Revelation of John 12

Kundruh ta badih ari hawe mwak laba tinan banin ere aliy

Ano badeh, jo anyolom lakou randrah labai asahan bolo kandrah, ma bohok asak ta aliy. Jo anyolom badih ari udu aliy, ma iy asini an i nyara awin tan, ma bun udu bahandra katin, ma ndrau ma ronoh la-uh badu kandrah i nyara barak udu batun. Nadun ere tan, ma sisi-in ta iy anya kedeu nah badeh, asahan tan. Ma sisi-in doh badeh, ndra-in labai, eme ma iy anyar iy ta anya kedeu nadun. Ano badeh, jo anyolom kalem ari ja asahan bolo kandrah ale. Lakou doh, i buku mwak laba tinan banin ere aliy. Badan saraman mara-ei, ma batun ma ndro taloh, ma kasoh ma ronoh udu batun, ma hawe barak ma ndro taloh ta kabin udu batun ari ari. Kiwin badeh, asiri ndrau ranah ma buruwen badu kandrah, ma akahei mari iu ili andri kon munyak. Ya, ndrau ma lubuk le badeh, erah udu kandrah ai. Mwak laba tinan nane banin ere aliy badeh, ales ere batala iy badih nane, atondrok ta anya kaimon nadu i badih nane doh, buku iy atehei iy eme le len.

Eme ma iy badih nane dah atehei nadun mwan eme len, ma hamon kameh, iy ta atondrok iri lau mwan ma badih mara-ei badu kon munyak, ma tondrok tan kameh boto-on labai. Ya, iy akahei nadun eme len le badeh, iri angelo ame bwese-ei iy nah nane ma mwasin amwenen iu ili bada koyeu hawe Kindrei. Eme ma iy badih nane dah atobwak iu ili lokei, loboho kon lomale an lau bado aliy bwe. Loboho doh badeh, Kindrei ndralowosaniy le, ta iy badih doh kameh ili udu aliy. Ma iri kameh atondrok iy, ma adeu nan nyamon ili ili winiya le len ma rawa lunek ndro hanoh (1,260) ano.

Ano, bahun laba tinan atohou udu kandrah, ya Maikel hawe oro angelo tan amekes bahun hawe mwak laba tinan banin ere aliy, ma mwak hawe iri angelo tan amekes bahun ili hamon ili toro ale. Arile, mwak laba tinan nane banin ere aliy hawe oro angelo tan badeh, bala winiyan bwai, eme ma iy hawe oro angelo tan badeh, winiyan bado kandrah ja bwai. Eme ma oro angelo ta Kindrei akahei iy mwak laba tinan banin ere aliy hawe oro angelo tan, ame andri kon munyak. Iy mwak laba tinan banin ere aliy doh badeh, ndra bwena labai, ma nyaran badeh, “Balik” o “Satan”
(12:9) Sahou Satan badeh moson, Iy ndramak ta orou sahou i bada iri lau mwan ma badih.
Ma iy ndramak ta wendreya iri lau mwan ma badih mara-ei badu kon munyak. Oro akahei iy hawe oro angelo tan ame andri kon munyak.

10 Ano badeh, jo anuhun boho ndramak ari badu kandrah asehek sahou boto-on labai anya,

“Nadah, Kindrei tataha badeh, ndrandrei taha ndrame hamon.
Iri mwan ma badih mara-ei badeh, ndranyolom boto-on tan,
ma iy ndrasahan kabin.
Ma Krais badeh, akohok nyaran ta atondrok iri mwan ma badih mara-ei.
Tasah, balik badeh, iy ndramak ta ili hawe Kindrei na len ma na ben mara-ei ta orou sahou i bada iri lau ta Kindrei, ta lakou iri amekes.
Iri angelo ndrakahei iy udu kandrah ndrame andri kon munyak.
11 Iri mwan ma badih ta Kindrei tataha badeh, ndrame len laleyah ta mada iri sahou ndra-in nane balik tiyaniy ili mine Kindrei ta iri kandriyen mara-ei iri amekes.
Tasah Jises badeh, imek udu bada kei tondreh,
ma ndrayen amou tubuluhi kandriyen ndra-in tiri mwan ma badih nane atehei budon tiri mara-ei in tan.
Eme ma, ta idoh le badeh, iri mara-ei ndrasakalawi balik.
Ma iri ale atiye sahou tan mwasin,
ma ta kandriyen nane doh, iri ndrasakalawi kandriyen ndra-in tan.
Iri batehei budon tiri ba-en ta manyah tiri badu munyak bwe.
Iri badeh, alelei ili le mine iri lau nane a-en hamon ta balik adai iri amak.
12 Ya, iri angelo badeh, ndratikahei balik udu kandrah ndra-au.
Eme ma aha marakon ala are kandrah, aha kasekesek labai kare aliy ai!
Arile kon munyak ma hawe iri lau mwan ma badih marakon are aliy, bale aha ki-in taha!
Balik badeh, ndrawek andri kon munyak hawe aha ma iy ibo losen tinan labai!
Iy tanan, len tan badeh, ndrame mirihik labai,
ma Kindrei kameh tobohei iy ta iri lakou mara-ei iy amekes.”
13 Mwak laba tinan banin ere aliy, ndratanan buku iri badeh, ndrakahei iy udu kandrah ndrame andri kon munyak, eme ma iy eme in hamon ta iy badih mene tuwi nadun mwan. 14 Arile, iri angelo atehei bani manyuwe ma la-uh i ta iy badih nane doh, ta iy winiyan atah iu ili lokei bolo kon lomale an, lau bare aliy bwe. Loboho doh badeh, Kindrei ndralokowaniy le. Eme ma iy winiyan udu len labai ta mwak laba tinan banin ere aliy. Ma iri angelo ale kameh winiyan atondrok iy ta nyamon udu loboho doh, winiya jaha taloh ranah. 15 Eme ma mwak laba tinan banin ere aliy badeh amuri gwa udu bohon eme len. Gwa udu bohon eme len doh badeh, asahan i buku wadah arorou in hamon ta iy badih nane doh. Mwak laba tinan banin ere aliy anya, gwa arorou in hamon tan doh kameh winiyan teheyani iy badih doh amai iu mara-ei. 16 Arile bwe. Munyak badeh, sebenei iy badih doh. Munyak sihi bohon asak, ma iy anyuwi gwa mara-ei nane amou udu boho mwak laba tinan banin ere aliy eme len, mara-ei ano iu ili ndrinen. 17 Eme ma mwak laba tinan banin ere aliy badeh, ndrinen ibolosen i ta iy badih nane doh, ma iy eme anya kamekes bahun hawe nadun iri rayah ja. Idoh, iri lau mwan ma badih nane iri anuhun ma a-en hamon ta sahou ta Kindrei, ma iri atiye sahou mwasin ta Jises ma a-en hamon tan. Eme ma mwak laba tinan banin ere aliy nane dah, ili ales in babi.

Copyright information for `LID