Revelation of John 13

Nyabwe ndras apek eme loken

Ano ja, jo anyolom nyabwe ndras ari apek udu bolo ndas eme loken. Kasoh tan ma ronoh, ma batun ma ndro taloh. Kasoh ma ronoh udu batun doh badeh, barak tiri kabin ma ronoh badeh, udu toro kasoh doh. Ya, batun ma ndro taloh doh badeh, nyara lakou rayah ere aliy. Ya, kati nyara iri lakou doh badeh, nyowonya iri sondrokonya mari ili bada Kindrei. Jo anyolom nyabwe ndras nane doh, konen i buku ari lepat. Katin badeh, i buku kati lakou ari iri aloh be, ya bohon ja badeh, laba tinan i buku boho layon. Ya, mwak laba tinan banin ere aliy badeh, edeu boto-on ili tan. Iy atehei iy asahan kabin i buku le iy ta manyah in bada koyeu tan amwenen. Ma jo anyolom batu nyabwe ndras ari i buku baka ndrana udu aliy bwena, iy mene ndra-in ta adai iy imek, arile ndramon ja. Boho iri mwan ma badih mara-ei badu kon munyak asak ta aliy, ma bwidi iri a-en hamon ta nyabwe ndras nane udu bolo ndras apek eme loken. Iri mwan ma badih mara-ei badeh, atudun mwak laba tinan nane banin ere aliy, tasah iy ndranyumusi boto-on tan ndrala ta nyabwe ndras nane. Iri ale atudun iy, ma iri tiye i buku doh, “Are lau handru i buku nyabwe ndras doh? Are handru winiyan amekes bahun hawen?”

Eme Kindrei alelei ili le minen ta arah bohon laleyah ta atudun iy le, ma ta bobose Kindrei. Ma Kindrei atehei boto-on tan ere gwek ta amekes iri kandriyen doh winiya bun ma hanoh la-uh (42). Eme ma, iy arah bohon ta bobose Kindrei, iy sondrokonya Kindrei ma kon tan, ma hawe iri lau ta Kindrei ado kandrah. Eme ma Kindrei alelei ili le tan ta amekes bahun hawe iri mwan ma badih nane a-en hamon ta sahou ta Kindrei, ma adi iri amak ma ta atondrok kon tiri. Ma iy akohok boto-on ta asahan kabin ta boho kamen mara-ei are kon munyak, ma iri lau bada iri randrah, randrah, ma iri boho kon rakon rakon badu kon munyak, ma iri lau badu kon munyak tinan mara-ei. Iri lau mara-ei badu kon munyak ale, nyara iri bado bolo buk ta Kindrei bwe, udu ndra bada len Kindrei mene amekes kon munyak, iri mara-ei doh kameh winiyan bakohok kohan handru bwe, arile iri kameh atudun nyara nyabwe ndras nane. Buk doh badeh, buk ta ndramak konen i buku Nadu Sipsip ta Kindrei, bwena mene iri lau adai iy imek.

Iri lau mwan ma badih mara-ei nane anuhun sahou dah, iri kabudon kamwenen, ma iri ka-en hamon ta aliy.

Iri lau nane Kindrei ndraluhi nyara iri ta ala bolo asiu lulik,
iri doh kameh ta ala le ai.
Ya, iri lau heh nane Kindrei ndraluhi nyara iri ta amak na samen,
iri doh kameh ta amak le ai.
Udu ndra bada len, kandriyen dah asahan, iri lau badu hawe Kindrei badeh, kales boto-on ma katawi budon tiri mara-ei handru kihis.

Nyabwe munyak abusuk bolo ndren ma atas eme loken

11 Udu hamon ta nyabwe ndras amai ta madak, jo anyolom nyabwe munyak ari ja abusuk bolo ndren ma atas eme loken. Jo anyolom kasoh ma la-uh udu batun, ya kone nadu kasoh ma la-uh udu batun doh badeh, i buku ta nadu sipsip. Arile, nyaro sahou tan badeh, tinan labai i buku le ta mwak laba tinan nane banin ere aliy. 12 Iy ndrandrei boto-on mara-ei ta nyabwe ndras nane eme bwena, iy andrei doh ta amekes iri gok tan udu madan. Iy amekes gok boto-on labai ta ariu iri mwan ma badih are kon munyak, katudun nyabwe ndras eme bwena nane. Iy mene baka ndrana ndra-in ta adai iy imek, arile ndramon ja. 13 Iy nyabwe munyak nane dah amekes iri kalem ma lahou tinan; kalem ari badeh, iy amekes i buku doh: Buku iri mwan ma badih anyolom iy badeh, iy kameh bwidi jih udu kandrah eme andri kon munyak. 14 Nyabwe ndras badeh, udu aliy, ya Kindrei badeh, alelei nyabwe munyak nane doh kamekes kalem udu mada nyabwe ndras. Ma ta kandriyen nane iy ndrawendreyani iri mwan ma badih badu kon munyak. Eme ma iy tiye iri lau i buku doh: “Aha badeh, kasihidi ari sukumada kei, konen ki buku nyabwe ndras kede-eh, ta aha katudun nyaran. Iy nyabwe ndras doh ale mene samen ari sese le kidi iy kimek, arile badi iy bamak bwe, iy udu kede-eh kahis.” 15 Eme ma Kindrei alelei iy, ma iy atehei kohan i ta sukumada kei doh, ma iy asehek sahou. Buku iri lau rayah batudun, ma batehei bwili ndru-u iri bala andri ta sukumada kei nane doh bwe, iy kameh tiye iri lau rayah ja ta adi iri mara-ei amak ano au.

16 Eme ma nyabwe munyak nane dah tiye iri lau tan rayah ta kadeu ari kalem kili mine iri salin o kudu bwili iri lau mara-ei badu kon munyak: iri lau laleyah, iri lau nyara iri tinan, iri lau nadu batun, ma iri lau tiri lakou bwe, iri lau bonyo-ou, ma hawe iri lau ndrame len ta kandriyen ta bonyo-ou ma are laleyah. 17 Eme ma, buku are mwan o badih, kalem ta nyara nyabwe munyak doh bwe, iy kameh winiyan basih lakou tiri lau rayah ja bwe, ma iri amwenen winiyan basih lakou tiri bwe le. Ya kalem doh badeh, nyara nyabwe munyak, o kane nyaran.

18 Taha kabudon kamwenen ta lakou doh. Lau mwan ma badih, tanan tiri udu aliy, iri kondrek kane nyara nyabwe munyak kamwenen labai. Idoh badeh, kane lakou ta ndramak ari labai, ma kane lakou ta iy ndramak doh badeh, asahan buku ndro hanek ndro hanoh onoh (666).
(13:18) Len mene iri atorou boho iri Grik ma boho iri Hiburu, sahou tiri ta ondrek iri lakou buku ari, la-uh, taloh badeh, aliy bwe. Iri atorou le leta “a” i nyara kane lakou asahan “ari” le; leta “b” iri atorou i nyara kane lakou asahan ma “la-uh;” ma iri amekes ili le i buku doh. Eme ma, i buku ou anyolom leta ari, ari badu bolo nyara ari lakou o nyara ndramak ari badeh, ou winiyan ondrek kane iri leta ta bolo nyara lakou doh. Ya, i buku ou tukumwi kane iri leta doh i se badeh, kane lakou doh asahan. Ya, i san ta ondrek lakou doh, kane nyabwe munyak badeh asahan 666.


Copyright information for `LID