aDutoronomi 32:35
bTanan 25:21-22

Romans 12

Manyah mwasin hawe Kindrei

Ya eme aha nadu tine i san ta tikisiy tinan ta Kindrei, jo indrek aha katehei bada aha mari ki ndrabun, ki buku salom handru ki ta Kindrei kasekesek ta aliy. Idoh badeh, atudun handru ai. Ma aha sa-en hamon ja ta tekedek ndra-in tiri lau badu munyak dah amekes, ndri-iy. Arile aha kasokosowei budon ndra-in ki-iu na budon mwasin ta Kindrei. I buku none aha a-en hamon ta aliy, idah kameh, aha takalahei seken ta sasah Kindrei anya aha kamekes. Ma iy kameh sekesek, tasah, sasah iy tiye aha ta amekes badeh, ndra amwenen le.

Tasah, Kindrei amekes mwasin eme tek, ma iy atehei kalem eme tek ta jo kamekes lahou tan, ya eme jo asehek nyala aha mari i buku doh: Aha satehei budon taha anya aha ndra ari ai, ndri-iy. Arile, aha kamekes budon taha kudu mwasin ta lomondra ki-in hamon ta boto-on ta budon handru ma ta ndramas Kindrei atehei ndrawek taha. Taha ndratanan, bada taha ari ari badeh, ari buruwen, arile andran badeh, solo-an. Ya andran ari ari badeh, iy ari amekes lahou randrah labai ta ari ari. Ya eme taha badeh, i le buku aliy. Taha badeh, solo-an, arile taha asahan ari buruwen ahas hawe le Krais. Ma taha ari ari badeh, kaseben iri rayah ja.

Na tikisiy ta Kindrei, taha ari ari ndrakohok ndramas mwasin i le winiya taha, ta amekes lahou tan. I buku none ari ndramak tan lahou mwasin ta akohok sahou propet badu boho Kindrei badeh, iy kamekes ki-in hamon ta boto-on ta budon handru tan le. Ya, i buku none iy tan ta anyo-ou iri lau ta Kindrei badeh, iy kanyo-ou oro kudu mwasin; ya, i buku none iy tan tanan ta leheya bolo budon ta sahou ta Kindrei badeh, iy kaleheya iri lau kudu mwasin. Ya, i buku none iy tan ta amekes budon tiri lau kabadok badeh, iy kamekes iri kabadok kudu mwasin. Ya, i buku none iy tan ta anyohan iri na lakou badeh,

iy kanyohan na ndrinen handru ma solo-an. Ya, i buku none iy tan ta atondrok badeh, iy katondrok kudu mwasin labai. Ya, i buku none ndramas tan ta tikisiy ma aseben iri lau maha-an udu tiri badeh, iy kaseben iri ma sekesek.

Kandriyen ta tikisiy

Ou badeh, leheya kandriyen ta tikisiy ki handru. Ou ruwani kandriyen ndra-in ta balik; ya ou tawi kandriyen mwasin kihis. 10 Ou aseken nadu tinem ari ari badu hawem handru. Ou sabudon ou le, arile ou anuhun sahou ta nadu tinem ari ari. 11 Ou saliliy ma ou sawoyah ta amekes lahou ta Laban. Arile ou alelei Malawin Ndrabun aseben ou amekes lahou le kili. 12 Na len ou anyolom bohon i bwena ta lakou Jises kameh edeu tam badeh, ou sekesek. Buku none maha ma isi katok tam, ou sanunu-uh ma ou ado le. Ma, na len mari, ou amekes salom ma ou ado le ta salom; ou sabudon anya Kindrei kameh winiyan bamesekei bwe, ndri-iy. 13 Ou anyohan lakou ki toro lau ta Kindrei, i buku none oro andriliu ta lakou. Ma ou asumon iri lau badu heh, badu heh kawek asiu.

14 Are lau oro amekes maha-an ma isi i tam badeh, ou asolom ki ta Kindrei kanysowani oro le, ma iy sabokoro-ei oro. 15 Are lau oro sekesek badeh, ou ala hawe oro, ado mari kasekesek; ya are lau oro taya ma tikisiy badeh, ou ala hawe oro taya ma tikisiy hawe oro. 16 Ou manyah ado le, nono-ou ndri-iy hawe iri ari ari. Ou satudun ou, ndri-iy, arile ou amekes ou badeh, ala nah nadu bwisik ala hawe iri lau nyara iri bwe. Ya ou samekes ou anya ou tanan labai, ndri-iy.

17 I buku none ari ndramak kamekes ndra-in kewek tam, ou satehei ndra-in sala bada ndra-in, ndri-iy. Ma ou badeh, madam kaleu ki doh, ki doh, ma ou amekes lahou badeh, kamekes ndrine lau mari kasekesek. 18 Ou samekes losen sala ta ari ndramak, ndri-iy; arile i buku winiyan eh, ou manyah amunum le ado hawe iri. 19 Aha kawas tek, aha samekes losen sala tiri, ndri-iy, arile aha katehei ki kani Kindrei kamekes, tasah sahou mene ndratorowenei tiye i buku doh:

“Jo kameh atehei maha-an ili tiri, ma jo konohei saba kandriyen nane iri amekes.” a 
20 Idoh handru, ya mwasin labai ta ou amekes i buku doh,

“I buku none ndramak ta amekes bahun i tam kimeson badeh, ou anyohan iy na nyamon;
Ma i buku none iy anyar ta gwa badeh, ou adeu gwa ki wa-in.
I buku none ou amekes kandriyen mwasin doh i tan,
ou kameh winiyan amekes bwilin ama ma tubuni kandriyen tan ndra-in doh iu.” b 
21 Ou samukuni kandriyen ndra-in sasakalawi ou, ndri-iy; arile ou tihisi kandriyen ndra-in na kandriyen mwasin.

Copyright information for `LID