Ruth 4

Bowas Sudiy Rut I Tan

Bowas eme edek ili manyah udu mada san i kon tinan, ndrahune iri ta atukum. Iy manyah udu le badeh, iy anyolom i ndreh nane badu hawe Elimelek oro dah edek eme. Eme Bowas aloh iy, “Borak, ou ame, talu kamanyah sese o.” Iy eme edek ili manyah udu hawen.

Ano Bowas ili andrei oro kabin ma ronoh badu bolo kon tinan dah ame manyah ado hawe uru ale. Oro ame manyah ado andri. Ano Bowas asehek i ta boran, “Nawomi mene udu kon tiri Mowap, iy badeh ndrame hamon. Iy aso-ok ari ndramak kasihinei munyak mene ta bora to Elimelek. Eme ma jo anya kanuhun ou ta aliy. Buku ou aso-ok eh, mwasin, ou sihinei na le dan, udu mada oro kabin ma ronoh manyah kede-eh. Buku ou bwalem eh, ou asehek kamwenen, tasah ou le badeh kabwai. Buku ou bwe eh, badeh kameh jo ai.”

Eme iy ndreh dah anya, “Jo kame isih munyak doh.”

Bowas eme tiye i tan anya, “Buku ou kameh asih munyak udu mine Nawomi uru nyau badu Mowap, mwasin, ou andrei Rut ale kewek udum. I dah kameh munyak kudu ndra mine ado lowa iy ndramak mene ndramak ndra-au.”

Ndreh dah anya, “Anya i buku baden eh? Jo winiyan ta isih munyak badeh bwai. Jo bwalek ta apou iri lokowak ili ta naduk oro amwenen hawe nadu ndramak ari ja. Jo kameh bwai, ou sihinei ki tam ai.”

Kandriyen tiri Isra-el bwena ta apou, o ta adeu, o ta akohok munyak badeh, i buku doh: Buku sahou amwenen badeh kameh ndramak ari kameh tolowei ku-i katin iu, iy atehei ili ta ari ndramak ja. I doh ta leheya munyak doh ndra tan.

Ndreh nane dah asehek ili ta Bowas, “Mwasin, ou sihinei ai.” Iy eme tolowei ku-i katin iu, iy eme atehei i ta Bowas.

Ano Bowas asehek i toro kabin ma ronoh dah ma lau rayah ja, “Aha marakon ndranuhun, ma aha ndranyolom, Jo badeh ndrasihinei lakou mara-ei ta Elimelek, ma nadun uru Malon uru Kiliyon udu mine Nawomi. 10 Jo asehek i buku doh: Rut badeh badu kon tiri Mowap, iy badeh nyawe Malon, Jo kameh andrei iy i uduk. Jo amekes i buku doh ta iri lokowa Malon badeh, kudu ndra hawe nyawen. I buku nyaran in ta munyak ma i dah kameh nadun oro winiya bamaniy bwe. Buku na len dah aha marakon ndranyolom.”

11 Oro kabin ma ronoh nane dah ma iri lau mari anya, “Ehe! Ahi ndranuhun, ma ahi ndranyolom. Ahi asolom Laban kameh kasebenei iy badih badeh ewek asiu tam. Iy ki le buku Rejel uru Leya. Uru badeh tuwiy nah solo-an labai, eme bwidiy lau badu Isra-el i sola labai. Ou kameh asahan nadu batun, badu boho kamen ta Eparata, bolo Betlehem kameh nyaram le kabwe. 12 Laban winiya atehei ta ah nah solo-an, ma lundriyem oro winiya asahan a tinan i buku lundriye Peres, nadu Juda uru Tamar mwan.”

13 Bowas eme andrei Rut i udun, ma iy eme andrei iy ili asiu tan. Laban atehei nyosowan i ta Rut, ma Rut nah udu tan. Eme ma iy tuwiy nah mwan.

14 Iri badih ame asehek i ta Nawomi, “Katutuniy nyara Laban. I deh, iy ndratehei nah ari mwan kede-eh ndra nadu bwiliyem ta aseben ou. Ma nyaran kameh iri Isra-el winiya bamaniy bwe. 15 Nyanam badeh aso-ok ou labai! Ma iy badeh bwidiy gok tam solo-an labai, bala buku ndro taloh nadum badu ndrinem amwenen bwe. I deh, iy ndratehei tam nah ari ma nah kede-eh kameh bwidiy manyah tam hamon kameh udu mwasin, ma iy tondrokei ou winiya le imek tam.”

16 Nawomi eme bwese-ei iy, tukuniy iy udu batalan ma iy tondrokei iy. 17 Iri badih badu kon doh badeh asehek anya, “Nawomi badeh ndratuwiy nah mwan ari.” Eme oro badih nane ame tondrohaniy nyaran ili Obet.

Eme Obet badeh i tama Jesi, eme ja Jesi i tama Debit.
18 I dah Sare tubu Debit oro udu ndrabada Peres eme asahan ta Debit: Peres tuwiy Hesron, Hesron eme tuwiy Ram, Ram eme tuwiy Aminadap, Aminadap eme tuwiy Nason, Nason eme tuwiy Salmon, Salmon eme tuwiy Bowas, Bowas eme tuwiy Obet, Obet eme tuwiy Jesi, eme ma Jesi tuwiy Debit.

Copyright information for `LID