Revelation of John 20

Jaha ma rawa (1,000), balik amadin in bolo asiu lulik

Udu le badeh, jo anyolom angelo ari atah udu kandrah eme andri kon munyak, iy tawi lakou ta aseh kou ta mada munu lek lawe-en labai, ari katin bwe, hawe sen maha-an labai udu minen ale. Iy ili badeh, tawi mwak laba tinan banin ere aliy, mwak doh badeh, ndra bwena labai, iy balik o Satan, iy ta edeu lau solo-an labai ala ta mada sahou. Angelo eme badeh, bawei iy na sen nane maha-an labai udu minen. Sen maha-an labai doh kameh udu gwek winiya le jaha ma rawa (1,000) ano. Angelo eme akahei iy iu ili andri bolo lek nane lawe-en labai, ari katin bwe, ano iy sulu-i kou tan ihis mara-ei, eme ma iy kameh winiyan bawendreya iri mwan ma badih badu kon munyak ja bwai. Iy kameh udu gwek winiya le jaha ma rawa (1,000) ano. Hamon ta jaha ma rawa ano badeh, idah kameh tolowei iy eme udu len sese, ta edek bolo kon munyak ili eme op.

Ano ja, jo anyolom koyeu rayah buku tiri kabin, ma iri lau manyah ado aliy. Kindrei ndratehei gok ili tiri ta tunuhun sahou tiri lau. Jo ale anyolom malawi iri lau ndramak bwena. Iri lau mene ndrasani bale iri ma ndradai iri ndramak, tasah iri atiye sahou handru ta Jises mene asehek, ma hawe sahou ta Kindrei. Iri badeh, batehei bwili ndru-u iri bala andri bwe, ma batudun nyabwe munyak hawe malawin bwe. Iri ale bakohok kalem bado bwili iri ma mine iri bwe. Eme ma koha iri mwasin asahan eme hamon ja, ma iri asahan i buku iri kabin ta atondrok kon hawe Krais, udu gwek winiya le jaha ma rawa (1,000) ano. (Iri lau rayah ndramak bwena badeh, bakohok koha iri na len doh bwe. Iri kameh atondrok ili winiya jaha ma rawa ano.) Len dah badeh, kameh asahan buku len ta lau amak ame awas ta imek ma bwena. Sekesek handru ki tiri lau nane amak ame awas ma bwena! Kandriyen tiri ndra mwasin le. Tasah, iri lau doh ta Kindrei. Imek hamon doh kameh, ari nyamun ta atisih iri lau doh ja bwai. Iri kameh asahan buku iri pris ta Kindrei hawe Krais. Ma iri kameh asahan kabin hawe Krais ta bolo jaha ma rawa (1,000) doh.

Satan badeh, ndrandra-i mara-ei

Udu hamon ta jaha ma rawa (1,000) doh ano, iri kameh sihi kou ta mana munu lek nane lawe-en labai, ari katin bwe doh kameh asak. Ma Satan kameh ano ta udu bolo asiu lulik eme len. Iy kameh eme len ta wendreya iri lau marakon atalan laleyah ado bolo kon munyak mara-ei. Iri lau badu kon Gok ma Magok. Satan kameh tukumwi iri marakon doh ala le se ta amekes bahun. Kane iri mara-ei ili le se badeh, i buku on mamarin badu bada babi, winiyan bandromwei bwe. Iri kameh, adek ala bolo kon munyak mara-ei, ma iri atehei kenyer ta ndrahune iri lau ta Kindrei hawe kon tinan iy aso-ok labai. Arile, jih udu kandrah anya eme andri badeh, sulumwi iri amak ano au. 10 Balik badeh, ndrawendreyani iri mwan ma badih doh, eme ma Kindrei akahei iy ma buruwen ales amwenen ili bolo lek laba tinan, ta jih nyarahan labai anya udu ta bek solpa. Nyabwe munyak uru propet ta wendreya badeh, are aliy bwena; eme oro ma taloh kameh akohok sisi-in, ben, len, ben, len ta udu le buku don ai.

Sahou tinan asahan

11 Ano ja, jo anyolom koyeu laba tinan belen ta kabin, ma ndramak ari manyah udu bada koyeu doh. Ma kon munyak hawe kandrah badeh, sakaliye iu ta madan, uru bado ndrahune uru bwena nane ja bwe. 12 Ma jo ale anyolom iri lau ndramak bwena on! Iri lau nadu batun, iri lau laleyah tiri lakou bwe, iri lau marakon doh badeh, ales are bwena ta koyeu ta kabin. Iy ndramak manyah udu bada koyeu badeh, tiye iri angelo kasihi iri buk mara-ei. Iri sihi buk ari ale, buk doh badeh, nyara iri mwan ma badih kameh winiyan akohok kohan handru ado hawe Kindrei. Kindrei badeh, anyolom bolo iri buk ma aleben kandriyen marakon tiri lau ndramak, mene amekes. 13 Ano, jo anyolom iri lau mene amak bwena badeh, ado bolo ndras hawe iri lau badu kon ta lau mene ndramak ndrasu-u are aliy, iri ari ari ala ales are madan. Ma iri akohok maha-an badeh, in hamon le ta kandriyen, iri amekes. 14 Ano, iy ndramak nane manyah udu bada koyeu ta kabin badeh, eme akahei imek hawe kon ta ndrahune lau amak are aliy badeh, ala bolo lek ta jih. Lek ta jih doh badeh, ta imek hamon ja ai. Buku are lau nyaran bado bolo buk ta lau winiyan akohok kohan handru doh bwe, Kindrei kameh tiye iri angelo tan, akahei iy ales amwenen iu ili bolo lek laba tinan ta jih.

15 

Kindrei badeh, bwidi iri lakou marakon asahan ha-un mara-ei ja

(Kalan 21–22)

Copyright information for `LID