aDaniyel 7:13

Revelation of John 14

Iri lau mwan ma badih ta Nadu Sipsip ta Kindrei ayah wari ha-un

Ano badeh, jo anyolom ili kandrah ja, ma jo anyolom Nadu Sipsip ta Kindrei, iy ales udu bwele-e mandrei ta Sayon, hawe iri mwan ma badih kane iri 144,000 ales are hawen. Ma nyara i Nadu Sipsip doh, ma nyara taman badeh, torowenei udu bwili iri. Ma jo anuhun nyaro sahou ari doh mwasin labai udu kandrah eme i buku nyaro goi laba tinan, ma buku kuruh atohou. Jo anuhun nyaro lakou doh, i buku iri lau adi ndran solo-an doh, iri aloh hap. Iri 144,000 mwan ma badih doh badeh, ales ma ayah wari ari ha-un, iri badeh, are mirihik ta koyeu ta Kindrei manyah udu aliy, hawe oro lakou ma mulin ma hahuw, ma mirihik ale toro batun ma lunoh hahuw (24). Kindrei ndrandrei iri lau mara-ei doh ndrame hamon. Iri mene badu bolo iri lau badu kon munyak mara-ei. Eme ma oro le 144,000 mwan ma badih doh badeh, kameh winiyan ta atanan moso kati wari nane oro ayah doh. Ari mwan o badih udu kede-eh ja kameh winiyan ta akohok tanan ta kati moso wari doh ja bwe. Sahou sokek ari badeh, asahan i buku doh: Iri badeh, a buku iri lau mwan, iri bamadin sese hawe iri badih, ma bamekes karei hawe iri, bwe. Iri ma buruwen kahis. Ma iri kon mara-ei nane, Nadu Sipsip anya kili aliy, san nane doh le badeh, iri lau a-en hamon tan. Kindrei mene ndrakonohei iri are bolo iri lau mara-ei badu kon munyak, iri ma bwena handru, Kindrei mene konohei iri. Ma iri badeh, asahan lau tan hawe lau ta ndramak ari, konen i buku Nadu Sipsip. Iri mara-ei badeh, bamekes ari sahou wendreya o ari kandriyen ndra-in ta karei bwe.

Oro angelo ma taloh ame asehek sahou

Udu hamon ta lakou doh ano badeh, jo anyolom angelo ari atah ili bolo kandrah. Gok tan badeh, ta atiye sahou mwasin kameh ta udu le buku doh, ili tiri mwan ma badih mara-ei are kon munyak. Iy asehek ili tiri mwan ma badih badu kon munyak tinan mara-ei, tiri boho kamen mari, tiri boho kon rakon rakon badu kon munyak mari, ma ili tiri mwan ma badih bada iri randrah ja. Iy badeh, aloh boto-on labai i buku doh, “Len badeh, ndrasahan ta Kindrei aleben iri mwan ma badih mara-ei are ta mada sahou. Eme ma aha kanoh iy, ma aha katudun nyaran. Aha mara-ei badeh, katehei bwili ndru-u aha kili andri ki ta Kindrei, iy le badeh, bwidi kandrah ma munyak, hawe ndras ma mana munu iri gwa mara-ei.”

Ano angelo ari ja in hamon ta iy ma mwena nane eme. Iy angelo nane dah, anya, “Kon tinan Babilon mene tutuni nyaran i loken labai, badeh, ndratohou ndra-au ai! Iri mwan ma badih mara-ei mene ado bolo kon Babilon badeh, iri mene ariu budon tiri mwan ma badih rayah ado bolo kon munyak mara-ei. Eme ma iri atehei bwili ndru-u iri i andri ili ta kindrei ta wendreya tiri amekes na kei, ma adeu kona iri ili ta Kindrei handru. Iri mwan ma badih mara-ei nane are Babilon badeh, i buku badih iy tawi bwesam udu minen irek na waen, ma iy aruwi budon tiri lau mara-ei, eme ma iri anyuwiy, ma iri abo lolo-ou, ma iri amekes kandriyen ndra-in ta karei hawen.”

Ano, angelo ari ja in hamon turu eme ale. Iy aloh boto-on labai i buku doh, “Are mwan o badih handru atehei bwili ndru-u iri ili andri i ta nyabwe munyak hawe malawin, ma iri akohok kalem udu mine iri, o bwili iri? 10 Iri kameh a-un waen udu bwesam ari. Waen doh kameh leheya iri lakou ndra-in labai, Kindrei kameh amekes ili tiri mwan ma badih, ta kandriyen ndra-in nane iri a-en hamon ta aliy. Tasah, iy ibolosen tinan labai ili tiri. Eme ma iri kameh akohok sisi-in ndra-in labai ta nyaraha jih anya ta bek solpa. Ma iri angelo ta Kindrei hawe Nadu Sipsip tan, kameh anyolom iri mwan ma badih akohok sisi-in tinan labai doh. 11 Ma kasu-er asahan ta jih nane edeu sisi-in ili tiri, kameh ili loken ta udu le buku don ai. Iri lau mwan ma badih doh nane atehei bwili ndru-u iri ili andri i ta nyabwe munyak hawe malawin, ma akohok kalem ta nyaran, jih kameh edeu sisi-in ili tiri. Ben, len iri winiyan bamunyau bwe, jih doh badeh, winiyan bamak bwe, kameh anya ta udu le buku don ai, ma iri mwan ma badih doh kameh winiyan bado mwasin ja bwai.”

12 Udu bada len ta lakou nane doh asahan, ya iri lau ta Kindrei nane, a-en hamon ta batanau tan, ma tawi ihis budon tiri in ta Jises, iri badeh, katadau ndruwi iri ta bwese iri maha-an mara-ei doh.

13 Ma jo anuhun boho ndramak ari udu kandrah asehek sahou i buku doh, “Ou atorou sahou ki buku doh: Iri mwan ma badih atehei budon tiri mara-ei in ta Laban, ma iri ndramak ta aliy, nadah, ma na len eme kahis, iri badeh, kasekesek!” Malawin Ndrabun ale asehek, “Ya, iri kameh ruwani lahou boto-on tiri, iri mene amekes, ma iri amunyau ta aliy. Iri bame dah laleyah bwe. Kandriyen mwasin mene iri amekes, idoh kameh ili hawe iri ale ili kandrah.”

Len ta akohok nyamon uni badu bolo bilin

14 Oro asehek sahou ano le badeh, jo anyolom asi kandrah rasi belen mara-ei, ma ndramak ari manyah udu aliy, konen badeh,

“I buku le Nadu Ndramak Awas.” a 
Barak ari bek nyikilikin badeh, udu batun, ma iy tawi samen gwak raho, madan labai udu minen.
15 Ano, angelo ari ja badeh, atah udu bolo asiu tinan ta Kindrei eme len. Iy aloh boto-on labai ili ta ndramak nane manyah udu bwele-e asi kandrah i buku doh, “Ou sani iri nyamon marakon na samen tam! Iri nyamon marakon badu munyak badeh, ndruniy mara-ei! Eme ma, len dah badeh, len mwasin ta akohok iri nyamon marakon doh.” 16 Ano le badeh, iy ndramak nane manyah udu bolo asi kandrah, andrei samen tan, iy akahei eme andri kon munyak, ma sani iri nyamon mara-ei nane uni badu kon munyak.

17 Jo anyolom angelo ari ja atah udu bolo asiu tinan ta Kindrei udu kandrah eme len. Iy tawi samen gwak raho madan labai ale udu minen. 18 Ya, jo anyolom angelo ari ja, iy boto-on labai ta atondrok jih. Iy badeh, atah udu loboho mada koto-ok eme len. Iy asehek sahou, bohon ili loken mara-ei, ili ta angelo ari nane tawi samen gwak madan, madan labai udu minen i buku doh, “Ou andrei samen tam madan labai badeh, ma ou sani kandro iri waen mara-ei badu munyak, ma ou tukumwiy marakon kili le se, tasah nyamon marakon badeh, ndruniy mara-ei!” 19 Eme ma, iy angelo nane dah akahei samen gwak tan eme andri kon munyak, ma sani kandro iri waen mara-ei, ano iy tukumwiy marakon ili le se. Ano iy akahei nyamon marakon ili le bolo kun bek laba tinan ta atisih waen mara-ei kabwesek. Idoh badeh, leheya buku lakou ndra-in mara-ei doh badeh, Kindrei kameh amekes ili tiri lau marakon badu kon munyak, tasah ndrinen badeh, ibolosen labai tiri. 20 Iri waen badeh, ili bolo kun bek laba tinan udu manan kesehe kon tinan ta atisih iri. Eme ma ndraye waen amou kabede kun bek eme len, atas ili winiya kilomita ma tonek (300), ma eme loken lawe-en badeh, winiya le hayen iri atehei udu boho iri hos.

Copyright information for `LID