Philippians 2

Taha ka le buku Jises Krais

Ado mesekei jo sekesek tinan labai ta kandriyen mwasin tado. Kandriyen ta budon tado badeh, i randra le, ma kandriyen tado ta aseben ndramak ari ari. Ma hawe ado nono-ou ta bolo manyah bwe, ado manyah mwasin le ta budon randra le. Tasah, ado mene Krais mesekei ado abadok na len ado aseken ta aliy. Ma iy atamar ado, ma leheya iy eme lewan, ta iy badeh, aseken ado. Eme ya, na Malawin Ndrabun udu ta Krais ta amekes lahou tan badeh, udu tado ale. Ma hawe ndrine ado aseken ado ari ari, ma hawe ado tikisi ado ari ari. Ya eme kandriyen mari doh badeh, ado amekes ndra handru le, eme mesekei jo sekesek laba tinan labai tado ta bolo tekedek tado doh. Ado samekes kandriyen ta ndrakok ta aseben ado le, ma satudun ado ta aliy. Ma hawe ado satudun le anya, ado ndra ari ai. Arile, ado kamasiye iri, ya bale ado kamani ado. Ma hawe ado sabudon lakou ta aseben ado le, arile ado kabudon ale, ki ta seken ta ndramak ari ari.

Budon tado ki le buku budon ta Krais Jises.

Handru, iy badeh, Kindrei i buku taman handru,
arile iy batawi budon ta iy Kindrei bwe.
Arile, iy atehei iy i buku ari ndramak laleyah,
i buku ari bonyo-ou ma asahan i buku ndramak awas amwenen.
Iy atehei iy amwenen iu ili andri handru ma anuhun taman Kindrei,
ma bwese bwilima ili ma imek i bada kei tondreh.
Eme ta katin doh, Kindrei tutuni iy ili udu loken labai,
ma atehei boto-on i ta nyaran, sakalawi nyara lau mari.
10 Ma ta nyara Jises le kameh lau mari badu bolo kandrah,
hawe lau badu bwele-e munyak,
ma badu baha munyak kameh aluh ala andri, ma anuhun le iy.
11 Ma hawe lau mari kameh aloh iy i tinan ta ndranye lau mari,
ta Jises Krais badeh, iy Laban handru.
Na sahou tiri doh kameh atudun nyara Kindrei.
Tasah, iy le tama taha mari udu bolo lomadan ta taman Kindrei, ta atondrok munyak mari.

To ka buku sun anya ta lau kanyolom

12 Eme ado borobwar tek, i buku none ado mene ndranuhun boho Kindrei na len mari ndra-au ndra-au badeh, ado kamekes ja. Ado samekes na len le, jo udu hawe ado, ndri-iy. Arile na dah, i buku none jo bado hawe ado bwe, ado ari ari kamekes kandriyen mwasin doh, kasahan tinan kili kili udu bada nohonoh i ta Kindrei, i buku none Kindrei sebenei ado. 13 Tasah, Kindrei le badeh, edeu boto-on i tado ta amekes lomondra mwasin ta sasah iy aseken ado ta amekes ma edeu boto-on i tado ta amekes.

14 Sasah ado amekes, ado sanunu-uh ta aliy ma ado sandres ta aliy. 15 Eme iri lau winiyan basehek ado bwe, ma idah kameh lomondra tado asahan mwasin labai. Eme ado nadu Kindrei, kandriyen tado ki mwasin labai kanya i buku ndrau anya kudu bolo ndrokowa iri lau ta amekes kandriyen ndra-in labai katou. 16 Idoh tiye tanan toro ta Kindrei badeh, winiyan sebenei koha oro udu le buku doh. Eme ya, i buku none ado amekes i buku doh kameh mesekei jo winiyan atudun ado na len ta Krais eme hamon apou taha. Tasah, idoh kameh mesekei ado asahan randrah labai, ta leheya lahou tek ewek tado badeh, bala laleyah bwe. 17 Ado mene atehei ado a nyara salom ala ta Kindrei kabatana ado atehei budon tado handru i ta sahou tan. I buku none iri pris adeu lakou i ta salom. Eme ya, ki buku none ndrayek kamou ya jo kimek, idoh kameh i nyara kalem ta sekesek tek ewek tado ta lowosa salom tado. Idoh kameh i nyara kalem ta salom, iri pris asolou waen i ta salom, ta edeu sendrehendreh ta salom mari ano. Ma idah kameh, Kindrei anyolom ma iy kameh sekesek ta aliy. 18 Eme ya ado kasekesek hawek ta aliy.

Pol suni Timoti uru Ipaproditus

19 Ya ta nyara Timoti, i buku none Laban Jises asumon eh, kameh jo suni iy ewek hawe ado udu gwek sese. Ya, i buku none iy eme hamon kameh, iy winiyan asehek nyalak ta bolo manyah tado, ma idah kameh mesekei ndrinek sekesek ta aliy. 20 Jo batou ari ndramak bala buku none Timoti bwai, tasah iy abudon ado labai, ta bolo manyah tado, i le buku jo. 21 Tasah, iri lau mari anyolom le, i le bada lakou le ta aseben iri, ya iri babudon lahou ta Jises Krais bwe. 22 Arile ado ndranyolom kandriyen ta Timoti ai. Iy ndraleheya ndrame lewan tado, ta iy badeh, winiyan. Iy mene amekes lahou hawek i buku ari nah amekes lahou udu baha taman, amekes lahou ta sahou mwasin. 23 Jo abudon i buku sah kameh, jo suni iy ewek hawe ado suwi, i buku none jo anyolom manyah tek udu bolo kou kada-ah i buk sah. 24 Ma jo ndratehei budon tek boto-on ndra ta Laban ta nawin bwe kameh iy sebenei jo udu bolo kou, ma jo le amwenen barawek.

25 Arile, jo ndrabudon ndramwenen, ma jo winiyan babe-en bwai, ta jo kameh suni Ipaproditus ewek. Iy badeh, lau ta Kindrei badu hawe to, ma hawe iy badu hawek ta amekes lahou i buku none lau ta bahun ta beteleu ta Kindrei, ndramak ta atondrok. Iy ale mene i saluwe ado ta atiye sahou mene ado tiye iy eme ta aseben jo na len jo aseken seben. 26 Iy kameh ewek hawe ado, tasah iy tikisiy ma kohan apwe ado ma anya katou ado mari. Eme iy tanan ado mene ndranuhun iy ibo sik. 27 Handru labai, iy mene ibo sik ma iy sese le kimek. Arile, Kindrei badeh, batikisi iy le bwe, iy tikisi jo ale, ta jo satikisiy la-un sala la-un. Eme Kindrei mesekei iy amwenen ja. 28 Eme ya jo suni iy ewek hamon ja, ta ado kanyolom iy ma ado kasekesek. Eme ya tikisiy tek kudu le kudu. 29 Ado kamasiye ndramak i buku doh, ma hawe kaseken iy na ndrine ado i san ta Laban. 30 Tasah, iy atehei boto-on ma kohan mari i ta lahou ta Jises, ya sese le iy kimek. Iy atehei boto-on tan hawe kohan mari i ta aliy ta aseben jo, tasah ki ado badeh, winiyan bwe.

Copyright information for `LID