Revelation of John 11

Uru propet ma la-uh atiye sahou

Udu hamon ta lakou nane doh ano, ndramak ari atehei lakou i buku kandro ari eme tek. Kone kandro doh i buku kei ta tumundroh iri lakou na aliy. Ma iy tiye eme tek i buku doh, “Ou suri ou, ma ou ala tomondrohei lawe-en ta asiu ndrabun ta Kindrei, ma mada koto-ok tan. Ma ou andromwei kane iri lau mwan ma badih, ma iri sabe handru asolom ala aliy. Arile, ou satomondrohei lawe-en ta kowah udu manan nane awudi asiu ndrabun ta Kindrei. Idoh badeh, ndri-iy ai, ou ruwaniy kere gwek. Tasah, bolo kowah badeh, tiri lau badu Isra-el bwe, ma iri kameh amekes bahun ta akohok kon tinan ndrabun mara-ei, ma iri kameh atondrok ili winiya bun ma hanoh la-uh (42) ano. Ma jo kameh edeu boto-on i ta lau tek la-uh ta atiye sahou propet tek i tiri lau. Uru kameh asini awin ta tikisiy; ma uru kameh atiye sahou tek udu bolo iri len ma rawa lunek ndro hanoh (1,260)
(11:3) Len ma rawa lunek ndro hanoh (1,260) doh badeh i buku le bun ma hanoh la-uh (42) amwenen, i buku kalan 11:2 asehek ta aliy.
mara-ei doh.”

Uru lau tek ma la-uh doh kameh, i buku kei olip ma lu-ei, ma ndru-u sun ma la-uh ales udu bwena ta mada Laban atondrok kon munyak mara-ei. Buku iy are lau anya kanone ta idi uru badeh, jih kameh udu boho uru eme len, ma sulumwi are lau nane anya kamekes bahun kili turu. Ya, idoh handru, buku are lau anya kamekes ndra-in kili turu badeh, ta kandriyen doh le kameh iri amak le kabwe. Uru lau ma la-uh nane doh badeh, Kindrei atehei boto-on tan i turu, ta turuki kandrah, ta ur winiyan bandruk na bolo len mara-ei nane, uru atiye sahou ta Kindrei bwe. Kindrei atehei boto-on i turu ale, ta tobolowe gwa asahan ndra, ma bokoro-ei iri lau marakon badu kon munyak ta iri lakou solo-an ndra-in. Len mara-ei, buku uru anya kamekes lakou doh, uru winiyan amekes le ai. Buku uru bwidi gok ta atiye sahou ta Kindrei mara-ei ano badeh, nyabwe lakou ari kameh udu mada munu lek nane lawe-en labai, ari katin bwe, badeh kameh ruwani lek doh edek eme len. Buku iy eme len badeh, iy kameh amekes bahun hawe uru lau nane, ma iy kameh idi uru ma la-uh amak. Bada kei turu lau ma la-uh doh kameh i tondreh in san tinan ta kon tinan, taha asehek sahou sokek ma taha aloh nyara kon doh, Sodom ma Ijip, kon doh mene iri adi Laban turu udu aliy. Iri lau bada iri randrah, randrah, ma iri boho kamen mara-ei, ma iri boho kon mari, ma iri lau badu kon munyak tinan mara-ei kameh anyolom bada kei ma la-uh doh kameh winiya len taloh ranah, ma iri lau doh kameh bwale iri anya iri lau badu kon tinan nane doh sahi uru sala lek, bada kei turu kudu mada iri lau kanyolom. 10 Eme ma, iri lau badu kon munyak mara-ei kameh sekesek labai, tasah ta imek turu lau ma la-uh nane doh. Iri kameh amekes nyamon laba tinan, ma iri adi mana, ma iri adeu ndramas ili ta kawas tiri le amwenen, tasah uru propet ma la-uh doh badeh, amekes maha-an ma sisi-in ndra-in labai ili tiri lau mara-ei badu kon munyak.

11 Udu hamon ta len taloh ranah nane doh ano badeh, Kindrei aluhi kohan ili turu, ma uru suri uru ales; ma iri lau anyolom uru, ma mani iri mara-ei atur, ma iri anoh andra-i labai. 12 Ano badeh, uru anuhun boho ndramak ari, udu kandrah, aloh boto-on labai ili turu i buku doh, “Ah kame loken dah.” Eme ma iri lau nane amekes bahun hawe uru, anyolom uru au ala bolo asi jor, ma amwenen au ala bolo kandrah. 13 Se nawin bwe ja, na le liliy, ndroi laba tinan mara-ei labai asahan, ma kon tinan ranah ma buruwen atohou iu. Idoh i buku apou kon tinan doh i ronoh, ya ranah ma buruwen atohou iu, ma iri lau ma ndru tuluwi (7,000) amak. Eme ma iri lau mwan ma badih nane arah ado badeh, anyolom ma bwidi iri anoh mara-ei, ma iri nyowonya iri kandriyen ndra-in tiri, ma tubuni ndrine iri, eme ma iri atudun nyara Kindrei, iy udu kandrah.

14 Len ta sisi-in mala-uh nane ndrameres ndra-au ai; arile mada aha kere loken! Mirihik ai, len ta sisi-in kameh asahan ja.

Angelo ndro taloh doh eme len oloh ndrah tan

15 Ya, angelo ndro taloh doh badeh, badu hawe oro ma onoh nane eme len oloh ndrah tan, eme ma boho iri lau rayah asehek sahou boto-on labai udu kandrah i buku doh,

“Laban tataha Kindrei hawe Mesaya tan, uru mala-uh ndrasahan kabin ta kon munyak mara-ei,
ma iy kameh atondrok udu le buku doh!”
16 Eme ma oro batun ma lunoh hahuw (24) nane manyah are bada koyeu tiri kabin mirihik ta mada Kindrei, badeh, atehei bwili iri i andri bada munyak, ma oro atudun nyara Kindrei. 17 Eme ma oro anya,

“Aso adeu wurah ewek tam, Laban,
Ou Kindrei, iri boto-on mara-ei udu minem.
Na nane dah ou are aliy, ma ndra bwena mene ou are aliy ale.
Ou ndrandrei iri boto-on tam mara-ei,
ma ou asahan kabin ta atondrok kon mara-ei ai.
Eme ma ahi adeu wurah ewek tam.
18 Eme ma iri lau mwan ma badih nane tana iri Kindrei bwe badeh, abo losen labai,
arile len ta losen tam badeh, ndrasahan.
Len doh kameh ou ariu iri mwan ma badih mene ndramak ame ta mada sahou.
Len doh badeh, ta adeu ndramas mwasin ili tiri lau ta amekes lahou tam badeh, ndrasahan;
iri a buku iri propet tam, ma iri mwan ma badih ou aloh iri badeh, lau tam,
ma iri mwan ma badih nyara iri tinan ma iri mwan ma badih nyara iri bwe,
iri badeh, atudun nyaram, ma iri anuhun sahou tam ma a-en hamon ta aliy.
Ma len ale ndrasahan ta ou kameh bokoro-ei iri mwan ma badih mene amekes bahun
ma adi iri lau mwan ma badih mwasin mene are kon munyak.”
Sahou ano le badeh, asiu ta Kindrei ndrabun udu kandrah badeh, asak, ma bwisi sahou randra le ta Kindrei badeh, udu le lewan bolo asiu ndrabun tan. Ma kuruh atohou, kalik takamek ili eme, ma nyaron asahan tinan labai, ma kon munyak totoreh, ma mada ur asahan i buku bek, ma indruk iroh eme andri bwele-e kon munyak.

19 

Satan hawe iri lau tan andra-i mara-ei

(Kalan 12–20)

Copyright information for `LID