Ruth 3

Rut Asilah Tan Mwan

Nawomi eme tiye Rut i buku doh, “Jo kameh atik ou a bahandra ari mwan, ma ou ki tam asumwem amwenen.” Nawomi anya, “Rut, ou anuhun, ndreh Bowas badeh, ou ale abo gok hawe oro badih tan badeh, iy badu mirihik tato handru en! Ou anuhun, ben kameh iy ili ndrahune gok, ta amekes bwisi bali iu. Abo, ou ala anyu, ano ou solowei suluw ki badam. Ou nyosowaniy ou na ra-ei awin tam mwasin handru en! Ano, ou ala mirihik ta ndrahune gok tan, arile iy satou ou, ma iy sala tanan ou labai. Ou atondrok an aliy winiya le iy aimon nyamon ma a-un gwa tan ano labai en! Buku iy manyah in andri, anya kamadin badeh, ou anyolom ndrahunen ta matinou kamwenen. Buku ou atou iy ndramadin tuk badeh, ou ala sihiy kolau ta katin ki-iu, ano ma ou amadin an hamon ta katin. Ano kameh iy barasehek budon tan barawek tam ai.”

Rut anya, “Mwasin, jo ndranuhun bohom, i dah kameh jo in le ta budon tam baden ai.”

Ano Rut edek ili ndrahune gok tan ta aleben bali, i buku le nyanan Nawomi ndrasihidiy tan. Bowas aimon nyamon ano, eme ma nyamon sekeyani iy, ma bwidiy madan anya kamadin. Iy eme edek ili akahei iy in bata bali marakon iri tukumwiy i se badeh, ma iy amadin.

Rut anyolom iy ano badeh, iy edek amwunum le ili sihiy kolau ta katin iu, ma iy amadin in katin.

Ili ben alih badeh Bowas soro-on ma iy anya katobolowe iy, eme ma manin atur ta atou badih ari amadin in katin. Bowas eme aloh, “Ou are lau?” Rut eme asumon, “Jo Rut, jo badih ta gok tam ari ai. Jo tanak, ou badeh badu hawe Elimelek. I dah kameh jo aso-ok ou atondrok jo, ma ou aseben jo, ma jo kewek tam ai.”

10 Bowas anuhun boho Rut ano iy eme tiye i ta Rut i buku doh: “Laban nyosowaniy ou. Naduk, kandriyen ou amekes eme tek badeh, udu bwele-e kandriyen mara-ei ou amekes i ta nyanam Nawomi ma bwena handru. Ou basilah ari ndramak loweu bwe eh! Iy nadu batun, deh, nadu batun bwe deh, ou a tasou a tan.”

11 Ano Bowas anya, “Mwasin, Rut ou sanoh. Lau marakon an bolo kon dah badeh tanan ou badih ari mwasin. Saba lakou ou aso-ok badeh, jo winiyan.” Boas anya, “Badeh handru, jo badeh badu hawem, ma jo badeh kameh atondrok ou. 12 Arile ndramak ari udu kede-eh badeh, badu hawem handru ai. Jo badeh bwe. 13 Mwasin, i dah kameh ou ado. Bi-i ma ndraben talu baranuhun iy ndramak doh. Buku iy abudon ta atondrok ou eh, mwasin. Buku bwe eh, i dah kameh jo atondrok ou ai. Sahou tek badeh handru labai. Laban badeh ndratanan, kabwe. Abo, ou ala hamon amadin winiya le mandraben.”

14 Eme iy ili hamon amadin in hawen ili winiya kon aleu. Rut badeh bwalen iri lau atou iy, eme iy amak mandraben handru en, tasah Bowas bwalen ari lau i tanan ta Rut udu hawen.

15 Bowas anya, “Rut, ou talahaniy ra-ei kolau tam ki-in andri.” Rut eme bwidiy i buku le bohon oh. Bowas eme solowei bali ili bwele-e kolau nane dah. Maha-an ta bali doh asahan kilo ma lunoh. Bowas eme aseben iy suriy ili konan. Ano Rut tuwiy ma iy iu ili hamon ili kon tinan.

16 Rut ili isos kon hawe nyanan. Eme Nawomi ndremenya iy, “Naduk, ou amekes i buku sah handru?”

Rut eme asehek i ta Nawomi ta iri lakou marakon Bowas amekes i tan.
17 Rut anya, “Iy bwalen jo eme hamon hawem leleyah, iy eme anyuhiy na talu bali dah.”

18 Nawomi anya, “Ou ado le, anyolom saba lakou handru kameh asahan. Na len dah kameh iy winiya bamunyau bwe, winiya le sahou ma budon tan marakon amwenen.”

Copyright information for `LID