Matthew 28

Jises amak eme loken

(Mak 16:1-10; Luk 24:1-10; Jon 20:1-18)

Len ta amunyau ano, ma ndra wahun ta len ma bwena ta wik ari ja, Mariya Makdala ma Mariya ari ja uru adek ala ta anyolom mada lek ta Jises.

I le mani tur, munyak nyukunyok ili eme, ya angelo ari badu kandrah eme andri ma susuwini bek badu mada lek iu i len. Ano iy ili manyah udu aliy. Konen i buku none kalik, ya kolau tan badeh, belen i buku none asi kandrah belen mara-ei. Oro lulik ta atondrok iy nane anoh labai, ya oro totoreh ma oro asahan buku none iri lau ndramak.

Arile angelo nane asehek sahou ili turu badih nane anya, “Ah sanoh, jo tanan ah takaleh Jises, mene iri tatahi iy i bada kei tondreh. Iy bareu dah bwe, iy ndramak ndrame awas ja! Idoh buku none le iy mene ndrasehek. Ah kame katou ndrahunen mene iy amadin udu aliy. Ano ah kala suwi katandra-un toro lau tan ta iy ndramak ndrame loken, ya iy ndra-au ndrala bwena ndrala Galili. Ya idah kameh, ado winiyan anyolom iy ereu doh, buku jo ndrasehek.”

Eme ma, uru ruwani lek nane suwi suwi, uru anoh arile uru sekesek, uru sakaliye ala tiye toro lau tan. I le mani tur, Jises asahan hawe uru ma iy anya, “Ndraben ta-ah.” Uru ame mirihik tan ma tawi katin ma asolom ili tan. 10 Jises tiye turu, “Ah sanoh, ndri-iy, ah kala katiye ta nadu tinek oro kala Galili, ya oro katou jo kameh in doh.”

Sahou toro lau ta ndrokei

11 Kala uru badih nane adek kahis le, oro lau ta ndrokei ra-on ta atondrok mada lek nane au ala bolo kon tinan, ma tiye iri tinan tiri pris nyala lakou mari nane asahan. 12 Tinan tiri pris atukum hawe iri lau tinan, ma tukumwi sahou toro i ari, ano oro atehei luk tinan labai ili toro lau ta ndrokei nane. 13 Ma iri tiye toro anya, “Ado kasehek ki buku doh, ‘Na ben, oro lau tan ame ya ndrabene-ei bada kei ndra-au, kala aso amadin kahis le.’ 14 Buku none tinan badu kon anuhun sahou dah, aso kameh winiyan asehek sahou i tan, ya ado kameh winiyan bame mada sahou bwe.” 15 Eme oro lau ta atondrok mada lek nane kuhi luk ma oro ala amekes buku le oro nane ndranuhun. Sahou dah aseker ereu ndrokowa iri Juwis eme isos na len dah.

Jises asahan hawe oro lau tan

(Mak 16:14-18; Luk 24:36-49; Jon 20:19-23)

16 Oro lau ta Jises ma ronoh ari nane au ala mandrei ari udu Galili buku Jises ndratiye toro ta ala aliy. 17 Ereu doh oro atou iy, ma oro atudun nyaran, arile oro ra-on badeh, budon toro i la-uh. 18 Eme Jises eme mirihik toro ma tiye toro anya, “Boto-on ma lakou mari badu kandrah ma munyak badeh udu minek. 19 Ado kala kon mari, ya kamesekei iri lau mari kasahan lau tek, ado kalomwa iri na nyara tama, ma nadun ma hawe Malawi Ndrabun. 20 Ma ado kaleheya iri ta lakou mari jo ndratiye tado. Ya jo kameh in hawe ado na len mari, winiya le munyak dah ano.”

Copyright information for `LID