bJenesis 21:12
cJenesis 18:10,14
dJenesis 25:23
eMalakai 1:2-3
fEksodus 33:19
gEksodus 9:16
hAisaya 29:16; 45:9
iHoseya 2:23
jHoseya 1:10
kAisaya 10:22–23
lAisaya 1:9
mAisaya 8:14; 28:16

Romans 9

Sahou ta Kindrei hawe iri lau tan

Jo badu hawe Krais. Eme ma, sasah jo asehek dah badeh, wasai bwe, handru. Malawin Ndrabun atondrok bolo budon tek mari ma tiye tek, ta jo badeh, bawasai bwe. Jo balek asin ma ndrinek tikisiy labai tiri lau ndraye ahi rabuk.

Ki buku none mwasin eh, jo aseken losen ta Kindrei keme la-uk, ya jo kakohok kon tiri lau ndraye ahi rabuk, keme len ta Krais, ya eme oro le kakohok kohan ta udu le buku doh. Iri badeh, lau tan amwenen, lau badu Isra-el. Iri mene batehei budon tiri ba-en tan bwe, arile iy mene mesekei iri asahan nadun ta nyo-ou, ma edeu lomadan ma boto-on tan mwasin i tiri. Iy mene amekes sahou randra le ma hawe edeu batanau malen, ma hawe leheya san ta asalom ma atudun handru udu bolo asiu tinan tan. Iy amekes iri lakou mwasin doh i tiri hawe edeu tandrakan i tiri. Udu ndra bada tubu iri, sare iri edek eme eme taku bada Krais asahan awas. Iy badeh, Kindrei

ma iy udu bwele-e lakou mari. Masiye ma tudun ki tan kudu le buku doh. Handru.
(9:5) Iri lau ta tanan rayah tobolowe sahou ta Rom kalan 9:5 i buku doh, Udu ndra bada tubu iri badeh, sare iri edek eme eme taku bada Krais asahan awas, ma iy kabin badu boho kamen tiri le. Ya eme, masiye ma tudun badeh, ki ta Kindrei kudu le buku doh. Handru.


Pol asehek nyala kandriyen Kindrei amekes i tiri Isra-el

Lundriye Isra-el solo-an batehei budon tiri ba-en ta Krais bwe. Ya, ta katin doh, sebwe jo katiye anya, Kindrei ba-en hamon ta tandrakan mene iy amekes i ta Abraham bwe, nadeh? Bwe! Tasah, lundriye Isra-el badeh, solo-an labai, arile iri mara-ei basahan lau handru ta Kindrei bwe, rayah le. Sahou dah handru. Jo ale batiye anya iri lundriye Isra-el doh asahan lundriye Abraham handru, bwe. Bwe labai! Tasah, bwena mene Kindrei tiye i ta Abraham i buku doh,

“Lundriyem oro hamon kameh asahan solo-an labai, in hamon ta san ta nadum Aisik amwenen.” b 
Kati sahou doh badeh, i buku doh: Lau solo-an abudon anya Abraham badeh, tubu iri, arile nah adeu eme len i buku taha ndranyolom doh kameh asahan nadu Kindrei ai, bwe. Nah ala asahan i san ta kandriyen ta atehei budon handru in ta tandrakan ta Kindrei, iri nah le don adeh asahan lundriye Abraham handru. Tasah, tandrakan mene tiye i buku doh:

“Na len jo ndrasaniy kameh jo eme hamon, ma Sara kameh atehei nah mwan eme len.” c 
10 Abo, anya sahou ta Kindrei doh le kabwai? Bwe. Nadu Rebeka uru mene ma la-uh badeh, au ndrine ndramak ari le; iy badeh, tubu taha Aisik. 11 Arile, in hamon ta kandriyen tan, Kindrei le lebelei ndramak na le so-ok tan amwenen; iy babudon ta lahou ndramak amekes bwe. Eme ma, kabatana Rebeka batehei uru nah mumwir doh bwe le, ma uru bamekes se kandriyen ndra-in hawe kandriyen mwasin bwe le badeh, Kindrei ndratehei budon tan ndra-en andri kabwe, ta are turu kameh kakohok nyaran ma kasahan lau tan handru. Eme Kindrei tiye Rebeka anya,

“Iy kadok kameh asahan lohowan ta iy bwaneh.” d 
13 I le buku none ndratorowenei udu buk ndrabun ta Kindrei anya,

“Jo badeh, aseken Jekob tinan labai, ano ja Iso.” e 
14 Ya eme taha kasehek ki buku sah bah? Kandriyen ma lomondra ta Kindrei bamwenen bwe? Bwe handru en! 15 Tasah, iy tiye i ta Moses i buku doh,

“Na seken tek le, jo anya jo aseken ndramak ari, jo aseken iy,
Ma jo anya, jo tikisi ndramak ari, jo tikisi iy.” f 
16 Ya eme Kindrei lebelei lau badeh, ba-en hamon ta seken ta ndramak, ma hawe ba-en hamon ta lahou bwe; arile idoh badeh, na tikisiy ta Kindrei le. 17 Tasah, sahou mene ndratorowenei tiye i ta Parou asah i buku doh:

“Jo mene atehei ou asahan kabin ta anyehe budon ta jo badeh, kaleheya boto-on tek kewek tam. Ya eme ma iri lau kameh winiyan atudun nyarak ma atiye sahou tek i tiri lau badu kon munyak mara-ei.” g 
18 Ya eme sendrehendreh ta aliy i buku doh: I buku none Kindrei anya kamekes mwasin ki tare lau, badeh, lokowan ai. Ya, i buku none iy anya kamekes are lau sanuhun iy, badeh, lokowan le ai.

Taha badeh, a buku kun ndren Kindrei amekes

19 Eme ya aha ari kameh tiye sahou eme tek anya, “I buku sah handru? I buku Kindrei aseken, iy winiyan tiye iri lau rayah kasahan nadun. O, bwe eh, iy atehei le konan i tiri rayah ja, ma iri kameh amai.” Buku sahou dah handru, ya, na saba katin handru kameh Kindrei winiyan edeu maha-an eme tataha lau ta amekes kandriyen ndra-in? Tasah, ari lau winiyan basokei tanan ma lahou ta Kindrei bwe. 20 Arile, ou saba ndramak handru, ya ou anya asehek sahou i buku badeh, ki ta Kindrei? Buku none ari ndramak kabonei ndren, ya iy kamekes kun ano, kun keme ja katiye i ta ndramak nane ta amekes iy anya,

“Ou bamekes jo bamwenen bwe oh”? h 
21 Bwe, ndramak ta apon ndren badeh, winiyan apon ndren na seken tan. I buku none iy anya kapon ari kasahan kabuluw o, ki rabos ta amekes gok laleyah ta len mari, badeh na seken tan. O, buku none iy anya kapon ari ja ki tariye ka-ukon ta leheya, badeh na seken tan le.

22 Ya eme i le buku aliy. Sebwe Kindrei winiyan leheya losen ma boto-on tan i la-u iri na seken tan nadeh? Eme ya, iy badeh, amunum udu le abe-en oro are lau ale losen tan udu toro. Oro don eh, iy ndralowosaniy ta iy kameh idi oro amak, o, akahei oro au buku kun ndra-in. 23 Kindrei amekes kandriyen buku doh, tasah iy anya kaleheya lakou tan solo-an labai udu bolo lomadan eme la-u taha are le mene iy tikisi taha. Taha lau mene iy lowosani taha ado buku kun tariye ka-ukon ta akohok lakou udu bolo lomadan. 24 Ma taha dah ale, taha lau mene iy aloh taha a buku kun ta akohok tikisiy tan. Taha rayah badu bolo iri Juwis ma rayah badu bolo iri lau badu leheleh. 25 I buku none iy torowenei udu bolo tarou ta propet Hoseya:

“Jo kameh aloh iri lau tek bwe, asahan lau tek handru;
ma jo kameh aloh iri lau jo baseken iri bwe, kameh jo aloh iri lau tek, jo aseken iri labai.” i 
26 ma,

“Idah kameh, asahan amwenen le ndra kon heh, sahou mene asehek i toro anya,
‘Aha badeh, lau tek bwe,’
udu kon doh kameh aloh iri badeh, ‘nadu Kindrei, iy kohan ta udu le buku doh.’ ” j 
27 Ya, Aisaya mene aloh bohon i tinan ta nyala iri Isra-el anya,

“I buku none kane lundriye iri Isra-el kameh asahan solo-an i buku le on badu babi, arile oro sabe le kameh Kindrei akohok ame hamon.
28 Tasah, idah kameh, sahou ta Laban ano ma iy kameh edeu maha-an suwi suwi i tiri lau badu munyak.” k 
29 Idoh asahan i le buku none Aisaya mene ndratiye ndra-au anya,

“I buku none Laban ma boto-on tan bamukuni lundriye taha basahan tataha bwe,
idah nane taha ndrandra-i i le buku iri Sodom, ma hawe iri Gomora.” l 

Iri Isra-el ba-en hamon ta kandriyen ta budon handru bwe, eme ma Kindrei winiyan baloh iri mwasin ta madan bwe

30 Ya eme taha kasehek ki buku doh: Iri lau badu leheleh bamekes lahou boto-on ta asilah madasan ta Kindrei kaloh iri mwasin mara-ei ta madan bwe, arile iri badeh, ndratakalahei madasan ta Kindrei kaloh iri mwasin mara-ei ta madan. Ya, san doh badeh, i san ta budon handru le. 31 Arile, iri lau tan amwenen, iri Isra-el badeh, none boto-on handru ta anya ka-en hamon le ta batanau malen mari ta Moses. Iri aseken Kindrei kaloh iri mwasin mara-ei ta madan, arile iy winiyan bwe. 32 I buku sah handru iy winiyan baloh iri mwasin mara-ei ta madan bwe? Tasah, iri banone na budon handru bwe, iri abudon ma an hamon le ta lahou boto-on iri amekes. Iri bwale iri Krais, ma iri batehei budon tiri ba-en handru tan bwe. Ya eme Krais le asahan i buku “bek ta lau ato-ak bwele-en,” ya iri Isra-el badeh, ato-ak ta bwele-e bek le doh. 33 I le buku tarou ta Kindrei asehek nyala aliy anya,

“Ndranye aha kanuhun, jo nyahani bek udu Sayon ta tono-ei kati iri lau kato-ak
Ma bek doh kameh tono-ei kati iri lau, ma iy kameh amekes lau taku areu san.
Are lau atehei budon tan handru in tan kameh iy winiyan bani bwilima bwe.” m 
Copyright information for `LID