an hamon tek. 10 Na len doh kameh iri lau solo-an aruwe budon tiri udu tek iu, ma au ala hamon. Iri ari, ari kameh nyowonya ndramak ari ja ili tiri lau ndra-in, ma iri kameh bwale iri ndramak ari ja. 11 Iri propet solo-an ta wasai kameh asahan, ma iri kameh wendreyani iri lau solo-an. 12 Kandriyen ndra-in solo-an kameh asahan, ma iri lau solo-an kameh ruwani kandriyen ta aseken ndramak ari ja. 13 Arile, are lau tawiy ili isos munyak ano, Kindrei kameh winiyan akohok iy i hamon ja. 14 Sahou mwasin dah nyala tondrok ta Kindrei kameh tiyaniy ili isos kon mari, ta iri lau marakon kanuhun, ano kon munyak dah barano.

Lakou munya-un ndra-in kameh asahan

(Mak 13:14-23; Luk 21:20-24)

15 “Hamon kameh aha anyolom

‘lakou munya-un ndra-in’ b 
propet Daniyel mene tiye, lakou doh munya-un ndra-in ales udu kon ndrabun ta iy sare aliy. (Are lau anyolom sahou dah iy kabudon kamwenen.)
16 Are lau iri are kon Judiya katobwak kala bolo mandrei. 17 Are lau ereu bwele-e asiu loken sala hamon sala bolo asiu sakohok lakou tan, ndri-iy. 18 Ya are lau ereu bolo bilin sala hamon sala sakohok kolau tan, ndri-iy. 19 Len doh kameh len ndra-in labai tiri badih ale nah ere tiri, ma badih nah ma nyandren. 20 Aha kasolom ki ta Kindrei ta aha satobwak na len ta jor ma ur, ma na len ta amunyau, ndri-iy. 21 Tasah, na len ndra-in doh eme kameh kon mari kameh andra-i handru en, sakalawi iri len ndra-in mene kabatana Kindrei bwidi munyak eme taku dah. Ya ari ja hamon winiyan basakalawiy bwai. 22 Arile, Kindrei ndrasani kane len doh. Ya i buku none iy basaniy bwe, ari ndramak winiyan basakalawiy bwe. Arile, toro lau le nane Kindrei ndranyowonyani oro, iy kameh sani len doh kameh a mo-on. 23 Ya buku none ari ndramak katiye taha, ‘Krais asah idah! ’ deh, ‘Laban asah in kenoh! ’ Aha sanuhun, ndri-iy labai. 24 Tasah, idah kameh, krais ta wendreya ma hawe propet ta wendreya kameh asahan. Ya iri kameh amekes iri lahou tinan ma kalem ta wendreya iri lau, ma iri ale anya kanone iri lau ala budon ta Kindrei udu tiri kataku. 25 Aha ndranuhun! Jo ndratiye taha bwena.

26 “Ya, buku none lau asehek anya, ‘Laban ndrame, iy ereu bolo kon lomale an.’ Aha sala, ndri-iy. Ya buku none iri anya, ‘Iy asah aton kenah,’ aha satehei budon taha sala ta aliy, ndri-iy. 27 Len ta Nadu Ndramak Awas eme hamon kameh mada lau mari atou iy. Iy kameh eme buku le kalik anya ereu rai, lau areu ndra jaha kameh atou ale. 28 Kon ale oda ari lakou, o ndramak ereu aliy, idoh kamen adeh, iri sirih ta aimon lakou bolo-an le kameh atukum areu aliy.”

Nadu Ndramak Awas kameh eme hamon

(Mak 13:24-27; Luk 21:25-28)

29 “Hamon ta len ndra-in asahan,

‘An kameh ilik, ma bun kameh winiyan banya bwe.
Ya ndrau udu kandrah kameh taku ereu kandrah eme andri, ma boto-on mari badu kandrah kameh nyukunyok.’ c 
30 “Hamon ta aliy, idah kameh kalem ta Nadu Ndramak Awas asahan bolo kandrah, ya lau mari badu munyak kameh aden, ma iri kameh atou Nadu Ndramak Awas asahan ereu bwele-e asi kandrah, ma boto-on tan ma lomadan tinan labai. 31 Ya kurutuwe ndrah kameh anyar tinan labai, ma iy kameh suni oro angelo tan au ala kati jor ma hahuw ereu bolo munyak dah, ta atukum iri lau tan, ala budon tan udu tiri, ereu kon ranah ili taku ranah ame hawen.

Ado kakohok tanan ta kei pik

(Mak 13:28-31; Luk 21:29-33)

32 “Ado kanyolom kei pik, ya iy kameh tiye tado. Buku none andran irek ta gwa ma nyabun asahan, ado tana ado, idah kameh mirihik kon i le an ai. 33 Ya, buku none aha anyolom iri lakou nane jo ndrasehek, aha tana aha len ndrame bakep, ya Nadu Ndramak Awas ndrareu le mada kou ta eme hamon ai. 34 Jo tiye tado handru en! Iri lau rebesem areu kede-eh kahis na len dah kameh bamak bwe le, iri lakou mari doh kameh asahan. 35 Kandrah hawe kon munyak dah kameh ano iu, arile sahou tek le kameh winiyan bano bwe.

Ari ndramak bala tanan len ma mada an ta Laban eme hamon, bwe

(Mak 13:32-37; Luk 17:26-30, 34-36)

36 “Ari ndramak bala tanan len, deh, mada an ta Laban eme hamon bwe. Iri angelo badu kandrah ale ma nadun ale tanan bwe, taman le ari tanan. 37 Len ta Nadu Ndramak Awas eme kameh asahan, buku le iri lakou mene asahan na len ta Nowa. 38 Na len bwena ta wadah asahan, iri lau amekes nyamon tinan, iri a-un gwa, iri mwan ma badih atasou ili eme, ili le isos ta len Nowa oro ala bolo ndron tan tinan. 39 Arile, iri lau tana iri bwe, winiya le wadah eme aluwi iri mari au. Len ta Nadu Ndramak Awas kameh asahan buku le len mene ndrasahan bwena. 40 Na len doh, uru lau la-uh kameh abo gok se ereu bolo bilin, ya ari kameh iu, ya ari kameh udu api. 41 Uru badih la-uh kameh alim badu wit areu se, ari kameh andrei iy iu, ya ari kameh udu api.

42 “Aha kanyolom kamwenen, tasah aha tanan saba len Laban taha eme hamon, bwe. 43 Arile, budon tado kaleu ta tanan doh: Buku tama asiu i tanan, saba ben handru iri lau ta bahana kameh ame apou asiu tan, iy kameh winiyan bamadin bwe, iy kameh atehei ndrokei, tasah iy winiyan bamukuni iri lau ame apou asiu tan bwe. 44 Ya buku none aha ale, aha kalokou aha na len mari. Tasah, Nadu Ndramak Awas kameh asahan na len aha batehei budon ta iy eme bwe.

Sahou sokek ta iri lau mwasin ta gok ma iri lau ndra-in ta gok

(Luk 12:42-46)

45 “Are lau iy mwasin ta gok, ma iy budon mwasin? Iy don adeh, tinan tan ndratehei tondrok tiri lau tan ra-on ja ndra-en bahandran ta adeu niri nyamon na len ari ari, iy le tanan. 46 Sekesek handru in bwele-e ndramak doh, buku none tinan tan eme takalahi iy amekes gok tan mwasin. 47 Jo tiye tado handru, tinan tan kameh atehei iy ta atondrok iri lakou tan mari. 48 Arile, buku none iy lau ta gok ndra-in katiye anya, ‘Ndramak ta asiu doh kameh winiyan bame suwi bwe,’ 49 ya iy kameh a-um iri lau ta gok hawen, ma iy kameh ili aimon nyamon ma a-un gwa lolo-ou hawe iri lau ta a-un gwa lolo-ou. 50 Ya, na len ari, tinan ta ndramak nane ta gok kameh eme hamon na len iy ndramak nane tanan bwe. 51 Tinan tan kameh sani iy i lunah, ma mesekei iy akohok maha-an buku le iri lau kalime iri la-uh. Iy kameh anyar, ma asenyer lihin.

Copyright information for `LID