aWari 69:9
b2 Samuwel 22:50; Wari 18:49
cDutoronomi 32:43
dWari 117:1
eAisaya 11:10
fAisaya 52:15

Romans 15

Taha ka-en hamon ta budon ma kandriyen ta Krais

Taha are lau le budon tataha ndrabadok handru, kala kaseben oro are lau babadok bwe le ma kabwese maha-an toro. Ya taha sabudon le taha, ndri-iy. Eme ya jo aseken taha ari ari kamekes kandriyen mwasin ta seben ki ta nadu tine taha oro ari ari badu mirihik tataha, ta sasah le winiyan sebenei iy abadok ta budon mwasin. Tasah, Krais mene amekes lahou, ta aseben iy le bwe. Iy amekes i buku none tarou mene ndratorowenei asehek,

“Are lau oro amekes losen i la-um, jo tanan idoh badeh, ndrame la-uk ale.” a 
Tasah, sahou mene ndratorowenei ndra-au ndra-au udu bolo tarou ta Kindrei badeh, ta leheya taha kado le, ma ta amekes taha kabadok ta abe-en lakou mwasin udu bwena tataha eme.

Eme ya, jo aseken Kindrei, ndramak ta edeu boto-on ma ta amekes aha abadok, kaseben ndrine aha kudu mwasin ma kare le se, ta bolo tekedek taha a-en hamon ta Krais Jises, ma eme ndrine aha ma boho aha mari badeh, ki le ari katudun Kindrei tama Laban tataha Jises Krais.

Sahou mwasin i tiri lau badu leheleh

Eme ya aha kaseken nadu tine aha oro ari ari, i buku none Krais mene aseken aha; ma idah kameh winiyan mesekei iri lau atudun Kindrei. Ya eme jo kasehek taha ta Krais mene eme asahan lohowan tiri Juwis. Iy amekes lahou doh ta leheya Kindrei badeh, tiye sahou handru ta tandrakan tan mene iy amekes i ta tubu iri mene ndra-au. Ya eme, iri lau badu leheleh winiyan atudun Kindrei in hamon ta tikisiy tan i buku none sahou mene ndratorowenei:

“Ya eme ta katin doh le, jo kameh udu ndrokowa iri lau badu leheleh atudun nyaram.
Ma jo kameh iyah wari ta atudun nyaram.” b 
10 Ano ja asehek i buku doh:

“Ya aha lau badu leheleh badeh, ka le se hawe iri lau ta Kindrei, ya aha kasekesek.” c 
11 Ma buk ndrabun tiye ale i buku doh,

“Aha lau mari badu leheleh katudun Laban,
Ma hawe aha lau mari kayah wari ta atudun iy.” d 
12 Ma propet Aisaya ale asehek anya,

“Idah kameh, lundriye Jesi ari kameh barasahan,
Iy kameh asahan ta atondrok iri lau badu munyak tinan mara-ei,
Ma iri lau badu leheleh kameh atehei budon tiri in tan ma atondrok iy ta sasah mwasin kameh iy edeu i tiri.” e 
13 Ya jo aseken Kindrei, ndramak ta edeu lakou mwasin, kamesekei bolo oda aha kidih na sekesek, ma hawe oda aha kudu mwasin ki-in hamon ta budon taha handru in tan. Ya eme ma budon taha kameh abadok ta anyolom bohon i bwena ta lakou mwasin na boto-on ta Malawin Ndrabun.

Pol asehek nyala gok tan amwenen, ma iy edeu bada-an tan mwasin ili tiri lau badu Rom

(Kalan 15:14-–16:27)

Pol sekesek ta lahou iy amekes ta atiye sahou i tiri lau badu leheleh

14 Aha nadu tine, budon tek ndrabadok ta aha amwenen badeh, ndradah handru na kandriyen mwasin. Ma aha ndradah na tanan aha mene ndrakuhiy, ma eme winiyan sebenei aha ta leheya ma hawe batanau aha ari ari. 15 Jo nane atorou sahou rayah boto-on labai ewek taha ta tiye nyala aha ta budon taha samaniy. Tasah, na tikisiy ta Kindrei le badeh, 16 iy atehei lahou dah eme kanik ta atiye sahou ta nyala Krais Jises ki tiri lau badu leheleh. Jo badeh, i buku none ari pris amekes lahou ta atiye sahou mwasin ta Kindrei. Ya eme iri lau badu leheleh badeh, i nyara salom jo edeu i mada Kindrei ma eme iy sekesek ta aliy. Ma hawe Kindrei badeh, mesekei iri asahan lau tan handru i san ta iy suni Malawin Ndrabun ili manyah udu bolo oro.

17 Ya eme in bwele-e sahou nane ndrasehek ndra-au, jo winiyan sekesek ta aliy. Tasah jo badeh, ndrahis ndrase hawe Krais Jises, ya aru amekes lahou ta Kindrei. 18 Ma eme jo winiyan basehek ta nyala sasah ja bwai; arile jo le kameh asehek ta nyala sasah Krais atehei eme kanik ta amekes iri lau badu leheleh kanuhun boho Kindrei i san ta sahou mwasin ma tanan handru, jo asehek. 19 Handru, Malawin Ndrabun aseben jo ta asehek sahou, ma iy edeu boto-on eme tek ta amekes kalem ma lahou tinan. Iri lau anyolom ma iri atehei budon tiri handru in ta Krais. Ya eme jo mene edek udu ndra Jerusalem o-on eme eme taku Ilirikum ta atiye sahou mwasin handru ta nyala Krais. 20 Jo bwalek ta atiye sahou mwasin ta nyala Krais ili kon ala lau ndra aliy bwena, kora-on jo ja katah asiu ki bwele-e ndru ta ndramak ari ja. Arile, udu bolo odak mari, jo aseken handru ta atiye sahou mwasin ta nyala Krais kili kon ha-un lau batiyaniy bala aliy bwe le. 21 I buku none sahou mene ndratorowenei tiye i buku doh:

“Are lau oro banuhun kundruh nyalan bwena bwe,
Idah kameh oro anyolom iy,
Ma are lau oro mene banuhun sahou ta nyalan bwe le,
Na len dah kameh oro atanan ta aliy.” f 
22 Ya eme ta katin le doh, lahou tek solo-an jo mene amekes, sokei jo bawek hawe aha bwe.

Budon ta Pol anya kili Rom

23 Arile, na dah lahou tek ta amekes udu loboho kon dah badeh, ndrano. Jaha solo-an labai ndra-au jo aseken handru ta ewek atou aha, arile jo mene winiyan bwe. 24 Arile, jo amekes budon ta ewek atou aha udu bolo tekedek tek ili Spen. Jo kameh ewek udu hawe aha, taha sekesek luluwen sese, ano ma jo aseken aha kaseben jo ta rayah lakou ta ili Spen. 25 Arile, na dah jo winiyan bawek bwai; jo kameh ili Jerusalem atiye lakou ta aseben iri lau ta Kindrei badu doh. 26 Tasah, iri lau ta budon handru i ta Kindrei badu kon Masadoniya hawe badu kon Akaya badeh, sekesek handru ta atukum lakou ta aseben oro lau ta Kindrei ado Jerusalem, oro badeh, andriliu ta lakou. 27 Eme iri sekesek handru ta atukum lakou i saluwe sasah mene oro amekes i tiri. Budon i buku doh: Oro lau ta budon handru badu Juwis mene aseben iri lau ta budon handru badu leheleh ta sahou ta Kindrei ta nyala Krais. Ya eme iri lau ta budon handru badu leheleh kadeu saluwen ki hamon ki toro lau ta budon handru badu Juwis na lakou ta aseben bolo manyah toro. 28 Ya eme udu hamon ta jo edeu lakou ta aseben ili toro ano kameh, udu bolo tekedek tek ili kon Spen jo barawek baranyolom aha ai. 29 Jo tanan na len jo ewek hawe aha kameh jo badek laleyah bwe. Jo kameh ewek atiye sahou ma amekes aha adah ma sekesek na nyosowan handru ta Krais.

30 Ya eme aha nadu tine, jo indrek aha i san ta Laban Jises Krais, ma hawe i san ta tikisiy ta Malawin Ndrabun, ta aha kahas hawek, ma kales boto-on ma aha kateu salom keme tek ki ta Kindrei. 31 Aha kaseben jo ta salom ya jo sataku sala mine iri lau ta tebelese ado Judiya. Ya eme ma lahou tek jo amekes udu Jerusalem kamekes bolo iri lau ta Kindrei doh kasekesek ta lakou jo edeu i tiri. 32 Ya jo kameh ewek atou aha ma sekesek, ma, i buku Kindrei aseken ta aliy, idah kameh, jo ewek hawe aha ya taha mari sekesek ma amunyau. 33 Ya kabwai. Mondrei ta Kindrei kudu ndrokowa aha. Handru!

Copyright information for `LID